არქიმანდრიტი ანთიმოზი: არც ნასვამი ვყოფილვარ და არც რუმინელი მსაჯი მიცემია

31 მაისს, თბილისში, "მიხეილ მესხზე" გამართული საქართველოს და პორტუგალიის 19-წლამდელთა ნაკრებების მატჩის (2:3) შემდეგ სოციალური ქსელით გავრცელდა ინფორმაცია, თითქოს ნასვამი არქიმანდრიტი ანთიმოზი გასახდელში შევარდა და მატჩის არბიტრს, რუმინელ რადუ პეტრესკუს ფიზიკური და სიტყვიერი შეურაცხყოფა მიაყენა. დაპირისპირება მალევე განიმუხტა და არქიმანდრიტი გარეთ გაიყვანეს, მაგრამ, თურმე, ამის მერეც აგრძელებდა ბილწსიტყვაობას.


"ლელოს" კორესპონდენტი ამ ამბავს არ შესწრებია, სხვადასხვა წყაროსგან კი დავადგინეთ, რომ ფიზიკური არა, მაგრამ არქიმანდრიტ ანთიმოზის მიერ არბიტრის სიტყვიერი შეურაცხყოფა კი ყოფილა.

მოგვიანებით, არქიმანდრიტმა "ფეისბუქის" საკუთარ გვერდზე დაწერა განმარტება, რასაც სტილის დაცვით გთავაზობთ:

"ეხლა ავრცელებენ ინფორმაციას, თითქოს რუმინელ მსაჯ პეტრესკუს გასახდელში შეუვარდი ნასვამი და ვცემე!

სინამდვილეში ნასვამი არ ვიყავი, არც გასახდელში შევარდნილვარ. გასასვლელში ვიდექი და ვუთხარი: ანთიმოზ ივერიელი ვარ და ანთიმ ივერიანოს ქვეყანაში, რუმინელი ესე არ უნდა იქცეოდე, მოგკითხავს მღვდელმოწამე ანთიმოზ ივერიელი-მეთქი. სულ ეს იყო".

(იბეჭდება მცირე ცვლილებით)
ყოველდღიური სპორტული გაზეთი "ლელო"