პრაღის "სლავიამ" ევროპა ლიგის 1/8-ფინალში გლაზგოში "რეინჯერსი" 2:0 დაამარცხა და 1/4-ფინალში გავიდა, თუმცა ეს გამარჯვება მარტივად არ მოუპოვებია - მეკარეს დასახიჩრების, მცველს კი დამსახურებული ცემის ფასად დაუჯდა.
ჩეხების მეკარე ონდჟრეი კოლარჟს 61-ე წუთზე შოტლანდიელთა იამაიკელი შემტევი კემარ რუფი ბუცით სახეში შეეჯახა. შედეგად "რეინჯერსის" ფორვარდმა წითელი ბარათი მიიღო, "სლავიას" კარის დარაჯმა - ნაიარევი.
უფრო სკანდალური კი მეორე ეპიზოდი გამოდგა - "სლავიას" მცველ ონდჟრეი კუდელას გასახდელის გვირაბში სცემეს, რისი მიზეზიც გლენ კამარას მიმართ მის მიერ ჩადენილი რასისტული ქმედება გახდა.
აღნიშნულ საკითხზე კომენტარი "რეინჯესის" მთავარმა მწვრთნელმა სტივ ჯერარდმა გააკეთა:
"გლენ კამარასთან უშუალო ურთიერთობა ჩამომიყალიბდა. ის ერთ-ერთი ის ფეხბურთელია, რომელსაც 100%-ით ვენდობი და მჯერა, რასაც ამბობს. ირგვლივ მყოფმა ფეხბურთელებმაც გაიგონეს კუდილას ნათქვამი. ჩემი ყველა ფეხბურთელით ვამაყობ და მათ სოლიდარობას ვუცხადებ. სიტუაციაში უეფა უნდა გაერკვეს და მომხდარი ყურადღების მიღმა არ უნდა დარჩეს", - განაცხადა ჯერარდმა.
Seznam Zpravy-მ დაწერა, რომ კუდელას ტრიბუნის ქვეშ, გვირაბში მაგრად სცემეს. ინციდენტის შემდეგ "სლავიამ" პოლიცია გამოიძახა და იქამდე არ ჩასხდნენ ავტობუსში, სანამ რამდენიმე ეკიპაჟი არ მივიდა, რომლებიც სასტუმრომდე მიაცილებდნენ. ჯერჯერობით უცნობია, თუ ვინ დაესხა თავს 33 წლის ჩეხ მცველს.
![alt](/pictures/image50/bf39ecd98f35cea733ed9563b8a7217c.jpg "გლაზგოში "სლავიას" 1 ფეხბურთელი დაასახიჩრეს, მეორეს გვირაბში სცემეს [VIDEO]")
"მანჩესტერმა" "მილანი" გამოაგდო - ყველა მეოთხედფინალისტი ცნობილია [VIDEO] 
