რომან შვანტნერი: ეს ქართველ ფეხბურთელთა არასწორი განვითარების ბრალია

რომან შვანტნერმა საქართველოში წლეულს უკვე მეორე სემინარი ჩაატარა. თემა ნამდვილად მნიშვნელოვანი იყო და ბოლო წლებში ქართულ ფეხბურთში განვითარებულ მოვლენებს თუ გავიხსენებთ, ძალიან მტკივნეულიც. საქმე ბავშვებისა და ზოგადად, ფეხბურთელთა ფიზმომზადებას ეხება.

სლოვაკი შვანტნერი საქართველოს ეროვნული ნაკრების ფიზმომზადების მწვრთნელია. სემინარს ესწრებოდნენ ეროვნული ლიგის, ეროვნული ლიგა 2-ის, საფეხბურთო აკადემიებისა და საქართველოს ასაკობრივი ნაკრებების მწვრთნელები.

"უკვე საკმაო ხანია, საქართველოს ნაკრებში ვარ. ზუსტად ჩემთან მოდიან ის ბიჭები, რომლებიც აქ იზრდებიან და კარგად ვიცი, რა პრობლემების წინაშე ვდგავართ.

პირველ პირში იმიტომ ვლაპარაკობ, რომ ახლა მე არ ვარ სხვა ქვეყნის წარმომადგენელი, ახლა თქვენსავით საქართველოს წარმოვადგენ. ეს პრობლემები კი ქართული ფეხბურთის განვითარებას ხელს უშლის", - ამბობს საქართველოს ნაკრების ერთ-ერთი მწვრთნელი.

შვარტნერმა დააკონკრეტა, რას გულისხმობდა:

"თავიდანვე არასწორი აღზრდის, კუნთების არასწორი განვითარებისა და ტრავმების პრევენციის მეთოდოლოგიის არქონის გამო პრობლემები დიდ ფეხბურთში გვექმნება. ამიტომ მე მზად ვარ, საკუთარი ცოდნითა და გამოცდილებით ნებისმიერ დროს ნებისმიერი ქართული კლუბის მწვრთნელს დავეხმარო.

თუნდაც ის შედეგი, რაც ქართულ კლუბებს ჰქონდათ ევროთასებზე, არ არის გამოწვეული შემთხვევითობით, უპირველესად, ეს ფეხბურთელთა არასწორი განვითარების ბრალია".

მან თანამედროვე ტენდენციებზეც ილაპარაკა:

"მსოფლიო ფეხბურთის დინამიკა ძალიან სწრაფია და ჩვენ ვეღარავის გავუწევთ კონკურენციას, თუ დროული და სწორი მიდგომით არ ჩავერიეთ. სწორედ ჩვენ უნდა დავეხმაროთ მათ, იყვნენ პროფესიონალები, ათლეტურები და ის ტექნიკა, რაც ქართველებს ახასიათებთ, გამოიყენონ დინამიკაში. სხვაგვარად მას ფასი არ ექნება".

სემინარზე საქართველოს 17-წლამდელთა ნაკრების მთავარი მწვრთნელი გიორგი ნემსაძე გველაპარაკა:

"შვარტნერი რომ ლაპარაკობდა, შვეიცარიასა და იტალიაში გატარებული პერიოდი გაახსენდა, სადაც ამ საკითხებს ყურადღებას 15-20 წლის წინათ აქცევდნენ და ფიზმომზადების ახალ მეთოდებს ნერგავდნენ. არავინ უწყის, ამ პრობლემების გამო რამდენი მოთამაშე დავკარგეთ".

მისი თქმით, საქართველოში სერიოზული რეფორმაა საჭირო:

"დღევანდელი ფეხბურთი მეცნიერებას ემყარება, ფიზიკური მომზადება და სამედიცინო მომსახურება გუნდებს ისევე სჭირდებათ, როგორც მთავარი მწვრთნელი და ფეხბურთელები.

არადა, ჩვენთან ფიზმომზადების სპეციალისტების სერიოზული დეფიციტია. უცხოელი მწვრთნელები რომ ჩამოგვყავს, ეს პატარა ხარჯი არ არის. ამიტომ საკუთარი სპეციალისტები უნდა გავზარდოთ, ნიჭიერი ბავშვები მასობრივად რომ არ დაიკარგონ".

(იბეჭდება მცირე ცვლილებით)
ყოველდღიური სპორტული გაზეთი "ლელო"