ერევანში საგზატკეცილო ველოსპორტში სამ ასაკობრივ ჯგუფში სომხეთის ღია პირველობა გაიმართა. საქართველოდან მხოლოდ იუნიორები და კადეტები (1997-98 წწ. დაბადებულნი) ჩაებნენ ასპარეზობაში.
ჩვენს დელეგაციას ხელმძღვანელობდა საქართველოს ველოსპორტის ფედერაციის პრეზიდენტი ომარ ფხაკაძე, რომელსაც მეზობელი ქვეყნიდან დაბრუნებისთანავე გავესაუბრეთ.
- იუნიორებიდან სამი სპორტსმენი გვყავდა წაყვანილი, კადეტებიდან კი სომხეთში რვა ჩვენიანი ასპარეზობდა, მაგრამ ამ რვიდან ხუთი 1999-2000 წლებში დაბადებული იყო, რომლებიც "თბილისი-2015"-ისთვის ემზადებიან. - ამბობს ფედერაციის პრეზიდენტი. - შეჯიბრება საკმაოდ რთული და, ამდენად, საინტერესო გამოდგა. ჩვენმა დიმიტრი ხოსიაურმა იუნიორების ინდივიდუალურ
კადეტებიდან ათეულში ყველა შევიდა, თუმცა საპრიზო ადგილზე კრიტერიუმში ამ ასაკობრივი ჯგუფის ლიდერმა გიორგი პეტრინმა იმარჯვა. იგი 1999 წელსაა დაბადებული და ორი წლით უფროსებთან ჭიდილში მესამე ადგილის დაკავება ძალიან კარგი შედეგია.
- ასე რომ, ბოლო ტურნირებიდან უმედლოდ არ ბრუნდებით...
- ეს სპორტსმენებთან ერთად მწვრთნელების დიდი დამსახურებაცაა, რომლებიც ძალ-ღონეს არ იშურებენ, რათა მაღალ შედეგებს მიაღწიონ. სომხეთში ისიც იყო თვალსაჩინო, რომ ჩვენს ბიჭებში გუნდური სულისკვეთება იგრძნობოდა, რაც თავისთავად მწვრთნელების დამსახურებაა. ბიჭები სწავლობენ ერთმანეთის დახმარებას, მხარში დგომას. ასე რომ, შეიძლება ითქვას, ნელ-ნელა ყალიბდება სპორტული კულტურა.
- მწვრთნელები ვინ არიან?
- იუნიორთა ნაკრების მწვრთნელია კობა აბაიშვილი, კადეტებისა - ანატოლი სტაშევსკი.
- ამ შეჯიბრებამდე ჟენევაში ველოსპორტის საერთაშორისო ფედერაციის ასამბლეაზე იყავით მიწვეული. ორი სიტყვით ამ ფორუმზეც გვითხარით...
- ორმოცზე მეტი ფედერაციის წარმომადგენელი შევიკრიბეთ. ორდღიანი სემინარები გვქონდა. ოთხი საკითხი განვიხილეთ: მენეჯმენტი ველოსპორტში, პრესასთან ურთიერთობა, მასობრიობის განვითარება და სპონსორების მოძიება.
მთავარი ის არის, რომ კარგი ურთიერთობები დავამყარე როგორც საერთაშორისო ფედერაციის მესვეურებთან, ისე ცალკეულ ქვეყნებთან.
არის დაპირებები დახმარებაზე, ინვენტარსაც შეგვპირდნენ. უნდა ითქვას, რომ ბოლო ათწლეულებში საქართველოს არანაირი ურთიერთობა არ ჰქონია საერთაშორისო ფედერაციებთან, რამაც საგრძნობლად ჩამოგვაქვეითა.
როცა ურთიერთობა არა გაქვს, ბუნებრივია, ყურადღებაც თითქმის არ გექნება. ახლა თავიდან ვცდილობ ამ ურთიერთობების აღდგენას.
თითქმის ყოველდღიური კონტაქტი თუ არ გექნა საერთაშორისო ფედერაციებთან, ძალიან გაგიჭირდება წინსვლა. ჩვენისთანა ფედერაციისთვის ძალიან სასარგებლოა მოწინავე ქვეყნებთან ურთიერთობა. მათგან უნდა ვისწავლოთ ის, თუ როგორ მიაღწიეს წარმატებებს.
- ახლო მომავალში რა შეჯიბრებები გელით?
- 26-29 მაისს მოსკოვში ლესნიკოვის მემორიალი ტარდება, სადაც იასპარეზებენ მსოფლიოს უძლიერესი სპორტსმენები გერმანიიდან, საფრანგეთიდან, ინგლისიდან... ჩვენგან მხოლოდ სატრეკო ველოსპორტის ლიდერი დავით ასკურავა გაემგზავრება.
გარდა ამისა, ზაფხულში რამდენიმე ტურნირი გველოდება. მოგეხსენებათ, გამოცდილების მისაღებად და სპორტული დონის ასაწევად აუცილებელია მაღალი რანგის შეჯიბრებებში მონაწილეობა.
ჩვენც ყველანაირად ვეცდებით, სამივე დისციპლინის მიმდევრებს მივაღებინოთ მონაწილეობა ასეთი დონის ტურნირებში.
ყოველი წარმომადგენლობითი ტურნირი თითო ნაბიჯით წინ გწევს და გვინდა, მომავალი წლისთვის უფრო დახვეწილი და ძლიერი გუნდი გვყავდეს. რაც მთავარია, მონდომება არის როგორც სპორტსმენთა, ისე მწვრთნელთა მხრიდან.
დავით ჭელიძე
ყოველდღიური სპორტული გაზეთი "ლელო"
