ევრო 2016-ის ამბები: საფრანგეთი ცნობილია

საფრანგეთის ნაკრების თავკაცმა დიდიე დეშამმა ევრო 2016-ის შემადგენლობა დაასახელა. სიაში ვერ მოხვდა "მანჩესტერის" ნახევარმცველი მორგან შნეიდერლენი, ის სარეზერვო ფეხბურთელთა შორისაა.

სიაში არ არის "ბაიერნის" ნახევარმცველი ფრანკ რიბერი, რომელმაც ბოლოს გადაწყვეტილება შეცვალა და ნაკრებში დაბრუნება ითხოვა. რა თქმა უნდა, სიაში არაა ქარიმ ბენზემა, რომელიც გუნდიდან გაურკვეველი ვადითაა მოკვეთილი.

შემადგენლობაში ვერ მოხვდა "ბორდოს" მცველი მატიო დებიუში, მაგრამ ამ შემთხვევაში, მიზეზი სხვაა - დებიუშიმ ახლახან ტრავმა მიიღო. მას გამოსაჯანმრთელებლად რამდენიმე კვირა სჭირდება, ევროპის ჩემპიონატი კი კარსაა მომდგარი.

მეკარეები: ლორისი, მანდანდა, კოსტელი
მცველები: ვარანი, კოშელნი, სანია, ევრა, მანგალა, მატიო, ჟალე, დინი
ნახევარმცველები: პოგბა, მატუიდი, ლ. დიარა, სისოკო, კანტე, კაბაი
ფორვარდები: გრიზმანი, მარსიალი, ჟირუ, პაიე, კომანი, ჟინიაკი.

ცნობილი გახდა ევრო 2016-ზე ბელგიის ნაკრების წინასწარი შემადგენლობა. მარკ ვილმოტსის გადაწყვეტილება ბელგიის საფეხბურთო ასოციაციის "ტვიტერის" გვერდზე გამოქვეყნდა. ბელგიელებს ევროპის ჩემპიონატზე ედენ აზარი უკაპიტნებს.

"კომპანის ტრავმა დიდი დარტყმაა ჩემი გუნდისთვის. ის ნამდვილი ლიდერია და მალე გამოჯანმრთელებას ვუსურვებთ. ჩვენ კი წინ უნდა წავიდეთ, მომავალზე უნდა ვიფიქროთ", - განაცხადა ვილმოტსმა.

მეკარეები: კურტუა, ჟილე, მინოლე
მცველები: ალდერვეირელდი, ბოიატა, დენაიერი, ლომბერტსი, ენგელსი, ჯ. ლუკაკუ, მენიე, ვერმალენი, ვერტონგენი
ნახევარმცველები: მ. დემბელე, ფელაინი, ნაინგოლანი, ვიტსელი, ფერეირა-კარასკო, დე ბრუინი, მერტენსი
ფორვარდები: ბატშუაი, ბენტეკე, აზარი, რ. ლუკაკუ, ორიჯი.

ევროპის ჩემპიონატს შესაძლოა, კიდევ ერთი ვარსკვლავი გამოაკლდეს - "ონდა სეროს" ინფორმაციით, "ჩელსის" ფორვარდ დიეგო კოშტას ფეხის ტრავმა აქვს, რომელიც უფრო სერიოზული გამოდგა, ვიდრე თავიდან ეგონათ.

ამ ტრავმის გამო კოშტამ უკვე გამოტოვა "ლივერპულთან" შეხვედრა და ესპანელი არც პრემიერლიგის ბოლო ტურში იქნება. გადაუმოწმებელი ცნობით, კოშტა ესპანეთის ნაკრების წინასწარ შემადგენლობაში არ იქნება. დიეგო კოშტამ ამ სეზონში 28 მატჩში 12 გოლი გაიტანა და 6 საგოლე პასი გააკეთა.

ყოველდღიური სპორტული გაზეთი "ლელო"