ინდოეთის პროლიგის უცხოელებში ყველაზე ძვირად ვლადიმერ ხინჩეგაშვილი შეფასდა

იანვარში სტარტს აიღებს ახალი, მაგრამ უკვე საკმაოდ პოპულარული ინდოეთის საკლუბო ჩემპიონატი - პროლიგა, რომელშიც ამჯერად სამი ქართველი მიიღებს მონაწილეობას - ოლიმპიური, მსოფლიოსა და ევროპის ჩემპიონი ვლადიმერ ხინჩეგაშვილი (57), ევროპის ბრინჯაოსმედალოსანი იაკობ მაქარაშვილი (74) და ევროპის ვიცე-ჩემპიონი ელიზბარ ოდიკაძე (97).

თუმცა ვრცელდება ინფორმაცია და საკმაოდ სანდო წყაროებიდან, რომ დავით ტლაშაძეც (70) მიიწვიეს. ამის შესახებ ოფიციალურად არაფერს წერენ, მაგრამ გამორიცხული არც ეს ვარიანტია. ასე იმ შემთხვევაში ხდება, როცა რომელიმე მონაწილე უარს ამბობს ჭიდაობაზე, როგორც შარშან ჩვენმა მძიმეწონოსანმა გენო პეტრიაშვილმა გააკეთა - აუქციონზე კი იყიდეს, მაგრამ ოლიმპიადისთვის უკეთ მოსამზადებლად თავად იუარა იქ წასვლა.

ინდოელებმა წლევანდელ აუქციონზე 70 კილოგრამში ორი მონაწილე იყიდეს - რუსთა დაღესტნელი მსოფლიოს მოქმედი ჩემპიონი მაგომედ ყურბანალიევი და უზბეკი ბეხზოდ აბდურახმანოვი. ყურბანალიევი რომ უარს არ ამბობს და ნამდვილად მიდის ინდოეთში, ამას დაღესტნური სპორტულ-საჭიდაო საიტი - wrestdag.ru ადასტურებს. ეს საიტი საგანგებო წერილს უძღვნის ამ ფაქტს და აღნიშნავს, რომ ინდოეთის ლიგაში მათი ორი ფალავანი იჭიდავებს - ყურბანალიევი და კიდევ ერთი მსოფლიოს ჩემპიონი აბდუსალამ გადისოვი (97). ეს საკმაოდ ავტორიტეტული და სანდო საიტია, ანუ შეგვიძლია ვენდოთ. აქედან გამომდინარე, უნდა ვივარაუდოთ, რომ უზბეკმა იუარა იქ წასვლა და ამ შემთხვევაში მართლაც დასაშვებია, სათადარიგოებიდან ტლაშაძე მიეწვიათ.

შეგახსენებთ, რომ ამ ლიგის პირველი გათამაშება შარშან გაიმართა და მაშინაც მასში სამი ჩვენებური ჭიდაობდა - ხინჩეგაშვილი, ოდიკაძე და გიორგი საკანდელიძე (125).

ახალმა საკლუბო ტურნირმა იმთავითვე დიდი ინტერესი გამოიწვია, რადგან ინდოელებმა დიდი გამჭრიახობა და კარგი მარკეტინგული უნარი გამოავლინეს - დიდი ჰონორარები, ორგანიზაციის ძალიან მაღალი დონე და შოუს ელემენტები პროლიგის სავიზიტო ბარათად იქცა. აქ ყველაფერი ზუსტად ისე ხდებოდა, როგორც წამყვან ამერიკულ შოუებში - ყველა მონაწილე საჭიდაოდ სპეციალური განათების თანხლებით გადიოდა, ხოლო ფინალური ეტაპი სულაც გრანდიოზულ წარმოდგენად აქციეს. ოღონდ ეგაა, კლუბები მონაწილეებს აუქციონის წესით იძენენ და იქ მოხვედრა ყველას არ შეუძლია.

პროლიგა წლეულსაც იმავე პრინციპით გაიმართება, ანუ ისევ ექვსი კლუბი იქნება, რომლებიც კვლავაც აუქციონით არჩევენ მოჭიდავეებს. ლიგაში ისევ 24 ლეგიონერი იჭიდავებს - 24 ქალი და ამდენივე ვაჟი, კლუბებში კი კვლავაც რვა-რვა წონითი კატეგორიაა, რომლებიც, ლეგიონერებისა არ იყოს, ქალებსა და ვაჟებს შორის თანაბრადაა განაწილებული.

კლუბები ერთმანეთში წრიული სისტემით იჭიდავებენ, პრინციპით - "კედელი-კედელზე", ოთხი საუკეთესო კი ფინალურ ბლოკში გააგრძელებს ასპარეზობას.

ორგანიზატორებს კი სურთ, კლუბების რიცხვი რვამდე გაზარდონ, მაგრამ ქვეყანაში არსებული ეკონომიკური კრიზისი ჯერჯერობით ამ ამბიციური გეგმის განხორციელებას აფერხებს.

თუმცა ერთი პერიოდი საერთოდ ამ ლიგის გამართვა დადგა დღის წესრიგში - ჭიდაობის გაერთიანებულმა მსოფლიოს ფედერაციამ მკაცრად დაუქნია თითი ეროვნულ ფედერაციებს და დიდი ფინანსური სანქციებით დაემუქრა, თუ მათი სპორტსმენები ამ გათამაშებაში მიიღებდნენ მონაწილეობას. როგორც კულუარულად ამბობენ, ამის მიზეზი ფინანსური უთანხმოება იყო - მსოფლიოს ფედერაცია დიდ გადასახადს სთხოვდა ინდოეთის ფედერაციას, რომელიც ამაზე უარს იყოო.

კიდევ ვიმეორებთ - ეს კულუარული ხმებია, თუმცა მსოფლიოს ფედერაციის მადას თუ გავიხსენებთ, სულაც არაა გამორიცხული, ფულის სუნი მართლაც იყნოსეს. ერთი სიტყვით, საკმაოდ სარწმუნო ვერსია ჩანს, მაგრამ მთავარი ისაა, რომ საბოლოოდ გაუგებრობა აღმოიფხვრა და უცხოელებს დართეს ინდოეთში ჭიდაობის ნება.

ინდურ ლიგაში ორგანიზატორებმა ამჯერადაც დაასახელეს კანდიდატები, რის შემდეგაც აუქციონი გაიმართა და გამოვლინდა 24 უცხოელი მონაწილე. ჩვენდა საამაყოდ, მათ შორის ყველაზე ძვირად ღირებული ხინჩეგაშვილი აღმოჩნდა, ვინც 70 580 დოლარად შეისყიდეს. ეს ძალზე მნიშვნელოვანი ფაქტია, რადგან ჰონორარი პირდაპირაა დამოკიდებული მოჭიდავის სასტარტო ღირებულებაზე. თუმცა ამ თანხის 20 პროცენტი საგადასახადოს მიაქვს, 10 პროცენტი კი მენეჯერებს მიაქვთ.

ხინჩეგაშვილის ასე ძვირად დაფასება ჩვენთვის საამაყო იმიტომაცაა, რომ ლიგაში სხვა ტიტულოვანი ათლეტებიც გამოდიან: აზერბაიჯანელთა ოლიმპიური ჩემპიონი ტოგრულ ასკაროვი (65), იგივე გადისოვი, ყურბანალიევი და სხვები.

დანარჩენი ჩვენებურებიდან ოდიკაძის ფასი 37 500 დოლარია, მაქარაშვილი კი 14 705-ად შეიძინეს.

24 ლეგიონერიდან ხინჩეგაშვილის შემდეგ ყველაზე ძვირად ღირებული სწორედ ყურბანალიევია - 69 117 დოლარი, მესამე - აზერბაიჯანელი ევროპის ჩემპიონი ჯაბრაილ ჰასანოვი (74) - 63 235. მას თანაგუნდელი ასკაროვი მოსდევს - 51 470 დოლარი, ოდიკაძე კი მეხუთეა. რაოდენ გასაკვირიც უნდა იყოს, გადისოვის ფასი მხოლოდ 29 411 დოლარია.

პროლიგის გათამაშება 12-19 იანვარს დელიში გაიმართება.

ხინჩეგაშვილი გუშინ, გამთენიისას გერმანიაში გაფრინდა, სადაც 30 დეკემბერს იქაურ ბუნდესლიგაში ნახევარფინალის განმეორებით შეხვდრაში, საშინაო შეხვედრაში თავის კლუბ "აალენს" დაეხმარება "ისპრინგენის" წინააღმდეგ, ნაახალწლევს კი გერმანიიდან გადაფრინდება ინდოეთში. გერმანიაში მასთან ერთად ბექა ბუჯიაშვილიც (57) გაემგზავრა, ვინც ხინჩეგაშვილს სპარინგ-პარტნიორობას გაუწევს.

(იბეჭდება მცირე ცვლილებით)
ყოველდღიური სპორტული გაზეთი "ლელო"