ფოტოზე: იულია ლონჟანიძეგუშინ საკმაოდ ადრე მშვილდოსან იულია ლობჟანიძის საქომაგოდ რომ მივდიოდი, ისეთ ამაღლებულ განწყობაზე გავედი მედია-სოფლიდან, გავიფიქრე კიდეც, რა ხდება, ლობჟანიძე ხომ არ უგებს ვალეევას-მეთქი... თუმცა ეს იმდენად არარეალურად მივიჩნიე, მაშინვე უკუვაგდე - ნამდვილად არ მეგონა, პირად-გუნდურში მსოფლიოს ოთხგზის იტალიელი ჩემპიონი ნატალია ვალეევა ჩვენი წერა თუ გახდებოდა.
არადა, ლობჟანიძემ დამაჯერებლად მოუგო - 6:2, მეორე სერიაში კი სამივე ისარი 10-იანში გაარტყა და სეტი 30:26 მოუგო.
შეიძლება ლაპარაკი იმაზე, რომ მოლდოვიდან იტალიაში გათხოვილი ვალეევა ვერ იყო ფორმაში - პირველ სეტში 7-იანიც
იმის მიუხედავად, რომ ლობჟანიძე საბოლოოდ უმედლოდ დარჩა, ვალეევას გაგდებით დღის მთავარი სენსაცია შემოგვთავაზა.
იტალიელს იქ არ წაუვიდა სროლა, თორემ ბაქოში ორი ოქრო მოიპოვა - შერეულ წყვილებში (სწორედ მან და მაურო ნესპოლიმ დაგვიმარცხეს ფინალში ხათუნა ნარიმანიძე და ლაშა ფხაკაძე), ანუ ფავორიტი იყო. არადა, კინაღამ გამოვტოვე ეს შეხვედრა - დილის 9 საათზე დაიწყო, ანუ ძალიან ადრე მიწევდა ადგომა, მომზადება-მისვლა რომ მომესწრო. თან დილით ბატუტზეც მინდოდა შერბენა, მაგრამ გულმა ბახრამოვისკენ გამიწია...
ლობჟანიძემ პირველ შეხვედრაშიც პატარა გმირობა ჩაიდინა, როცა დანიელ კარინა დოსენვინგეს 0:4 ამოუქაჩა და გადასროლაში მოუგო. აღსანიშნავია, რომ ეს დამატებითი ისარი ორივემ 10-იანში მოარტყა, თუმცა ცენტრთან უფრო ახლოს ქართველისა იყო.
ნარიმანიძემ ორივე მოგებულ შეხვედრაში გვარიანად გვანერვიულა ქომაგები - აზერბაიჯანელ იალაგულ რამაზანოვასთან დამატებით სერია დასჭირდა, ესპანელ ადრიანა მარტინთან კი გადასროლამდე მივიდა საქმე. აზერბაიჯანელი ბოლოს ისე დაიღალა, მეხუთე სერიაში პირველი ისარი 4-იანში, ბოლო კი 8-იანში მოარტყა. ესპანელთან საქმე იქნებ დამატებით ისრამდე არ მისულიყო, მაგრამ მესამე სეტში მსაჯებმა მარტინს 9-იანზე შეფასება მოუმატეს, რითაც სამივე 10-იანი გამოუვიდა და მოიგო. დაბალი ქულები არც ესპანელს აკლდა - ერთხელ 5-იანშიც მოარტყა, ნარიმანიძე კი 2:0-ს უგებდა, მაგრამ ანგარიში ბოლომდე ვერ შეინარჩუნა.
დამატებითი ისარი პირველად მეტოქემ ისროლა და 6-იანში მოარტყა - არსებითად, ამით ინტრიგაც მოკვდა. ნარიმანიძემ აკი 8-იანი მოინადავლა.
ჩვენი დუეტი მერვედფინალში ძალზე დასანანად დამარცხდა - ნარიმანიძეს თურქმა მეტოქე იასემინ ანაგოზიმ ბოლო, გადამწყვეტ სეტში ბოლო ისრით 7-იანი "აჩუქა", თუმცა ჩვენებურმა ანგარიშის გათანაბრების ეს შანსი ვერ გამოიყენა და 7-იანს ვერც ეს ასცდა.
არც ლობჟანიძეს წაუვიდა სროლა ესპანელ ალისია მარტინთან, იმის მიუხედავად, რომ პირველი ორი სეტი ფრედ დაასრულა. სამაგიეროდ, მომდევნო ორი დათმო. ქრისტინე ესებუა პირველივე წრეში დამარცხდა ნატო ნასარიძის გაწვრთნილ თურქ ბეგუნან უნსალთან - 2:6. არადა, თურქი შესარჩევში 41-ე იყო, ჩვენებური - 25-ე. თუმცა, როგორც მწვრთნელები ამბობენ, ის ვერ უძლებს ხანგრძლივ შეჯიბრებას და ამიტომ საკვალიფიკაციოში იქნებ არ ჰქონდეს მაღალი ადგილი, მაგრამ ასე პლეი ოფში ძლიერია.
ლაშა ფხაკაძემ ჯერჯერობით პლეი ოფში ერთი შეხვედრა გამართა და სლოვაკი ბორის ბალაზი 6:0 გაანადგურა. ფხაკაძეს გამარჯვება საკამათო მხოლოდ პირველ სეტში გაუხდა, რომელიც 25:23 მოიგო. შეხვედრის ბოლოს მოუბოდიშა კიდეც მწვრთნელებს და აღიარა, გამიმართლაო. მეორე-მესამეში მან 29:28 და 28:26 იმარჯვა და ამ ექვსი ისრიდან ნახევარი 10-იანში მოარტყა.
ფხაკაძის ამ გამოსვლისას თურქები ერთგულად გვიჭერდნენ მხარს. ჩვენ წინ სწორედ ის პოლონელი მწვრთნელი იჯდა, ვინც ლაშას ბაქოში ისრები ჩაუტანა (თუმცა ჯერ ფულის ნაწილია გადახდილი), რაც სპორტსმენმა თავისი წარმატების მთავარ მიზეზად დაასახელა.
გასაგებია, ის ვისაც უქომაგებდა და რამდენჯერაც "დავაი გრუზია" დაიძახა, ფხაკაძემ იმდენჯერ 10-იანში გაარტყა... ბოლოს გასვლას აპირებდა და ჩვენ არ გავუშვით, დარჩი და კიდევ შეუძახეო. გახალისებულმა პოლონელმა ბოლოს შაბაშიც მოითხოვა - ქართული ჭაჭა. სამაგიეროდ, თურქისგან მიიღო შენიშვნა - გრუზია არა, ჯორჯიაო...
ქალების გუშინდელი გამოსვლისას უკვე აზერბაიჯანელთა მწვრთნელი გვყავდა ერთგულ ქომაგად. ზოგადად, აქ მასპინძელთაგან ქართველების პატივისცემას ყოველ ნაბიჯზე ვაწყდებით. მხოლოდ გუშინ ორჯერ მოვისმინეთ ფრაზა, ქართველები ჩვენი ძმები არიანო.
პირველი მათგანის ავტორი მედია-სოფელში ავტობუსების განრიგის მომწესრიგებელი აღმოჩნდა და რომ გაიგო, მშვილდოსნობიდან მედია-სოფელში დაბრუნებულებს ტანვარჯიშის დარბაზში მიგვეჩქარებოდა სალომე ფაჟავას საქომაგოდ, ავტობუსიც კი "გვიჩალიჩა", დროულად რომ მიგვესწრო...
სალომემაც გაგვიმართლა იმედები... ალბათ, მშვილდოსნებსაც ჩაეთვლებათ ეს ტურნირი აქტივში, თუმცა მათ გამოსვლა ჯერ არ დაუსრულებიათ - ფხაკაძე დღეს, 22 ივნისს, პოლონელ მარეკ ჟაფრანს შეხვდება.
ყოველდღიური სპორტული გაზეთი "ლელო"
