ვლადიმირ კლიჩკო ამერიკაში დაპატიჟეს

სუპერმძიმე წონით კატეგორიაში WBC-ის ვერსიით მსოფლიოს ჩემპიონმა, ამერიკელმა დეონტეი უაილდერმა საკუთარი პირობები წამოუყენა ოთხი საჩემპიონო ქამრის მფლობელს, უკრაინელ ვლადიმირ კლიჩკოს.

"მე ვფლობ ყველაზე პრესტიჟულ საჩემპიონო ქამარს კრივში. ეს ის ტიტულია, რომელიც ძალიან სჭირდება კლიჩკოს. ჩვენს შორის ბრძოლის ორგანიზების პირობა ასეთია: კლიჩკო ამერიკის შეერთებულ შტატებში უნდა ჩამოვიდეს", - განაცხადა უაილდერმა BoxingScene-თან კომენტარში.

ბრძოლა უმცროს კლიჩკოსა და უაილდერს შორის 2016 წელზე ადრე არ ჩატარდება, რადგან ამა წლის სექტემბერში, ამერიკელს დაგეგმილი აქვს შეხვედრა მეტოქესთან, რომლის ვინაობას საიდუმლოდ ინახავენ.

გარდა ამისა, უაილდერს ტიტულის დაცვა უწევს რუსი ალექსანდრ პოვეტკინის წინააღმდეგ, რომელიც WBC-ის აუცილებელი პრეტენდენტის სტატუსით სარგებლობს.

"არავისი არ მეშინია. როცა WBC-ის ტიტული მოვიგე, დავპირდი ჩემს გულშემატკივრებს, რომ აქტიური ჩემპიონი ვიქნებოდი. მხოლოდ ფულის გამო არ ვიჩხუბებ. ნებისმიერს შევხვდები, ვისაც ჩემს ტიტულზე პრეტენზია გაუჩნდება.

ოფიციალური პრეტენდენტი ალექსანდრ პოვეტკინია. ჩვენ გუნდები მოლაპარაკებებს აწარმოებენ, მაგრამ არ მგონია, რომ ის გახდეს ჩემი მომდევნო მეტოქე. თუმცა დარწმუნებული ვარ - ერთმანეთს შევხვდებით", - განაცხადა 29 წლის უაილდერმა.

ამერიკელი WBC-ის ტიტულს 2015 წლის იანვრიდან ფლობს, სულ კი კარიერაში 34 ბრძოლიდან ყველა მოგებული აქვს, აქედან 33 - ნოკაუტით.

ყოველდღიური სპორტული გაზეთი "ლელო"