PREVIEW: ჩრდილოეთი მაკედონია - საქართველო

უეფას ერთა ლიგის მეოთხე ტურში ჩრდილოეთ მაკედონიის ეროვნული ნაკრები საქართველოს დაუპირისპირდება. შეხვედრა დღეს, თბილისის დროით 22:45 საათზე დაიწყება.

როგორც მოგეხსენებათ, ევროპირველობის პლეი-ოფის ფინალურ რაუნდში ერთმანეთს სწორედ ეს გუნდები შეერკინებიან. შესაბამისად, დღევანდელ მატჩს, სატურნირო მდგომარეობის გარდა, პრინციპული თვალსაზრისით დიდი მნიშვნელობა აქვს.

C დივიზიონში საკმაოდ დაძაბული ვითარებაა. 3 ტურის შემდეგ 5-5 ქულით პირველ ორ პოზიციას დღევანდელი მეტოქეები ინაწილებენ, მე-3 ადგილზე კი სომხეთის ეროვნული ნაკრებია (4). 

მასპინძლების სათამაშო ფორმა ოპტიმალურია. ოფიციალური შეხვედრების ეგიდით "წითელი ლომები", აგერ, უკვე 5 მატჩია დაუმარცხებლად ასპარეზობს. დროის ამ პერიოდში მათ 9 გოლი გაიტანეს, საპირისპიროდ კი 6 გაუშვეს. გასულ ტურში, იგორ ანგელოვსკის ბიჭებმა ესტონეთთან გადახალისებული შემადგენლობით იასპარეზეს და წაგებას გადაურჩნენ. გუნდმა ორბურთიანი დეფიციტი მატჩის უკანასკნელ 10 წუთში აღმოფხვრა და მნიშვნელოვანი ქულა მოიპოვა.

მაკედონიელთა დანაკლისი საკმაოდ სოლიდურია. მასპინძლებს "ჯვაროსნების" წინააღმდეგ ესპანური "ლევანტეს" ჩამშლელი ენის ბარდი ვერ დაეხმარება, რომელსაც დისკვალიფიკაცია აქვს. მასთან ერთად ვერ ითამაშებს "ნაპოლის" ფეხბურთელი ელიფ ელმასიც. 

საქართველოს ეროვნული ნაკრების შემთხვევაში, ამ მხრივ, სერიოზული პრობლემებია. შესაბამის მიზეზთა გამო სტუმრებს პრინციპულ შეხვედრაში ერთბაშად შვიდი ფეხბურთელი გამოაკლდათ. ჯაბა კანკავამ სომხებთან მიღებული ყვითელი ბარათის გამო გაფრთხილებათა დასაშვებ ლიმიტს გადააჭარბა და დღეს გუნდს ტრიბუნიდან უგულშემატკივრებს. ოთარ კაკაბაძე, გურამ კაშია და გიორგი აბურჯანია კი ტრავმის გამო იუქმებენ. ლაზარეთს შეუერთდა თორნიკე ოქრიაშვილიც, რომელიც მატჩისწინა ვარჯიშზე დაშავდა.

მიუხედავად ამისა, სომხეთის წინააღმდეგ სლოვაკი სპეციალისტის შეგირდებმა დაამტკიცეს, რომ თამაში კარგად გამოსდით. გუნდმა, პრაქტიკულად, "მეორე შემადგენლობით" ითამაშა, თუმცა მეტოქეს საკმაოდ ორგანიზებული და შემტევი ფეხბურთი დაუპირისპირა. 

ორივე გუნდი აღნიშნულ დაპირისპირებას ძალიან სერიოზულად განიხილავს. სიმბოლურია, რომ გასულ ტურში როგორც ჩრდილოეთ მაკედონიამ, ისე საქართველოს ეროვნულმა ნაკრებმა ძირითადი თერთმეტეულის მოთამაშეები დაასვენა, რათა დღევანდელ შეხვედრაში უნარების რეალიზება 100%-ით მოახერხონ.

სავარაუდო შემადგენლობები

ჩრდილოეთი მაკედონია: სისკოვსკი - ველკოვსკი, ბეითულაი, ალიოსკი, რისტოვსკი - ადემი, ნიკოლოვი, ელმასი, ტრაიკოვსკი - პანდევი, ნესტოროვსკი.

საქართველო: ლორია - დვალი, გრიგალავა, კვირკველია, ჯიღაური - კვეკვესკირი, დაუშვილი - შენგელია, გვილია, კვარაცხელია - ყაზაიშვილი.

საინტერესო ფაქტები

• ჩრდილოეთი მაკედონია საკუთარ არენაზე სტაბილურად კარგად თამაშობს. გუნდმა სკოპიეში ჩატარებული უკანასკნელი 12-დან 10 დაპირისპირება მოიგო. საინტერესოა, რომ 6 შეხვედრაში ანგელოვსკის შეგირდებმა პირველი გოლი მატჩის პირველ მეოთხედში გაიტანეს.

• ბალკანელებმა შინ ჩატარებული ბოლო 4-ივე მატჩი წარმატებით დაასრულეს. საგულისხმოა, რომ უკანასკნელ 3 შემთხვევაში მატჩთან ერთად, პირველი ტაიმიც მოიგეს.

• მასპინძლებმა საკუთარ არენაზე პირველი ტაიმი ბოლოს 2016 წელს, ესპანეთის ეროვნულ ნაკრებთან დათმეს.

• საქართველოს 4-მატჩიანი წაუგებელი სერია აქვს (2მ, 2ფ).

• ერთა ლიგის ეგიდით, "ჯვაროსნებმა" უკანასკნელი 10-დან 9 შემთხვევაში მატჩში პირველი გოლი გაიტანა.

ვაისი: გამარჯვების მოსაპოვებლად და პირველ ადგილზე გასასვლელად ვიბრძოლებთ

ანგელოვსკი: საქართველოსთან ხვალინდელი მატჩისთვის ვემზადებით და არა ერთი თვის შემდგომისთვის

პანდევი: რიტმი ჯოჯოხეთურია - საქართველოსთან გამარჯვებისთვის თავს არ დავზოგავთ