არ გაკოცო - არ იქნება, გაკოცო და ვიცი... ავსტრალიაში ქალთა მსოფლიო ჩემპიონატის ფინალში ესპანეთმა ინგლისი 1:0 დაამარცხა და ისტორიაში პირველად მოიპოვა ტიტული. მოთამაშეებისთვის ოქროს მედლების გადაცემისას ესპანეთის ფეხბურთის ფედერაციის პრეზიდენტი ლუის რუბიალესი 33 წლის თავდამსხმელ ჯენიფერ ერმოსოს ჩაეხუტა, შემდეგ კი ტუჩებში მგზნებარედ აკოცა და ატყდა ერთი ამბავი.
თავად ერმოსოს კოცნა არ გაუპროტესტებია, თანაგუნდელებმა მხოლოდ იხუმრეს და იხალისეს, მაგრამ სამაგიეროდ, აღნიშნულმა ფაქტმა ქვეყნის მთავრობის წევრების აღშფოთება გამოიწვია. სოციალური უფლებების მინისტრმა იონე ბელარამ თავის "ტვიტერზე" დაწერა, რომ ქალებზე სექსუალური ძალადობა უნდა შეწყდეს და
როდესაც მამაკაცები ამას სახალხოდ აკეთებენ, ხომ წარმოგიდგენიათ, რას მოიმოქმედებენ ერთი-ერთზე დარჩენისას.
ბელარას მხარი თანასწორობის მინისტრმა ირენ მონტერომ დაუჭირა. "ეს სექსუალური ძალადობის ფორმაა. კოცნა ნებართვის გარეშე დაუშვებელია, რაც ჯერ კიდევ ვერ ავიყვანეთ კონტროლის ქვეშ. ამის გამო ქალები განიცდიან. მთელი საზოგადოების ამოცანა ამის შეცვლაა. თანხმობა - ეს მთავარია", - გამოაქვეყნა მონტერომ სოციალურ ქსელში პოსტი.
45 წლის რუბიალესს ისღა დარჩენოდა, ბოდიში მოეხადა. მან As-ს განუცხადა, რომ, რა თქმა უნდა, შეცდა, ყველაფერი სპონტანურად მოხდა, ერმოსოსთან შესანიშნავი ურთიერთობა აქვს, მაგრამ მაქსიმალურად ემოციურ მომენტში თავი ვერ შეიკავა და არავითარ მავნე განზრახვას მისი მხრიდან ადგილი არ ჰქონია.
თავად "დაზარალებულმა" ერმოსომ კი ბრძანა, რომ სულაც არ გრძნობს თავს დაზარალებულად, პრეზიდენტი მათ საუკეთესოდ ექცეოდა და ეს მადლიერების, სიხარულისა და მეგობრობის ბუნებრივი ჟესტი იყო.
პირველად ისტორიაში - ქალთა მსოფლიო ჩემპიონატზე ტრანსგენდერი იღებს მონაწილეობას
პირველი ქალი ფეხბურთელი ჰიჯაბით - ბენ ზინამ და მაროკომ გაიმარჯვეს [PHOTOS]
