ჩემპიონთა ლიგის დარჩენილი ორი საპასუხო მეოთხედფინალური მატჩი ჩატარდა და ნახევარფინალური წყვილები გაირკვა.„მანჩესტერ სიტი“ სახლში 3:0 გამარჯვების შემდეგ, სტუმრად დაუზავდა „ბაიერნს“ (1:1) და ზედიზედ მესამედ, ისტორიაში კი მეოთხედ გავიდა 1/2-ფინალში.
პირველ ტაიმში უპამეკანოს გამო „ბაიერნი“ ორჯერ გადარჩა - ჯერ მსაჯმა ბოლო იმედის ჯარიმის გამო წითელი ბარათი უჩვენა, მაგრამ თამაშგარე დაფიქსირდა, შემდეგ კი გიუნდოგანის დარტყმული ბურთი საჯარიმოში ხელზე მოხვდა და ჰოლანმა პენალტი ვერ გამოიყენა. მან კარიერაში 36 თერთმეტმეტრიანიდან მხოლოდ 3 გააფუჭა. თუმცა 57-ე წუთზე ნორვეგიელი ზომერთან პირისპირ გაიჭრა და „ქალაქელები“ დააწინაურა.
83-ე წუთზე პენალტი უკვე ედერსონის კარში დაინიშნა და კიმიჰმა ანგარიში გაათანაბრა.
„ინტერმა“ საკუთარ მოედანზე „ბენფიკასთან“ გამარჯვება ხელიდან გაუშვა, თუმცა ორი შეხვედრის ჯამში 5:3 გაიმარჯვა და ლისაბონური გუნდის ბარიერი გადალახა. "ნერაძური" 13 წლის შემდეგ პირველად ითამაშებს ნახევარფინალში.
ნახევარფინალში „ინტერი“ „მილანს“, ხოლო „მანჩესტერ სიტი“ „რეალს“ დაუპირისპირდება. პირველი მატჩები 9-10 მაისს გაიმართება, საპასუხოები კი - 16-17 მაისს.
. გვარდიოლა მწვრთნელის რანგში სარეკორდოდ, მეათედ გავიდა ნახევარფინალში.
. ჰოლანმა ზედიზედ 7 მატჩში გაიტანა (15 გოლი). ის 12 გოლით ჩემპიონთა ლიგის მიმდინარე გათამაშების ბომბარდირია.
. დე ბრუინმა ამ სეზონში 23 საგოლე გადაცემა გააკეთა და თავისი რეკორდი განაახლა.
. "სიტი" ბოლო 15 შეხვედრაში დაუმარცხებელია - 12 მოგება და 3 ფრე.
მიუნხენი. „ალიანც არენა“. 75 000 მაყურებელი
ბაიერნი - მანჩესტერ სიტი 1:1
გოლები: 0:1 ჰოლანი (57), 1:1 კიმიჰი (83, პენ)
გამოუყენებელი პენალტი: ჰოლანი (37)
მილანი. „სან სირო“. 75 380 მაყურებელი
ინტერი - ბენფიკა 3:3
გოლები: 1:0 ბარელა, 1:1 ეურსნესი (38), 2:1 მარტინესი (65), 3:1 კორეა (78), 3:2 ანტონიუ სილვა (86), 3:3 მუსა (90+5)
ჩემპიონთა ლიგა. 1/4-ფინალი: "სიტიმ" "ბაიერნი" გაანადგურა - "ინტერმა" გასვლაზე "ბენფიკას" მოუგო [VIDEO]
ხვიჩა უფრო ძლიერი დაგვიბრუნდება