თენგიზ გაჩეჩილაძე სოჭიდან: სასწაული არ ხდება [VIDEO]

ოლიმპიური სოჭის ზამთრის სპორტის სასახლე "აისბერგი" 20 თებერვალს, საღამოს, ფიგურულ ციგურაობაში ფინალისტ ქალთა ასპარეზობას მასპინძლობდა - 24 საუკეთესო, რომელიც წინა დღეს ფინალში მოკლე პროგრამიდან გავიდა, ახლა თავისუფალი პროგრამით წარდგა მაყურებლისა და არბიტრების წინაშე.

მიუხედავად იმისა, რომ ფავორიტების შესაძლებლობები ცნობილი იყო, ვერავინ ივარაუდებდა, ორი დღის შედეგების შეჯამებით, ვის შორის განაწილდებოდა ადგილები ოლიმპიადის საპატიო კვარცხლბეკზე.

ელენე გედევანიშვილი ფინალისტთა ოთხი ჯგუფიდან (6-6 მონაწილე თითოეულში) მეორეში მოხვდა და თავის ჯგუფში ასევე მეორე, საერთოდ კი, მერვე გავიდა ყინულზე.

ფაქტობრივად, სერიოზული ბრძოლა პირველობისათვის მეორეჯგუფელთა გამოსვლით დაიწყო.

ტელევიზიით ნახეთ, ალბათ, ელენე მომდევნო მონაწილეების გამოსვლამდე მესამე ადგილზე იყო. მერე და მერე გაძლიერდა კონკურენცია.

იგრძნობოდა, რომ მეტოქეები მაღალი ქულების მოპოვებას შეიძლება ოდნავი, მაგრამ განსხვავებული რთული ილეთების მაღალი ოსტატობის შესრულებით ცდილობდნენ. პროგრამის გართულება გამართლებაზეა, ზოგს გაუმართლა, ზოგს - არა.

ჩვენს სპორტსმენს საპრიზო ადგილზე პრეტენზია არ უნდა ჰქონოდა და არც ჰქონია, მაგრამ ათეულში მოხვედრაც არ იყო იოლი მისაღწევი. აკი ელენე მხოლოდ მე-19 ადგილს დასჯერდა (147.15 ქულა). სასწაული არ ხდება.

საპატიო კვარცხლბეკზე ადგილები ასე განაწილდა: პირველი, ადელინა სოტნიკოვა (რუსეთი) - 224.59 ქულა; ვერცხლის მედალი წილად ხვდა კორეელ იუნა კიმს (კორეა) - 219.11; მესამე იყო კაროლინა კოსტნერი (იტალია) - 216.73.

შეგახსენებთ, რომ ვანკუვერში გამართულ ოლიმპიადაზე ელენე გედევანიშვილი მე-14 ადგილზე გავიდა.

აქვე გეტყვით, რომ 21 თებერვალს სლალომში ძალებს ნინო წიკლაური ცდის. ასპარეზობა ჩვენი დროით 16:45 საათზე დაიწყება.

სოჭის ოლიმპიადაზე "ლელოს" ცხელი ხაზის ტელეფონია: +7938 43 99 565.

ყოველდღიური სპორტული გაზეთი "ლელო"