"ცხინვალში" კაჭარავა გოჩა ჩიქოვანმა შეცვალა - სელექცია გრძელდება შეიძლება, ლეგიონერებიც მოვიდნენ...

AutoSharing Option
"ცხინვალს" გოჩა ჩიქოვანი გაწვრთნის. 54 წლის სპეციალისტმა ამ თანამდებობაზე კახა კაჭარავა შეცვალა. მოგეხსენებათ, კაჭარავამ თბილისის "დინამო" ჩაიბარა, რომელიც ვიაჩესლავ გროზნის წასვლის შემდეგ უმწვრთნელოდ დარჩა...

გოჩა ჩიქოვანს ქართული ფეხბურთის გულშემატკივარი ძალიან კარგად იცნობს. აქტიური ფეხბურთელობისას ის თამაშობდა ბათუმის "დინამოში", თბილისის "დინამოსა" და თბილისისავე "არსენალში".

ჩიქოვანმა 1 მატჩი ჩაატარა საქართველოს ნაკრების შემადგენლობაში. კარიერის დასრულების შემდეგ კი სამწვრთნელო საქმიანობას შეუდგა. სხვათა შორის, ის გარკვეული პერიოდის განმავლობაში "ცხინვალის" მთავარი მწვრთნელიც იყო, 2013 წლიდან კი კახა კაჭარავას ასისტენტად მუშაობდა.

"ცხინვალის" ხელმძღვანელობამ, კაჭარავას წასვლის შემდეგ, ახალი
მწვრთნელი გუნდის წიაღშივე იპოვა. ისე ჩანს, რომ ჩიქოვანის გუნდი ერთობ ანგარიშგასაწევი ძალა იქნება საქართველოს ჩემპიონატის რანგით მეორე ლიგაში. და ეს იმის მიუხედავად, რომ კლუბის ფინანსური მდგომარეობა იდეალურისგან შორსაა.

რაც ახალი სეზონისთვის მზადება დაიწყო, "ცხინვალი" კარგად გამოიყურება ამხანაგურ შეხვედრებში და გამონაკლისი არც "ჭიათურასთან" გამართული სპარინგი ყოფილა, რომელიც ცხინვალელებმა დიდი ანგარიშით, 4:1 მოიგეს.

ჩიქოვანის გუნდში გოლები ცერცვაძემ, მიქავამ, მესხმა და იოსელიანმა გაიტანეს. განსაკუთრებით უნდა გამოვარჩიოთ ცოტნე მესხი, რომელმაც, გოლთან ერთად, ორი საგოლე გადაცემაც მიითვალა, ოღონდ, ეგ არის, რომ მესხი აღარ არის "ცხინვალის" ფეხბურთელი და ამაზე ქვემოთ წაიკითხავთ...

ცხინვალელთა შემადგენლობაში რამდენიმე ისეთმა ფეხბურთელმაც ითამაშა, ჩვენს ყურადღებას რომ იმსახურებს. გუნდში გამოჩნდა 27 წლის უკრაინელი მეკარე ვოლოდიმირ მერნიჩენკო. მას საქართველოში თამაშის გამოცდილება უკვე აქვს - ზუგდიდის "ოდიშის" ღირსებას იცავდა.

ქართველი გულშემატკივრის წინაშე წარდგენა არ სჭირდება ცხინვალელთა კიდევ ერთ პოტენციურ ახალწვეულს, გამოცდილ მარცხენაფლანგელ გივი იოსელიანს. მას უთამაშია როგორც ქართულ, ისე უცხოურ კლუბებში. სხვადასხვა დროს ირჯებოდა ქუთაისის "ტორპედოში", უნგრულ "კეჩკემეტში", "სიონში", "ცხინვალში", "სამტრედიასა" და "ზუგდიდში".

გარდა ამისა, "ცხინვალის" შემადგენლობაში ორი ფერადკანიანი ფეხბურთელიც ვარჯიშობს. მოკლედ, გუნდი ჯერაც დაკომპლექტების პროცესშია და არც ახალი მოთამაშეების გამოჩენაა გამორიცხული.

გუშინვე "ლელო" "ცხინვალის" ახალ მწვრთნელს, გოჩა ჩიქოვანს დაუკავშირდა და ინტერვიუ ჩაწერა:

- როგორც იცით, კლუბში მძიმე ფინანსური მდგომარეობაა. ამის მიუხედავად, მონდომებით ვემზადებით ახალი სეზონისთვის. კარგა ხნის წინ დაიწყო და ახლაც მიდის სელექცია. შევარჩიეთ კიდეც რამდენიმე ფეხბურთელი. ჩვენს გუნდში ვარჯიშობდა ცოტნე მესხი, რომელსაც ძალიან ბევრი შეუძლია, მაგრამ ის თბილისის "დინამოში" გააგრძელებს კარიერას. მინდა, წარმატებები ვუსურვო მას. დიდი იმედი მაქვს, ბოლომდე წარმოაჩენს თავის პოტენციალს.

- "ცხინვალში" ახალი ფეხბურთელების გამოჩენა თუ არის მოსალოდნელი?
- როგორც გითხარით, სელექცია გრძელდება და, შესაბამისად, ახალი ფეხბურთელების მოსვლა, მათ შორის - ლეგიონერებისაც, სრულიად შესაძლებელია.

- როგორც ვიცით, "ცხინვალში" ორი შავკანიანი ფეხბურთელი ვარჯიშობს...
- მართალი ხართ. ერთ-ერთი მათგანი ბელგიის მოქალაქეა. "ჭიათურასთან" ამხანაგურ მატჩში ცუდად ნამდვილად არ გამოიყურებოდა და აუცილებლად დავაკვირდებით მომდევნო ამხანაგურ მატჩშიც, რომელშიც "გაგრას" შევხვდებით.

- რა იქნება თქვენი მიზანი საქართველოს რანგით მეორე ლიგაში?
- ჩვენ ყოველთვის მაქსიმალურ მიზნებს ვისახავთ. უნდა ვიფიქროთ უმაღლეს ლიგაში დაბრუნებაზე, ოღონდ საამისოდ აუცილებელი იქნება გაძლიერება.

- სად გამართავს "ცხინვალი" საშინაო მატჩებს?
- გვინდოდა, მცხეთაში გვეთამაშა, მაგრამ არ გამოვიდა. დიდი ალბათობით, რუსთავში ვუმასპინძლებთ მეტოქეებს.

- საწვრთნელი პროცესის მიმდინარეობით კმაყოფილი ხართ?
- კმაყოფილი ვარ. ბიჭები ვარჯიშებზე თავს არ ზოგავენ. ასევე ნორმალურად გამოიყურებოდა გუნდი ამხანაგურ მატჩებში, მაგალითად, "საბურთალოსთან" შეხვედრაში, რომელიც ჩვენი გამარჯვებით დასრულდა. აქვე ვიტყვი, რომ არის პოზიციები, რომლებზეც აუცილებლად გვჭირდება გაძლიერება.

- რომელ პოზიციებს გულისხმობთ?
- ფლანგის შემტევები და ცენტრალური თავდამსხმელი გვჭირდება. ჩვენი ფორვარდი მაქაცარია ძალიან კარგად კი გამოიყურება, მაგრამ მეორე ფორვარდიც აუცილებლად დაგვჭირდება.

(იბეჭდება მცირე ცვლილებით)
ყოველდღიური სპორტული გაზეთი "ლელო"
მკითხველის კომენტარები / 0 /
კომენტარი ჯერ არ გაკეთებულა.

სიახლეები პოპულარული