საქართველოს ახალგაზრდული ნაკრები სლოვაკებთან დამარცხდა [VIDEO]

18 ნოემბერს, გორში საქართველოს ახალგაზრდულმა ნაკრებმა ევროპის ჩემპიონატის შესარჩევი ციკლის მატჩი სლოვაკეთთან გამართა და ანგარიშით 1:2 დამარცხდა.

ამ წაგებით ალექსანდრე ჩივაძის შეგირდებმა ჯგუფიდან გასვლის შანსი, პრაქტიკულად, დაკარგეს.

თენგიზ ბურჯანაძის სახელობის სტადიონზე გამართულ მატჩში ანგარიში მასპინძლებმა გახსნეს - 21-ე წუთზე ვაკო ყაზაიშვილმა ლამის მოედნის ცენტრიდან ატარა ბურთი და მეტოქის საჯარიმოს სიახლოვიდან ძლიერი და ტექნიკური დარტყმით გაიტანა - 1:0.

ანგარიშში უპირატესობა 4 წუთში გავფლანგეთ - სლოვაკთა იერიშს ჩვენს საჯარიმოში არეულობა მოჰყვა, რითაც ისარგებლა კაროლ მასაროშმა და ახლო მანძილიდან ნადირაძეს აუღებელი დაურტყა - 1:1.

შესვენებამდე ქართველ ფეხბურთელებს რეალური საგოლე მომენტი არ ჰქონიათ, მიუხედავად იმისა, რომ ტაიმის ბოლო ათმა წუთმა მათ შეტევებში ჩაიარა.

საქართველოს ახალგაზრდული ნაკრების იმედები 62-ე წუთზე ონდრეი დუდამ დაასამარა - 1:2.

სამწუხაროდ, დარჩენილ დროში ჩივაძის შეგირდებმა მატჩის ბედის შემობრუნება ვერ შეძლეს, მსაჯის მიერ წამატებულ დროში კი მესამე გოლიც მიიღეს - თავი შრანცმა გამოიჩინა.

საქართველოს ახალგაზრდულ ნაკრებს III ჯგუფში კიდევ ორი შეხვედრა აქვს გასამართი. ალექსანდრე ჩივაძის შეგირდები 5 მარტს შინ ლუქსემბურგს მიიღებენ, 4 სექტემბერს კი ჰოლანდიას ესტუმრებიან.

U21. ევროპის ჩემპიონატი. შესარჩევი ციკლი. III ჯგუფი
საქართველო-სლოვაკეთი 1:3
გოლები: 1:0 ყაზაიშვილი (21), 1:1 მასაროში (25), 1:2 დუდა (25), 1:3 შრანცი (90+3).
გაფრთხილება: კვეკვესკირი, ჭანტურია, შკვარკა, პაური.

საქართველო: გიორგი ნადირაძე, სოლომონ კვირკველია, დავით უბილავა, მამუკა კობახიძე, ჯამბულ ჯიღაური, ვაკო ყაზაიშვილი, ლაშა პარუნაშვილი, ჯანო ანანიძე (46, პაპავა), ნიკა კვეკვესკირი, გიორგი ჭანტურია, გიორგი ქვილითაია (57, სხირტლაძე).