ძიუდოისტების იმედი ოლიმპიადაზე - "ქართველი დარია ბილოდიდი" - ეთერ ასკილაშვილს გორისთვის კიდევ ერთი ოლიმპიური ოქრო სურს [PHOTOS]

26 ივლისიდან ოლიმპიადა იწყება. პირველივე დღეს საქმეში ძიუდოისტები ჩაერთვებიან. მათგან მუდამ მაღალი მოლოდინები გვაქვს, რასაც არ გვიცრუებენ. 

საქართველოს ძიუდოისტთა ნაკრებმა მსოფლიოს ჩემპიონატზე ისტორიული შედეგებით გაგვახარა. ინდივიდუალურ წარმატებებთან ერთად, ერთ-ერთი ყველაზე გამოსარჩევი ის იყო, რომ გუნდურ შეჯიბრებაში მედალი დიდხნიანი პაუზის შემდეგ მოვიპოვეთ. შერეული გუნდით (კაცთა და ქალთა) გამოსვლის შემდეგ, მაღალი ადგილებისთვის ბრძოლა გვიჭირდა, ახლა მედალს დავეუფლეთ...



ეთერ ასკილაშვილშვილში (-63 კგ) დიდ მონდომებას ვხედავდით, ერთი წამითაც არ ნებდება და ისიც გამოჩნდა, ფიზიკურად მშვენივრადაა მომზადებული. თუ დღეს ქართველი ქალი ძიუდოისტებიდან ეთერ ლიპარტელიანს უფრო იცნობენ, მის სეხსიასაც დიდი მომავალი უნდა ვუწინასწარმეტყველოთ. ამისთვის მას ჯერ კიდევ ბევრის გაკეთება მოუწევს.

ეთერ ასკილაშვილი (-63 კგ) ოლიმპიადაზე 30 ივლისს იასპარეზებს.

ასკილაშვილი გორში დაიბადა. ამ ქალაქში ძიუდო განსაკუთრებით უყვართ და ბევრი წარმატებაც აქვთ. ეთოს თანაგუნდელი ხომ ლაშა შავდათუაშვილია - კაცი, რომელმაც ყველაფერი მოიგო და საერთაშორისო ძიუდოს ერთ-ერთი თილისმაა. ეთომ ვარჯიში 13 წლის ასაკში დაიწყო და პირველ მწვრთნელს, ვეფხია ბაზანდარაშვილს ძალიან ემადლიერება.



ეთერი საქართველოს ჩემპიონია, თუმცა ყველაფერი ასე მარტივად არ დაწყებულა:

"როცა ქვეყნის პირველობაზე პირველად ვიასპარეზე, დავმარცხდი. ამან კიდევ უფრო მოტივირებული გამხადა. მეტი უნდა მევარჯიშა და მომენდომებინა, თუკი მაღალი მიზნების მიღწევა მსურდა. თანაც, ძალიან დიდი მოტივაცია და სპორტული ჟინი მამოძრავებდა - ეროვნულ ნაკრებში უნდა მოვხვედრილიყავი. ზოგჯერ მტკივნეული მარცხი წარმატების გზაზე იქნებ აუცილებელიც კი იყოს!.."

ასკილაშვილი ძალიან გახარებული იყო, რადგან გუნდურ ასპარეზობაში საქართველომ მედალი 8-წლიანი პაუზის შემდეგ მოიპოვა:

"ეს ახალი ისტორიაა და ბედნიერებაა, მისი მონაწილე რომ ვარ. კარგად იგრძნობოდა, თითოუელ ჩვენგანს გამარჯვების რამხელა სურვილი გვამოძრავებდა. ინდივიდუალურ ასპარეზობაში ხომ ისტორიული შედეგები ვაჩვენეთ და ამან განწყობა აგვიმაღლა. ვიცოდით, ოლიმპიადისთვის მნიშვნელოვანი ქულების მოპოვება რომ შეგვეძლო. სამოტივაციო სიტყვები ფედერაციის ხელმძღვანელებმა, გიორგი ათაბეგაშვილმა და  დავით ქევხიშვილმაც გვითხრეს."



ოლიმპიადაზე 20 წლის ძიუდოისტისტისთვის მთავარი მონაწილეობა კი არა, მაღალი მიზნებისკენ სწრაფვაა. ეთოს ოცნებაა, საკუთარ ქალაქსა და ქვეყანას კიდევ ერთი ოლიმპიური ოქროს მედალი მოუპოვოს. ეს ხომ საქართველოში ქალთა ძიუდოს პოპულარიზებას ძალიან დიდ სამსახურს გაუწევს. ის პირად მწვრთნელს, მარიამ მახარაშვილს მადლობას უხდის და საქართველოს ნაკრებში არსებულ ვითარებაზე გვიყვება:

"გია თენაძე და კახა მოცრაძე - ქალთა ნაკრების მწვრთველები თავიანთ საქმეს იდეალურად უძღვებიან. მათ ნდობისთვის მადლობას ვეუბნები, ისევე როგორც ეროვნული ნაკრების მთავარ მწვრთველს, ლაშა გუჯეჯიანს. მათი დამოკიდებულებები და თანადგომა უფრო თავდაჯერებულსა და მიზანსწრაფულს მხდის.



წარმოიდგინეთ, რამხელა ბედნიერება და ამავდროულად, დამატებითი მოტივაციაა, როცა ოლიმპიურ ჩემპიონებთან, მსოფლიო ჩემპიონებთან და სხვადასხვა ტიტულების მქონე სპორტსმენებთან ერთად გუნდურ ასპარეზობაში გამოდიხარ.
ისინი თავმდაბალი, მეგობრული ადამიანები არიან. ყოველთვის გრძნობ, რამხელა მხარდაჭერას გამოხატავენ. მომავალში ერთად ისევ დიდ გამარჯვებებს მოვიპოვებთ."

20 წლის ძოუდოისტი კმაყოფილია, რომ ისეთ საზოგადოებრივ წრეში უწევს ცხოვრება, სადაც სპორტის ამ სახეობის წარმომადგენლებს განსაკუთრებულ პატივს სცემენ და აფასებენ. იცის, რომ დიდი შედეგებისთვის ბევრი რამის დათმობა მოუწევს. ეთერი სოციალურ ქსელებში საკმაოდ პოპულარულია. ერთ-ერთმა გულშემატკივარმა "ქართველი დარია ბილოდიდიც" კი შეარქვა. უკრაინელ მსოფლიოსა და ევროპის ჩემპიონსა და ოლიმპიური თამაშების ბრინჯაოსმედალოსანს ხომ "ძიუდოს დედოფალს" უწოდებენ. სხვათა შორის, ეთერ ლიპარტელიანს ის თბილისის გრანდ სლემზე დამარცხებული ჰყავს. ასკილაშვილის მთავარი მიზანი სწორედ ისაა, უკრაინელის მსგავსი წარმატებული კარიერა ჰქონდეს!..

წერილი ძიუდოისტებს - მადლობა, რომ გვაძლევთ შესაძლებლობას ვიამაყოთ

ისტორიული დღე! საქართველოს ნაკრები გუნდურ შეჯიბრში მესამე ადგილოსანია