ანტალიის ტურნირი: დაგვრჩა მხოლოდ ქრისტინე ესებუა

ანტალიაში მიმდინარე მშვილდოსანთა მსოფლიოს თასზე 8 ივნისს პლეი ოფის შეხვედრები დაიწყო პირადშიც და გუნდურშიც, რის შედეგადაც ტურნირში მხოლოდ ერთი მონაწილე დაგვრჩა - მსოფლიოს ვიცე-ჩემპიონმა ქრისტინე ესებუამ დაამარცხა პირველი მეტოქე და მეთექვსმეტედფინალში გავიდა, სხვები კი გამოვარდნენ.

თუმცა ესებუასაც გვარიანი ნერვიულობა დასჭირდა მოსაგებად და მომდევნო ეტაპის საგზური გადასროლაში მოიპოვა. ოღონდ იქაც ფრე აღინიშნა, მაგრამ ჩვენებურს ცენტრთან სიახლოვემ უშველა. ესებუა პირველ წრეში ისვენებდა, მომდევნოში კი მისი მეტოქე ამერიკელი ჯენიფერ შნაიდერი აღმოჩნდა. ძირითადი სერია ფრედ დასრულდა, 5:5, თუმცა შეხვედრა ამერიკელის უპირატესობით დაიწყო: 25:24 პირველ სერიაში მის სასარგებლოდ. ესებუამ ჯერ გაათანაბრა ანგარიში - 28:25 მოიგო, მერე კი 26:25 იმარჯვა და სეტებში 4:2 დაწინაურდა. თუმცა უპირატესობა დიდხანს ვერ შეინარჩუნა - მეოთხე პერიოდი 26:28 დათმო და ანგარიში 4:4 გახდა. ყველაფერი დამატებით, მეხუთე სეტზე იყო დამოკიდებული, მაგრამ ისიც ფრედ დასრულდა და შეხვედრაც 5:5 მორჩა. დაინიშნა დამატებითი გასროლა, სადაც მონაწილენი თითო ისარს ისვრიან. ბედის ირონიით, ეს ისარი ორივემ 8-იანში გაარტყა, მაგრამ ესებუასი ცენტრისკენ უფრო ახლოს იყო და გამარჯვებაც მას დარჩა.

ჩვენებური მეთექვსმეტედფინალურ პაექრობას დღეს დილით ჩაატარებს ტაივანელ ში-ჩია ლინისთან, ხოლო მას თუ მოუგებს, მერვედფინალში გუნდურში ინდოელთა ორგზის მსოფლიოს ვიცე-ჩემპიონ დეეპიკა კუმარისა და უკრაინელ ვერონიკა მარჩენკოს წყვილში უძლიერესს შეხვდება. როგორც ვხედავთ, ესებუას საკმაოდ ძნელი ბადე აქვს.

ჩვენმა სხვა მონაწილეებმა პირველივე შეხვედრები დათმეს. ციკო ფუტკარაძეც მეორე წრიდან ჩაერთო შეჯიბრებაში, სადაც 2:6 წააგო იაპონელ კაორი კავანაკასთან. ასეთივე ანგარიშით ნანა მახარაძე პირველივე წრეში დამარცხდა შვეიცარიელ ლიანა დაინეკოსთან, ხოლო ხათუნა ნარიმანიძემ ასევე საწყის ეტაპზე 4:6 დათმო კოლუმბიელ მსოფლიოს ბრინჯაოსპრიზიორ ნატალია სანჩესთან, ვინც კარგა ხნის პაუზის შემდეგ ისევ გამოჩნდა სასროლეთზე.

ნარიმანიძე სამი სეტის შემდეგ 4:2 იგებდა და ერთი მოგებაღა აშორებდა გამარჯვებამდე. თავიდან სანჩესი დაწინაურდა - 26:24, მაგრამ ნარიმანიძემ მოიგო მომდევნო ორი სეტი და შემდეგი წრის კარიბჭეს მიადგა: 28:26; 29:23. სამწუხაროდ, ჩვენებურმა დარჩენილი ორი სეტიდან ვერც ერთში ვერ იმარჯვა - 26:29; 24:28 დათმო და შემდეგ ეტაპზეც კოლუმბიელი გავიდა.

ვაჟებშიც მხოლოდ ერთმა ჩვენებურმა გადალახა პირველი წრე, თუმცა იქაც თანაგუნდელს ხვდებოდა: თბილისური დუეტის პაექრობაში ზურაბ მესტვირიშვილმა 7:1 მოუგო ვლადიმერ დოლიძეს, თუმცა შემდეგ 2:6 დათმო ესპანელ პაბლო გონსალესთან.

ლაშა ფხაკაძე პირველივე შეხვედრაში 1:7 დამარცხდა ინდოელ ვისვაშთან, ხოლო ჯაბა მოსეშვილმა საწყის სტადიაზევე 0:6 დათმო უკრაინელ ჰეორჰი ივანიცკისთან.

ჩვენები გუნდურ შეჯიბრებასაც პირველივე წრიდან გამოეთიშნენ. ქალები ნატო ნასარიძის გაწვრთნილ თურქებთან 0:6 დამარცხდნენ. პოლონური შეჯიბრების მსგავსად, ჩვენი ნაკრების მთავარმა მწვრთნელმა თამაზ ფუტკარაძემ აქაც შეიტანა ცვლილება და ძირითად შემადგენლობაში ნარიმანიძე დააყენა, ოღონდ იმ შეჯიბრებისგან განსხვავებით, ამჯერად ციკო ფუტკარაძეს ასროლინა და ნანა მახარაძე დაასვენა. როგორც გითხარით, ექსპერიმენტმა არ გაამართლა.

მოულოდნელად, ვაჟებმა უფრო მეტი წინააღმდეგობა გაუწიეს მეტოქეს - ფავორიტ იტალიას და მათ სამი ქულა აართვეს: მეორე სეტი 59:56 მოუგეს, მესამე კი ფრედ, 54:54 დაასრულეს. მანამდე პირველი სეტი 52:59 დათმეს და მეოთხე პერიოდის წინ საერთო ანგარიში 3;3 იყო.

სამწუხაროდ, გადამწყვეტ ეტაპზე ჩვენს ახალგაზრდა სამეულს (დოლიძე, მესტვირიშვილი, ფხაკაძე) არ ეყო ფსიქოლოგიური მომზადება და ის სეტი ერთი ქულით, 54:55 წააგეს. დასანანი წაგებაა. მით უფრო, რომ ოლიმპიური, მსოფლიოსა და ევროპის ორ-ორგზის ჩემპიონ მაურო ნესპოლით გაძლიერებულ იტალიას კარგად ნამდვილად არ უსვრია. განსაკუთრებით - ბოლო სეტში, მაგრამ ასეთ დროს გამოცდილება დიდი საგანძურია.

(იბეჭდება მცირე ცვლილებით)
ყოველდღიური სპორტული გაზეთი "ლელო"