ბელგიასთან დამარცხებული რუსეთი კრიტიკის ქარცეცხლში მოექცა, სატურნირო თვალაზრისითაც არასახარბიელო სიტუაციაში აღმოჩნდა და დანიელების მძლეველ ფინეთთან აუცილებლად გამარჯვება ესაჭიროებოდა. მასპინძლებმა თავიდანვე შეუტიეს, გოლი კი საკუთარ კარში მიიღეს, მაგრამ პოჰიანლაპოს გოლი თამაშგარეს გამო არ ჩაუთვალეს. რუსეთი სრულ უპირატესობას ფლობდა, ხოლო „სუომი“ სწრაფი და სახიფათო კონტრიერიშებით პასუხობდა.
თითქოს პირველი ტაიმი ფრედ უნდა დასრულებულიყო, მაგრამ კომპენსირებულ დროში მირანჩუკმა მცველი ჩამოიცილა და ლამაზი გოლით ანგარიში გახსნა. ეს 2019 წლის შემდეგ ნაკრებში მისი პირველი გოლია. პირველ ტაიმში ტრავმა მიიღო რუსეთის ნაკრების მცველმა ფერნანდესმა და საავადმყოფოში გადაიყვანეს. როგორც იუწყებიან, მას ხერხემლის პრობლემა აქვს.
მეორე ტაიმში რუსეთმა ტემპი დააგდო, ბურთს ცენტრში ათამაშებდა, მოწინააღმდეგის შეცდომის მოლოდინში იყო და შეცვლაზე შესულმა ჟამალეტდინოვმა კარგი მომენტი ვერ გამოიყენა, მერე კუზიაევს გატანა მიმდინარე ტურნირის პირველი წრის საუკეთესო მეკარედ აღიარებულმა ჰრადეცკიმ არ დაანება. ფინეთს კი შეტევაში არაფერი გამოსდიოდა, მათ შემტევებს თამაშის გასამწვავებლად ელემენტარულად კლასი არ ჰყოფნიდათ და საშუალოზე დაბალი დონის ორი გუნდის შეხვედრაში ჩერჩესოვის შეგირდებმა იმარჯვეს.
სანკტ-პეტერბურგი. „სანკტ-პეტერბურგი“
რუსეთი - ფინეთი 1:0
გოლი: მირანჩუკი (45+2)
ამავე ჯგუფში ხვალ ერთმანეთს ბელგია და დანია შეხვდებიან. 21 ივნისს კი დანია რუსეთს უმასპინძლებს, ხოლო ფინეთი ბელგიას დაუპირისპირდება.
"რუსეთთან ფრეზე კი არა, მოგებაზე ვითამაშებთ" - ამბობს ფინელი ფეხბურთელი
