რომან რურუამ ჭიდაობის ფედერაციის პრეზიდენტობის სურვილი ოფიციალურად დააფიქსირა

საქართველოს ჭიდაობის ფედერაცია ახალი საპრეზიდენტო არჩევნების მოლოდინშია. მოგეხსენებათ, საანგარიშო ყრილობა 26 დეკემბერს ჩატარდება, სადაც, პარალელურად, ვადამდელი საპრეზიდენტო არჩევნებიც გაიმართება.

ფედერაციამ საპრეზიდენტო კამპანია 5 დეკემბერს გახსნილად გამოაცხადა, განაცხადების მიღება კი 20 დეკემბერს შეწყდება.

საარჩევნო კამპანია ახალი გახსნილია და ჯერჯერობით საპრეზიდენტო პოსტის დაკავების მსურველთა სიმცირეა - განცხადება მხოლოდ მსოფლიოს 4-გზის და ოლიმპიურმა ჩემპიონმა რომან რურუამ შეიტანა, რომელიც დღეისათვის სამეთვალყურეო საბჭოს თავმჯდომარეა.

სხვებს სურვილი ჯერ ოფიციალურად არ დაუფიქსირებიათ, თუმცა, კაცმა რომ თქვას, მსურველი არც ისე ბევრია. ამ პოსტის დაკავებაზე თანხმობა მხოლოდ ევროპის, მსოფლიოსა და ოლიმპიურმა ჩემპიონმა მანუჩარ კვირკველიამ გამოთქვა, თუმცა ყრილობის მოსამზადებელი ჯგუფისთვის განცხადებით ჯერ არც მას მიუმართავს. არ გამოვრიცხავთ, იყვნენ სხვა მსურველებიც და 20 დეკემბრამდე პრეტენდენტთა სია კიდევ გაიზარდოს.

ამასობაში გადაიდო საქართველოს ჩემპიონატი ბერძნულ-რომაულ ჭიდაობაში, რომელიც 15-16 დეკემბერს იყო დაგეგმილი.

სავარაუდოდ, ის თებერვლის ბოლოს ან მარტის დასაწყისში გაიმართება. საერთოდ, ახალი პრეზიდენტის არჩევამდე ნაკრებებში ყველანაირი აქტიურობა გამორიცხულია და ჩვენს გუნდებს პაუზა აქვთ აღებული.

ყოველდღიური სპორტული გაზეთი "ლელო"