ძიუდოს კლუბმა "მებრძოლმა" ევროპის საკლუბო ჩემპიონატი მოიგო

შინაგან საქმეთა სამინისტროს კლუბი "მებრძოლი" ჰოლანდიაში გამართულ ევროპის საკლუბო ჩემპიონატში ძიუდოში წარმატებით გამოვიდა.

"მებრძოლმა" ფინალში ჰოლანდიური "ჰაარლემ კანამიუ" დაამარცხა.

შეგახსენებთ, რომ კლუბი "მებრძოლის" წევრებმა, რომელიც ძირითადად, ეროვნული ნაკრების წევრებითაა დაკომპლექტებული: ამირან პაპინაშვილი, შალვა ქარდავა (ორივე - 66), ნუგზარ ტატალაშვილი, ზებედა რეხვიაშვილი (73), ავთანდილ ჭრიკიშვილი, ლაშა ზურაბიანი (81), ვალერი ლიპარტელიანი, ზვიად გოგოჭური, (90), ადამ და ვახტანგ ოქრუაშვილები, გურამ თუშიშვილი (სამივე - +100),  ყველა შეხვედრაში დამაჯერებლად იასპარეზეს და საბოლოოდ გუნდური პირველი ადგილის მოპოვება შეძლეს.

ევროპულ სარბიელზე ეს კლუბი "მებრძოლის" პირველი გამოსვლა იყო. ამ გამარჯვებით ქართველი ძიუდოისტები ევროპის ჩემპიონატის "ოქროს ლიგაში" გადაინაცვლებენ და მომავალ წელს კონტინენტის უძლიერეს გუნდურ ჩემპიონატში მოსინჯავენ ძალებს.

განმარტებისთვის გეტყვით, რომ ევროპის საკლუბო ტურნირი ახალი ფორმატით ტარდება, ორ ლიგაში. უმაღლესი დონეა "ოქროს ლიგა", რომელშიც 8 კლუბი შედის, ხოლო დანარჩენები პირველ ლიგაში ერთიანდებიან.

რაც შეეხება მეორე ქართულ კლუბს, "საგარეჯომ" გუნდური მეხუთე ადგილი დაიკავა.