ოლიმპიურმა, მსოფლიოსა და ევროპის ჩემპიონმა ნინო სალუქვაძემ ძალზე ცუდად იასპარეზა მილანში დაწყებულ მსოფლიოს თასის მორიგ ეტაპზე. 16 მაისს ჩვენებურმა პნევმატური იარაღით ისროლა და მხოლოდ 375 ქულა დააგროვა, რითაც მე-40-ე ადგილზე გავიდა.
სალუქვაძეს თითქოს ურიგოდ არ დაუწყია და პირველ სამ გასროლაზე სულაც ქულათა მაქსიმუმი ჰქონდა - სამივე ტყვია 10-იანში მოარტყა, მაგრამ პირველივე სერიოზული ჩავარდნაც აქ მოუვიდა - მეოთხე ცდაზე 8-იანი მოინადავლა.
ამას ისევ სამი 10-იანი მიაყოლა, თუმცა მერე ორჯერ 9-იანამდე დაეშვა. ამ სერიის ბოლო გასროლა ისევ 10-იანი გამოდგა და სერია არცთუ
მომდევნო ორი სერია ძალზე ცუდი გამოდგა - მხოლოდ 91-91 ქულა, მაგრამ მეორე სერიაში თუ 9-იანები ჭარბობდა, მესამეში სალუქვაძემ სამჯერ 8-იანში მოარტყა. დასკვნით, მეოთხე სერიაში სამიზნე კი გაისწორა და საუკეთესო შედეგი - 97 ქულა აჩვენა, მაგრამ ამით საერთო მდგომარეობა ვეღარ გამოასწორა. ამ სერიაში 7-ჯერ ათიანის ნიშნულში მოარტყა, დანარჩენები კი - 9-იანში.
ტურნირი უკრაინელმა მსოფლიოსა და ოლიმპიურმა ჩემპიონმა ოლენა კოსტევიჩმა მოიგო 493.1 ქულით. მან მართლაც ჩინებულად ისროლა - საკვალიფიკაციო ეტაპი 392 ქულით მოიგო, ფინალში კი მეორე იყო 101.1-ით.
შესარჩევშიც და მთლიანად შეჯიბრებაშიც მეორე შედეგი ჩეხმა ოლიმპიადის ვიცე-ჩემპიონმა და მსოფლიოს პრიზიორმა ლენკა მარუსკოვამ აჩვენა - თავდაპირველად 389 ქულა დააგროვა, რასაც ფინალში საუკეთესო შედეგი, 102.0 დაუმატა და ჯამში 491.0 დააგროვა.
ბევრისთვის მოულოდნელად ბრინჯაოს მედალი ლამის უცნობმა ტაივანელმა ჩია ჩენ ტინმა მოიპოვა.
საკვალიფიკაციო ეტაპის შემდეგ ის მეოთხე-მეხუთე ადგილებს იყოფდა სალუქვაძესავით ყველაფრის მომგებ სერბ იასნა სეკარიჩთან, მესამე ადგილზე კი 388 ქულით ბელარუსი მსოფლიოს ორგზის მესამე პრიზიორი ვიქტორია ჩაიკა იყო. ფინალში ტაივანელმა 100.9 ქულა დააგროვა, ჯამში 487.9 გამოუვიდა და ბრინჯაოც დაისაკუთრა.
გუშინვე ასევე სპორტული პისტოლეტიდან ისროლა ლევან ქადაგიძემაც, მაგრამ დიდი შედეგებით ვერც ის გამოირჩა - 573 ქულა და 45-ე ადგილი. აქ ჩინელმა ზონგლიანგ ტანმა გაიმარჯვა 684.6 ქულით - 585+99.6. ვერცხლი 684.3-ქულიანმა თურქმა ისმაილ კელესმა მოიპოვა - 582+102.3. მესამეზე 684.0-იანი რუსი ვლადიმირ გონჩაროვი გავიდა - 583+101.0. 683.3-ქულიანი სომეხი ნორაირ ბახტამიანი საბოლოოდ ვერცხლს დასჯერდა, იმის მიუხედავად, რომ ფინალში საუკეთესო შედეგით - 586-ით შევიდა.
ჩვენი დუეტი სპორტული პისტოლეტიდან სროლაში ხვალ გამოვა, მერე კი ტურნირის დანარჩენ მონაწილეებთან ერთად მიუნხენში გადაინაცვლებენ, სადაც მსოფლიოს თასის მეორე ეტაპი ჩატარდება.
ყოველდღიური სპორტული გაზეთი "ლელო"
