ორგზის ოლიმპიური თამაშების ჩემპიონის, ივან იარიგინის სახელობის მოსკოვის ორთაბრძოლების სპორტის სასახლეში სამბისტთა A კატეგორიის მე-12 საერთაშორისო ტურნირზე, მსოფლიოს თასის ეტაპზე, ქართველმა მოჭიდავე-სამბისტებმა სამი ოქროს, ოთხი ვერცხლისა და ერთი ბრინჯაოს მედალი მოიპოვეს.ტურნირის გამარჯვებულები არიან: მსოფლიოს წლევანდელი ჩემპიონი ლევან ნახუცრიშვილი (74 კგ), 2013 წლის საქართველოს ფალავანი ქართულ ჭიდაობაში პაატა ღვინიაშვილი (90) და მსოფლიოსა და ევროპის მრავალგზის პრიზიორი ნიკო კუცია (82). შინ ვერცხლის მედლებით დაბრუნდნენ: დიმიტრი მულაძე (52), კახა მამულაშვილი (74), ლაშა ზურაბიანი (82), ლაშა გურული (90); ბრინჯაოთი - დავით ლორიაშვილი (100).
ამ ტურნირით ჩვენმა სამბისტებმა წლევანდელი სპორტული სეზონი დახურეს.
გაბრიელ ბარჯაძე
ყოველდღიური სპორტული გაზეთი "ლელო"
