სიტი-ბარსელონა 1:2 - ერთი თავით მაღლა სუარესი და მესია [VIDEO]

"ბარსელონამ" მატჩი უფრო აქტიურად დაიწყო. ჯერ მარტინ დემიკელისმა ითამაშა კარგად და მომენტი გააუვნებელყო, შემდეგ ლუის სუარესმა დაარტყა არაზუსტად.

თუმცა კატალონიელებმა თავისას მაინც მალე მიაღწიეს, ლიონელ მესის აქტიურობას სუარესის გოლი მოჰყვა. მანჩესტერელებს ყველაზე მეტად სუარესთან გამკლავება უჭირდათ და ექსლივერპულელი კიდევ ერთხელ აღმოჩნდა იქ, სადაც საჭირო იყო. ურუგვაელმა ხელსაყრელი პოზიციიდან შანსი აღარ გაუშვა და ახლო მანძილიდან აუღებელი დაურტყა ჯო ჰარტს.

"ქალაქელებს" უჭირდათ და შეტევაში, ფაქტობრივად, არაფერი გამოსდიოდათ. აი, სუარესს კი სხვაობის გაზრდა შეეძლო, მაგრამ აშკარა საგოლე მომენტი ვერ გამოიყენა.

მიუხედავად ამისა, "ბარსამ" ნახევარ საათში შეძლო მეოთხედფინალისკენ გიგანტური ნაბიჯის გადადგმა - მესიმ კიდევ ერთხელ გაილაღა და სოლო-რეიდის შემდეგ არგენტინელმა ფლანგზე ჟორდი ალბას გაუგორა, რომელმაც გამჭოლი პასით სუარესი მოძებნა. მანაც დასწრებაზე საუცხოოდ ითამაშა - 0:2. მანჩესტერელებს თითქმის არაფერი გამოსდიოდათ, ედინ ჯეკოს ორ არც ისე სახიფათო დარტყმას თუ არ ჩავთვლით - "ბარსა" ერთი თავით მაღლა იდგა.

მეორე ნახევრის დებიუტში სერხიო აგუერომ ოდნავ ააცილა. სამაგიეროდ, კუნს მოგვიანებით გამოუვიდა, როდესაც დავიდ სილვას დახვეწილი ქუსლურის მერე გაიტანა. მანუელ პელეგრინის უკვე ვილფრიდ ბონიც შეყვანილი ჰყავდა მოედანზე და მასპინძლები თამაშის გადარჩენას ცდილობდნენ, მაგრამ გაელ კლიშის წითელმა ბარათმა მათ ამოცანა გაურთულა.

საბოლოოდ, "ეტიჰადის" სტუმრებმა მაინც მშვიდად მიიყვანეს მატჩი დამსახურებულ გამარჯვებამდე. მეტიც, ჰარტი რომ არა... მესიმ ბოლო წამებზე მორიგი პენალტი გააცუდა, მას ინგლისელმა აუღო, დამატებაზე კი ლეომ, ფაქტობრივად, ცარიელ კარში თავით ვარდნაში ააცილა. გჯერათ "კამპ ნოუზე" "სიტის" მოგების?

ჩემპიონთა ლიგა. 1/8 ფინალი. I მატჩი
სიტი-ბარსელონა 1:2
გოლები: 0:1 სუარესი (16), 0:2 სუარესი (30), 1:2 აგუერო (69)
სიტი (4-4-2): ჰარტი - საბალეტა, კომპანი, დემიკელისი, კლიში - ნასრი (62. ფერნანდინიო), ფერნანდო, მილნერი, სილვა (78. სანია) - ჯეკო (68. ბონი), აგუერო
ბარსელონა (4-3-3): ტერ შტეგენი - დ. ალვეში (75. ადრიანო), პიკე, მასკერანო, ალბა - რაკიტიჩი (71. მატიო), ბუსკეტსი, ინიესტა - მესი, ნეიმარი (80. პედრო), სუარესი
შენიშვნა: მესიმ ვერ გაიტანა პენალტი (94)
გაფრთხილება: კლიში, კლიში, ფერნანდო - რაკიტიჩი, ალვეში, ადრიანო
გაძევება: კლიში (74)
კუთხური: 8-4 ჯარიმა: 13-13 თამაშგარე: 0-7 კარში დარტყმა: 13(5)-15(4) ბურთის ფლობა: 38%-62%
მაყურებელი: 45 550

ყოველდღიური სპორტული გაზეთი "ლელო"