ლენს არმსტრონგის ყოფილმა თანაგუნდელმა ტაილერ ჰემილტონმა CBS-თვის მიცემულ ინტერვიუში ტურ დე ფრანსის შვიდგზის ჩემპიონი დოპინგის მიღებაში დაადანაშაულა. ასე რომ, კვლავ დადგა დღის წესრიგში ლეგენდარული ლენსის სპორტული პატიოსნების საკითხი.ჰემილტონმა აღნიშნა, რომ არმსტრონგი და US Postal-ის სხვა წევრები აკრძალულ პრეპარატებს იღებდნენ ტურ დე ფრანში მონაწილეობისთვის. ტაილერი აკონკრეტებს - არმსტრონგი იყენებდა მრავალრიცხოვან სტიმულატორებს, EPO-ს, ტესტოსტერონს და ე. წ. "სისხლის დოპინგს".
"თავს ცუდად ვგრნობ იმის გამო, რომ ამის შესახებ მოყოლა მიწევს. მაგრამ მესმის, ჩემი სიტყვები მომავალში დაეხმარება სპორტს და ის უფრო სუფთა გახდება.
ტაილერის ნაამბობიდან ვიგებთ, რომ US Postal-ის ხელმძღვანელობა და ექიმები არ კრძალავდნენ დოპინგის გამოყენებას, თანაც მსგავსი სიტუაცია ამერიკულ საჯინიბოში არმსტრონგის მისვლამდეც იყო. აკრძალული პრეპარატები, მათ შორის EPO და ზრდის ჰორმონი ველომრბოლებს სადილის შემდეგ ურიგდებოდათ. გარდა ამისა, სპორტსმენებს სასტუმროში "სუფთა" სისხლს უღებდნენ, რომელსაც მოგვიანებით უკან უსხმადნენ მათ. ეს იმ მიზნით კეთდებოდა, რომ დაემალათ ათლეტთა ანალიზში აკრძალული პრეპარატების კვალი.
უნდა აღინიშნოს, რომ ადრე ჰემილტონი უარყოფდა თავის მონაწილეობას ანტისადოპინგო კანონმდებლობის დარღვევაში. ახლა კი საქვეყნოდ აღიარა დანაშაული და თავისი ყოფილი თანაგუნდელიც "გასვარა". ველოსპორტის სამყაროში ჰემილტონის ასეთ არათანმიმდევრულ საქციელს იმით ხსნიან, რომ ამერიკელს ფულის გაკეთება უნდა ცოტა ხნის წინ მისი ავტორობით გამოსული წიგნის მეშვეობით.
არმსტრონგის ნაცვლად ჰემილტონს პასუხი ლენსის ადვოკატმა მარკ ფაბიანმა გასცა: "ტელეარხმა CBS-მა არაპროფესიონალიზმი გამოავლინა. ჟურნალისტები სენსაციას გამოეკიდნენ. ტელევიზია ენდო საეჭვო წყაროს და სრული იგნორირება გაუკეთა არმსტრონგის 500 სუფთა დოპინგსინჯსა და მის ათეულობით თანაგუნდელის აზრს, რომლებიც მზად არიან დაადასტურონ ლენსის ნიჭი და პატიოსნება".
ჰემილტონი ამტკიცებს, რომ უკვე მისცა ჩვენება ლოს ანჯელესის სასამართლოში. ამერიკის ფედერალური პროკურატურა გამოიძიებს არმსტრონგის გუნდის კავშირს ნარკოტიკების გავრცელების ქსელთან. იტყობინებიან, რომ აშშ-ის მთავრობა უკვე დაუკავშირდა კოლეგებს საფრანგეთიდან ამ საქმეში თანამშრომლებისთვის. კერძოდ, ამერიკელებმა მოითხოვეს არმსტრონგის შარდის ანალიზი, რომელიც ველომრბოლმა 1999 წელს ჩააბარა. ამასთან, პროკურატურას უფრო აინტერესებს გუნდის მხრიდან ანტისადოპინგო კანონის დარღვევის საკითხი, ვიდრე არმსტრონგის სინჯის შედეგი, რადგან ეს პირველი შემთხვევა არ არის, როცა ჟურნალისტებმა ლენსის დადანაშაულება სცადეს, მაგრამ ვერაფერი დაამტკიცეს. ადრე ფრანგულმა გამოცემა "ეკიპმა" გამოაცხადა, რომ 1999 წელს ველომრბოლის ექვსი დოპინგსინჯი დადებითი შედეგისა იყო. მაგრამ მაშინ ველომრბოლთა საერთაშორისო კავშირმა ასე ახსნა სიტუაცია - სინჯები არასწორად იყო გამოყენებული და მათი მტკიცებულებად გამოყენება არ შეიძლებაო.
ტურ დე ფანსი არ არის ერთადერთი რბოლა, რომელთან დაკავშირებითაც არსებობს ლენსის მიმართ ეჭვი. ჰემილტონმა გამოაცხადა, რომ 2001 წელს არმსტრონგმა დადებითი დოპინგსინჯი ჩააბარა "შვეიცარიის ტურზე", რომელიც წინ უძღოდა ტურ დე ფრანსს. მაგრამ ჰემილტონის სიტყვებით, ლენსი ამის გამო სულაც არ ნერვიულობდა. ჰემილტონი მიიჩნევს, რომ არმსტრონგმა გარიგება დადო ველომრბოლთა კავშირთან და ამჯერადაც "მშრალი" ამოვიდა წყლიდან.
აგრეთვე თავის ინტერვიუში ჰემილტონმა განაცხადა, რომ არმსტრონგი და იტალიელი მწვრთნელი მიჩელე ფერარი განიხილავდნენ, როგორ გამოეყენებინათ სწორად დოპინგი: "იტალიელი ასწავლიდა ლენსს, როგორ მიეღო აკრძალული პრეპარატები. ველოსპორტში არის კიდევ რაღაც გარდა ჯანსაღი კვებისა და ვარჯიშებისა.
არსებობს კიდევ ერთი ელემენტი - ეს არის დოპინგი". აქვე უნდა გაგახსენოთ, რომ ფერარი სამუდამოდ არის დისკვალიფიცირებული იტალიის ველოსპორტის ფედერაციის მიერ. არმსტრონგმა ასევე გაწყვიტა ყველანაირი ოფიციალური პროფესიული ურთიერთობა ამ იტალიელ მწვრთნელთან, მაგრამ მასთან დღემდე აქვს კავშირი.
