30 აგვისტოს საქართველოს ნაკრები უახლოესი შეხვედრებისთვის მზადებას იწყებს. დრო, როგორც ყოველთვის, ცოტაა - პირველი მატჩი 2 სექტემბერსაა.ხვიჩა კვარაცხელიას დანაკლისმა გულშემატკივრები საკმაოდ აანერვიულა, თუმცა ლიდერების გარეშე თამაში ნებისმიერ გუნდს შეიძლება მოუწიოს და ასეთ დროს წინასწარი ნეგატიური ფიქრები სწორი ნამდვილად არაა. ვილი სანიოლს სხვა საკადრო დეფიციტიც, თუნდაც ცენტრალური მცველების, აქვს. მსგავს საკითხებზე ფრანგი სპეციალისტი თავიდანვე რომ ფიქრობდა, ამას მისი როტაციითა და დებიუტანტებზე დაყრდნობით ვხვდებოდით.
მთავარია, არსებული კონტინგენტი მაქსიმალურად ნაყოფიერად გამოვიყენოთ. წინ სამი შეხვედრაა და ცვლილებები აუცილებლად იქნება.
მეკარეები
საქართველოს ნაკრების ამ რგოლში
ძირითადი მეკარის ცნება თითქმის ყველა გუნდში არსებობს და ამ სტატუსს ჩვენს ნაკრებში გიორგი ლორია ატარებს. "ანორთოსისის" კიპერს კორონავირუსის გამო გარკვეული პერიოდი გაუცდა, ამის შემდეგ კი მშვენივრად დაბრუნდა - მეკარის გაძევების გამო თამაშში მოულოდნელად (როგორც თავად განაცხადა) ჩართულმა თერთმეტმეტრიანის მოგერიება შეძლო. გიორგი კონფერენს ლიგის მატჩებში ძალიან დამაჯერებელი იყო და თემურ ქეცბაიას გუნდის ჯგუფში მოხვედრას ხელიც შეუწყო.
როცა ნაკრებში "ვალენსიას" ძირითადი კიპერი გყავს, რომელსაც მშვენიერი პრესა აქვს, მისი სათადარიგოთა შორის ყოფნა შესაძლოა, უცნაურად ჩანდეს. განვლილ თამაშებში სანიოლის როტაციისადმი დამოკიდებულებით თუ ვიმსჯელებთ, ოფიციალური მატჩებიდან ერთ-ერთში "ჯვაროსნების" კარი მამარდაშვილს რომ ანდოს. ამაში გასაკვირი არაფერი იქნება. საინტერესოა, ეს ესპანეთში გასამართ შეხვედრაში ხომ არ მოხდება?!
ცენტრალური მცველები
საქართველოს ნაკრების დაცვას რამდენიმე ისეთ ფეხბურთელი აკლია, სასტარტო შემადგენლობაში თამაშის პრეტენზიას რომ აცხადებენ (კვირკველია, დვალი, ტაბიძე). თუმცა აქ მაინც ნაკლები პრობლემაა.
შესაძლოა, ბევრი მოთამაშე ისე კარგად ნამდვილად ვერ მოერგოს ახალ კლუბს, როგორც დავით ხოჭოლავა. "კოპენჰაგენის" მცველი აბსოლუტურად ყველა კომპონენტში გამორჩეულია და გუნდის ერთ-ერთი წამყვანი მოთამაშეც გახდა. მას წინა პერიოდში თუ რამე დააკლდა, სწორედ "შახტარში" მცირე სათამაშო პრაქტიკისას. ახლა ეს პრობლემა აღარ არსებობს, დათა მოედანზე, უბრალოდ, ბრწყინავს.
გურამ კაშია უკვე ვეტერანია. ამიტომ ვლადიმირ ვაისი "სლოვანში" დასვენების საშუალებასაც აძლევს. გურამი საქართველოს ნაკრებში მნიშვნელოვანი ფეხბურთელია - კომუნიკაცია და დაცვის "დალაგება", რა თქმა უნდა, ყველაზე უკეთ გამოდის.
სავარაუდოდ, სანიოლი ამხანაგურ შეხვედრებში ახალ ფეხბურთელებს დაეყრდნობა, რაც ლუკა ლოჩოშვილის სადებიუტო შანსებს ზრდის. 23 წლის მოთამაშე "ვოლფსბერგერის" ძირითადი შემადგენლობის წევრია. ავსტრიაში ბევრი გოლი გადის და ლუკას გუნდს 6 მატჩში საკუთარ კარში 11 გოლი აქვს მიღებული (ერთ-ერთი ოთარ კიტეიშვილისგან). ამიტომ, მხოლოდ ამ მაჩვენებლით მასზე ვერ ვიმსჯელებთ, სხვადასხვა ასპექტზე დაკვირვებაა საჭირო.
ფლანგები
საქართველოს ნაკრებში ვილი სანიოლის დანიშვნამდე "ჯვაროსნებში" მარცხენა მცველის პოზიციაზე უამრავი მოთამაშე, ძირითადად, სხვადასხვა ამპლუის, გამოიცადა. ფრანგმა მთავარმა მწვრთნელმა ამ რგოლში კონკურენციაც კი ჩამოაყალიბა.
გურამ გიორბელიძეს გერმანიაში გადასვლის შემდეგ განაცხადში შეყვანასთან დაკავშირებულ გარკვეულ პროცედურებში საკმაოდ დიდი დრო გავიდა, რის გამოც მას სათამაშო პრაქტიკა აკლია, თუმცა გურამის შესაძლებლობებში ეჭვი არავის ეპარება.
ნაკრებში ამ პოზიციაზე ირაკლი აზაროვიცაა - ის ჯერ გამოცდილი არაა, თუმცა ძალიან დამაჯერებელი, სწრაფი და შეტევაზე ორიენტირებული ფლანგელია, რომელმაც თავისი ძალა ბათუმის "დინამოს" ევროტურნირების შეხვედრების მიმდინარეობისასაც დაამტკიცა...
ოთარ კაკაბაძეს, მარტის შეხვედრების მსგავსად, სათამაშო დროის პრობლემა ამჯერად "კრაკოვიაში" აქვს, თუმცა მისი გამოცდილებისა და ფლანგზე გამუდმებული შეტევების შესაძლებლობებზე კარგად ვიცით და ეს "ფურია როხასთან" თბილისურ მატჩშიც (1:2) გამოჩნდა.
გრიგოლ ჩაბრაძემ ვილი სანიოლის დავალებებს ალღო მაქსიმალურად სწრაფად აუღო. ის უფრო დაცვით ფაზაშია გამორჩეული. იმავე კაკაბაძისგან განსხვავებით, შეტევაში იმდენად ეფექტური არაა, თუმცა შეცდომები მინიმუმამდე დაჰყავს. ვინ როგორ შეხვდება კონკრეტულ მატჩს, ამას სამწვრთნელო შტაბი დააკვირდება...
ნახევარდაცვა
სანიოლის გუნდის ნახევარდაცვას გამორჩეული შემოქმედებითი ფეხბურთელი - ოთარ კიტეიშვილი ჰყავს. როგორც ავსტრიის ჩემპიონატში, ასევე ევროპა ლიგაზე "ათიანის" თამაში ძალიან ეფექტური იყო. ოთარზე დაყრდნობა შუა ხაზის არაერთ პოზიციაზე შეიძლება, თუმცა ყველაზე შედეგიანი მაინც გამთამაშებლად ჩანს.
კაპიტანი ჯაბა კანკავა ყოველთვის შემართულია. მის ბრძოლისუნარიანობაზე "სლოვანის" გულშემატკივრები ბევრს, თუმცა ჩვენთვის ნაცნობს წერენ: "არ გვჯერა, რომ 35 წლისაა" - ამ ფრაზით ბევრი რამაა ნათქვამი.
გიორგი აბურჯანიას ტრავმის შემდეგ "ჟილ ვისენტეში" ეტაპობრივად ტვირთავენ. ამიტომ ის 90 წუთის სათამაშოდ ჯერ მზად არაა. მურთაზ დაუშვილისც საკმაოდ ბევრი გაუცდა, დაბრუნების შემდეგ კი მხოლოდ 1 ოფიციალური მატჩი გამართა, სადაც მისი "აპოელი" მწარედ (0:4) დამარცხდა.
ნაკრებში ბათუმის "დინამოს" ნახევარმცველები არიან, რომელთაც ევროტურნირებმა გარკვეული გამოცდილება შესძინა - სანდრო ალთუნაშვილსა და ვლადიმერ მამუჩაშვილს შანსები უნდა მიეცეთ და ვნახოთ, ამას ისინი რამდენად კარგად გამოიყენებენ.
შეტევა
საქართველოს ნაკრებში კვარაცხელიას არყოფნაში სანიოლს ჩვენი მოთამაშეების შეტევაში გადანაწილების სხვადასხვა ვარიანტი აქვს.
საბა ლობჟანიძე წარმოუდგენლად მაგარ ფორმაშია და მარჯვენა ფლანგიდან კოსოვოს ნაკრებს დიდი პრობლემები უნდა შეუქმნას. გვახსოვს, როგორ ეხმარებოდა ის მცველებს, რათა ხორდი ალბას ფლანგური ჩართვები შეეჩერებინა. ამით წინა ხაზზე საბას პროდუქტიულობა მოაკლდა, თუმცა სხვაგვარად წარმოუდგენელი იქნებოდა. "ჰათაისპორის" მოთამაშე ფანტასტიკურად გამოიყურება. ასეთივეა მისი გოლებიც! ახლა მისი შემოქმედებითი რესურსების მაქსიმალურად გამოყენებაა საჭირო.
ვაკო ყაზაიშვილი - მას სამხრეთ კორეის ჩემპიონატსა და აზიის ჩემპიონთა ლიგაზე ბევრი რამ ლამაზად და ამავდროულად, შედეგიანად გამოსდის. ვაკოს ტიპის ფეხბურთელს ნებისმიერ წამს აფეთქება და რაღაც განსაკუთრებულის შექმნა შეუძლია. მისთვის სწორი პოზიციის შერჩევა სანიოლისთვის კიდევ ერთი გამოწვევა იქნება.
ხვიჩას არყოფნაში მარცხენა შეტევის პოზიცია ვაკანტური ჩანს და იქნებ ის სწორედ "ულსანის" ფეხბურთელმა შეავსოს, მაგრამ ოთარ კიტეიშვილის მსგავსად, ყაზაიშვილი უფრო ეფექტური მაინც მინდვრის სიღრმიდან თამაშისასაა.
გიორგი ჩაკვეტაძის საქართველოს ნაკრებში ნათამაშებ შეხვედრებს რომ ვიხსენებთ, სულ ისეთ ფორმაში გვინდა ვიხილოთ. მას ახლა მაქსიმალურად მეტი სათამაშო დრო სჭირდება, რასაც, სამწუხაროდ, "გენტის" მთავარი მწვრთნელისგან ვერ იღებს. იქნებ "ჯვაროსნების" უახლოესი შეხვედრები იყოს ის, რაც გიორგის ახალ ენერგიას მისცემს და კლუბსაც დაანახებს, რომ მისთვის მეტი ნდობაა საჭირო.
გიორგი წიტაიშვილის განაცხადში დამატებამ გულშემატკივრებს გუნდის ლიდერის არყოფნა ცოტათი მაინც შეუმსუბუქა. გიორგის ახლა შანსი ეძლევა, რათა საქართველოს ნაკრების სტაბილურ წევრად ჩამოყალიბდეს. წიტაიშვილი მსოფლიოს ჩემპიონია და ამით ბევრი რამაა ნათქვამი.
საქართველოს ნაკრებში კიდევ ერთი ფლანგელი და ბოლო პერიოდში კარგად ათამაშებული ზურიკო დავითაშვილია, რომელმაც რუსეთის პრემიერლიგაში დიდხნიანი პაუზის შემდეგ გაიტანა.
მიქაუტაძე და ქვილითაია
ვილი სანიოლის განკარგულებაში ახლა მხოლოდ 2 ფორვარდია. გიორგი მიქაუტაძემ გასულ სეზონში თავისი შესაძლებლობები სრულად გამოავლინა, რისი დაგვირგვინებაც ეროვნული ნაკრების სადებიუტო მატჩში გოლის გატანა იყო. ახლა გიორგის ერთადერთი პრობლემა აქვს - ნაკლები სათამაშო დრო, რაც მისი ძველ კლუბში დაბრუნებით მალე უნდა მოგვარდეს.
მიქაუტაძის ახლანდელ ფორმაზე საუბარი რთული იქნება, მაგრამ მასში მოტივაცია და გატანისკენ სწრაფვა სულ იგრძნობა, თუნდაც რამდენიმე წუთით ითამაშოს. ის ყველაფერს გააკეთებს, ჯვაროსნებში" გოლების რაოდენობა რომ გაზარდოს.
გიორგი ქვილითაიაზე დაახლოებით იმის თქმა შეიძლება, რაც მის თანაგუნდელ მურთაზ დაუშვილზე - როცა ფეხბურთელს სეზონი ჯერ სათანადოდ არ დაუწყია, რადიკალური დასკვნების გაკეთება რთულია.
სანიოლმა ცენტრფორვარდის პოზიციაზე არაერთი მოთამაშე გამოსცადა, ამ ეტაპზე კი ის ისევ ქვილითაიას ენდობა, რომელიც ზაფხულის ამხანაგურ მატჩებში არ გამოუძახებია. მან მთავარ მწვრთნელს არჩევანი უნდა გაუმართლოს!
საქართველოს ნაკრები - კონკურენცია და პრობლემური პოზიციები
საქართველოს ნაკრების განაცხადში კიდევ ერთი ცვლილებაა
