ძიუდოს ფედერაციის პრეზიდენტი არ ადასტურებს ინფორმაციას, რომ ნაკრების მწვრთნელმა ძიუდოისტს ფიზიკური შეურაცხყოფა მიაყენა

ძიუდოს ფედერაციის პრეზიდენტი გიორგი ათაბეგაშვილი არ ადასტურებს ინფორმაციას, რომ ნაკრების მწვრთნელმა ძიუდოისტს ფიზიკური შეურაცხყოფა მიაყენა.

როგორც „ინტერპრესნიუსს“ ძიუდოს ფედერაციის პრეზიდენტმა განუცხადა, გავრცელებული ინფორმაცია, რომ საქართელოს ნაკრების წევრებს შორის, მინსკიდან თბილისში დაბრუნების დროს, თვითმფრინავში ინციდენტი მოხდა, სიმართლეს არ შეესაბამება. მისი თქმით, ადგილი ჰქონდა მხოლოდ დისციპლინარულ გადაცდომას.

„ეს ინფორმაცია არასწორად გავრცელდა. უბრალოდ, უკან დაბრუნების დროს იქ იყო დისციპლინარული გადაცდომა, ალკოჰოლის ზედმეტი დოზირებით მიღება, ეს იყო და ეს, მეტი არაფერი. მცირე გაუგებრობა იყო და ამაზე მეტი არაფერი ყოფილა. რაც შეეხება ამ საქციელს, რასაც ჰქვია დისციპლინარული გადაცდომა, ამ საკითხთან დაკავშირებით ჩვენ უახლოეს მომავალში გვექნება სხდომა და რა სახის სანქცია იქნება გაცემული ჩვენი მხრიდან, ამას უკვე სხდომაზე გადავწყვეტთ. ჩვენ ვთვლით, რომ არ უნდა მიეღოთ ის ალკოჰოლი, რაც მათ მიიღეს და მხოლოდ ამაზე გვექნება საუბარი“, - აღნიშნა „ინტერპრესნიუსთან“ ათაბეგაშვილმა.

მისივე თქმით, ეროვნული ნაკრების რამდენიმე წევრს ალკოჰოლი ჰქონდა მიღებული, ხოლო იყვნენ ეს მწვრთნელები თუ ძიუდოისტები, ამაზე ძიუდოს ფედერაციის პრეზიდენტმა კომენტარი არ გააკეთა.