იტალიის ნაკრებმა მოდის სახლ Armani-სთან 4-წლიანი კონტრაქტი გააფორმა.
2012 და 2016 წლების ოლიმპიური თამაშებისთვის ქვეყნის ეროვნული გუნდის ფორმაზე მუშაობის შემდეგ, დიზაინერმა იტალიის ფეხბურთის ფედერაციასთან 4-წლიან შეთანხმებას მოაწერა ხელი.
კონტრაქტში გაწერილია, რომ ბრენდმა უნდა იზრუნოს მამაკაცების, ქალებისა და ახალგაზრდული საფეხბურთო ნაკრების ჩაცმულობაზე.
ამ დრომდე იტალიის ნაკრებთან "დოლჩე და გაბანა" მუშაობდა.
ჯორჯო არმანიმ კოსტიუმი, პერანგი და პალტო შექმნა, ქსოვილად კი ტრიკოტაჟი შეარჩია - უბრალო და მოსახერხებელი.
კაცების ნაკრებმა ახალ კოსტიუმებში ფოტო უკვე გადაიღო.
აღსანიშნავია, რომ ლუქს სრულყოფილ სახეს "არმანის" ფეხსაცმელები, ქამრები, ჩანთები,
ზურგჩანთები და მზისგან დამცავი სათვალე აძლევს.
"ამ შეთანხმებამ განსაკუთრებით გამაბედნიერა. "ჩელსისა" და "ბაიერნთან" მუშაობის გამოცდილების შემდეგ კვლავ ფეხბურთს ვუბრუნდები და ახლა ტანისამოსს იტალიის ნაკრებისთვის ვქმნი, რომელსაც ჯერ კიდევ 1994 წლის მსოფლიო ჩემპიონატზე ჩავაცვი.
ფედერაციასთან თანამშრომლობით ვამაყობ და მოხარული ვარ, რომ შემიძლია ჩვენს სპორტსმენებს წარმოდგენა შევუქმნა სირბილესა და ელეგანტურ პრაქტიკულობაზე. მე შევქმენი ჩემი სტილის შესაბამისი გარდერობი, რომელიც განკუთვნილია მუდმივ მოძრაობაში მყოფი სპორტსმენებისთვის. ეს კიდევ ერთი საშუალებაა, რომ მსოფლიო სტილის იტალიურ განცდას ვაზიაროთ" - განაცხადა ჯორჯო არმანიმ.
ჯორჯო გიჟდება სპორტზე
2004 წელს იტალიელი დიზაინერი საკალათბურთო კლუბ "მილანის" სპონსორი გახდა. კლუბს მაშინ ძალიან მძიმე ვითარება ჰქონდა და სერიოზულ ფინანსურ პრობლემებს განიცდიდა. დახმარება კი სრულიად მოულოდნელი მხრიდან მივიდა მათთან. Armani-ს კრეატიულმა დირექტორმა ლეო დელ ორკომ თავისი უფროსი დაარწმუნა, მომაკვდავი საკალათბურთო კლუბი გადაერჩინა. 2008 წელს ჯორჯომ საკალათბურთო კლუბი მისი წინა მფლობელისგან იყიდა. უკანასკნელი 6 წლის განმავლობაში "მილანმა" იტალიის ჩემპიონატი სამჯერ მოიგო.ჯორჯო არმანი სპორტთან პირველად 1994 წლის მსოფლიო ჩემპიონატისას გადაიკვეთა, როდესაც საზოგადოების წინაშე იტალიის ნაკრების ტანისამოსის დიზაინერის როლში წარდგა. ამის შემდეგ ის სპორტსმენებთან და ფედერაციებთან მუდმივად თანამშრომლობდა (ზრუნავდა იტალიის ოლიმპიური გუნდის, "ნიუკასლისა" და "ჩელსის" ფეხბურთელების, ინგლისის ნაკრებისა და ისეთი ვარსკვლავების ჩაცმულობაზე, როგორებიც კრიშტიანო რონალდო და კრისტიან ვიერია).
"ფეხბურთის სამყარო მიზიდავს, თუმცა ის ძალიან რთულია. ზოგიერთმა მოთამაშემ შეიძლება დააზარალოს ბრენდი, თუ მოედანზე სათანადოდ ვერ გამოავლენს საკუთარ თავს. ამიტომ განსაკუთრებით ვაფასებთ ისეთ სუფთა რეპუტაციას, როგორიც კაკასა და შევჩენკოს აქვთ.
ჩემი პარტნიორები ჯერ კიდევ ძალიან დიდი ხნის წინ მთავაზობდნენ ფეხბურთში ფულის ჩადებას, თუმცა მე თავს ვიკავებდი. ყოველთვის იმაზე ვფიქრობდი, რომ ამას მტრების მომატება შეეძლო. საკალათბურთო კლუბ "მილანის" შემთხვევაში კი სენტიმენტალური აუცილებლობის წინაშე აღმოვჩნდი. იმ შემთხვევაში ძალიან სერიოზული საჭიროება იყო. ახლა ვიმედოვნებ, რომ კლუბი ხშირად მოიგებს, სხვა გუნდების გულშემატკივრები კი მაპატიებენ და გააგრძელებენ ჩემი შარვლების ყიდვას".
კალათბურთი უკვე დიდი ხანია ჯორჯო არმანის ცხოვრების წესის ნაწილი გახდა.
მისი მეგობრები - სპაიკ ლი, რასელ ქროუ - მილანში ყოფნისას ყოველთვის ესწრებიან გუნდის მატჩებს. თავად დიზაინერი კი აუცილებლად ესწრება NBA-ს თამაშებს, სადაც ასევე უამრავი ნაცნობი ჰყავს.
დიზაინერს კარგი ურთიერთობა აქვს კალათბურთელ კობი ბრაიანტთან, რომელიც არმანისთან შესახვედრად მილანში ჯერ კიდევ 2008 წელს საგანგებოდ იმისთვის ჩავიდა, რათა საკუთარი ბიზნესის დაწყებაზე რჩევები დიზაინერისგან მიეღო. არმანი ასევე კარგად იცნობს NBA-ს ელეგანტურობის ეტალონად აღიარებულ პეტ რაილის, რომელიც 90-იანებში მუდამ ცდილობდა იტალიაში არმანისთან შეხვედრის მიზნით ჩასვლას, არასდროს იშორებდა სპეციალურად მისთვის შეკერილ კოსტიუმებს და თავისი ვნება ალონცო მოურინგსა და ტიმ ჰარდუეისაც გადასდო.
ავტორი: სალომე აბულაშვილი
![საფრანგეთმა ბელგიას, იტალიამ კი ისრაელს მოუგო [VIDEO]](/pictures/image7/cf98abaf6a964200ed7b46b1931aa18a.jpg "საფრანგეთმა ბელგიას, იტალიამ კი ისრაელს მოუგო [VIDEO]")
![სპალეტის იტალიამ პარიზში საფრანგეთს მოუგო [VIDEO]](/pictures/image7/046b7b02b50db76c383cdc5d46481bc9.jpeg "სპალეტის იტალიამ პარიზში საფრანგეთს მოუგო [VIDEO]")
ეს ჩააცმევს რა უბედურებაა, კაცო!!!