მოსკოვში 18 მაისს დაწყებულ ევროპის პირველობაში წარმატებით ჩაებნენ ქართველი სამბისტები და პირველივე დღეს ვერცხლის ორი მედალი მოიპოვეს - ქუთაისელმა გენადი ჩირგაძემ (52) და თბილისელმა ლევან ნახუცრიშვილმა (68).ჩირგაძე პირველად ჭიდაობდა ამ რანგის ტურნირზე და დებიუტი ვერცხლისფრად შეფერა. ფინალში მისი მეტოქე რუსი ალბერტ მონგუში იყო, რომლის წინააღმდეგობაც ჩვენებურმა, წინა შეხვედრებისგან განსხვავებით, ვეღარ დასძლია.
ფინალში ძლიერი მეტოქე შეხვდა ნახუცრიშვილსაც - ბელარუსი ალექსანდრ კოკშა და ჩემპიონობას ვერც ამ წონაში შევწვდით. გუშინ კიდევ ორმა ჩვენებურმა იასპარეზა - დავით კარბელაშვილმა (90) და ნინო ოძელაშვილმა (72),
საერთოდაც გუშინდელმა დღემ, მოლოდინისამებრ, მასპინძელთა დიდი უპირატესობით ჩაიარა - ქალებში თუ მამაკაცების ჩვეულებრივსა და საბრძოლო სამბოში ექვსი ოქრო მოიპოვეს. რუსების გარდა, გუშინ ოქროს მედლებს უკრაინა (2) და ბელარუსიც (1) დაეუფლნენ.
19 მაისს მოსკოვში ვაჟთაგან 57, 74 და 100-ის, ქალთაგან კი 52, 64 და 80-ის წარმომადგენლები იჭიდავებენ. ანუ ჩვენგან საჭიდაოდ უშანგი კუზანაშვილი (52), ბექა ბერულავა (74), მირიან პავლიაშვილი (100), შორენა შარაძე (64) და ირინა ლეონიძე (80) იასპარეზებენ.
"ვერცხლის დებიუტი" (იბეჭდება მცირე ცვლილებით)
ყოველდღიური სპორტული გაზეთი "ლელო"
