ბათუმის "დინამო": ფროლოვი პარასკევიდან, ანგისა აგვისტოდან [PHOTO]

ბათუმის "დინამოს" ახალი მთავარი მწვრთნელი კონსტანტინ ფროლოვია. უკრაინელი სპეციალისტის დანიშვნაზე პირველად "ლელო" იუწყებოდა, გუშინ კი ინფორმაცია ოფიციალურად დაგვიდასტურა კლუბის სპორტულმა დირექტორმა მალხაზ მახარაძემ.

შეგახსენებთ, რომ კონსტანტინ ფროლოვი საქართველოში უკვე მუშაობდა - 2014 წლის ოქტომბერში ქობულეთის "შუქურა" ჩაიბარა, მაგრამ ოდესის "ჩერნომორეცის" დუბლებისა და ყაზახეთის 17-წლამდელთა ნაკრების ყოფილმა დამრიგებელმა კლუბი მოულოდნელად, ზამთრის მოსამზადებელ ეტაპზე დატოვა, თუმცა წასვლის შემდეგ საქართველოზე თბილად ილაპარაკა. ბოლოს 44 წლის უკრაინელი სპეციალისტი ოდესის "ჩერნომორეცის" საფეხბურთო აკადემიის სპორტული დირექტორი გახლდათ.

რამდენიმე კანდიდატს შორის ფროლოვზე არჩევანის შეჩერება რამ განაპირობა? ეს კითხვა

მახარაძეს დავუსვით.

"ფროლოვს ქობულეთში მუშაობის დროს ვაკვირდებოდით და ძალიან კარგი შთაბეჭდილება დატოვა. მთავარი მწვრთნელის შესახებ კლუბის ხელმძღვანელობამ რომ ითათბირა, უმრავლესობამ ფროლოვის კანდიდატურა არჩია. ჯერ იმიტომ, რომ მცოდნე და კვალიფიციური მწვრთნელია; მეორე - მას ყველა დადებითად ახასიათებს, საქართველოშიც აქეს და უკრაინაშიც.

სხვათა შორის, ქობულეთში მუშაობისას გულშემატკივრებს ძალიან მოსწონდათ და მესამე და მნიშვნელოვანი ფაქტორი ისაა, რომ "შუქურაში" ხანმოკლე მუშაობის მიუხედავად, გუნდს საკუთარი ხელწერა სწრაფად დაატყო და სტადიონზე მაყურებელი შეაბრუნა", - ამბობს ბათუმელთა სპორტული დირექტორი.

მახარაძის თქმით, ფროლოვი ბათუმის "დინამოს" ხანმოკლე ვადით არ ჩაიბარებს:

"მას პარასკევს ველოდებით და საკითხი საბოლოოდ გადაწყდება, თუმცა სიტყვიერად ყველაფერზე მოვილაპარაკეთ. საქართველოში კონტრაქტის გაფორმება წელიწადზე ნაკლები ვადით არ შეიძლება და მინიმუმ, სეზონის ბოლომდე იმუშავებს, მაგრამ ხანმოკლე თანამშრომლობა თავადაც არ გვსურს. განათლებული სპეციალისტია და გვინდა, რომ სერიოზული საქმიანობა ჩაატაროს და ისეთი გუნდი ჩამოაყალიბოს, რომელსაც საკუთარი სახე გააჩნია.

რომ იცოდეთ, უკრაინული სტილის დიდი მოყვარული არ არის. ცხადია, ფეხბურთელებს ფიზიკურად მოღონიერება სჭირდებათ და ამაზე უკვე გვითხრა კიდეც, მაგრამ - მას ტექნიკური ფეხბურთი ხიბლავს. არც მიკვირს, ოდესელი კაცია, "ჩერნომორეცი" კი, უკრაინული გუნდებისგან განსხვავებით, ყოველთვის ტექნიკურ ფეხბურთს თამაშობდა".

ცნობილია, რომ ფროლოვი "ჩიხურასთან" შეხვედრას დაესწრო. მახარაძე ამბობს, რომ მან გუნდის პოტენციალზე წარმოდგენა შეიქმნა:

"ევროპალიგისთვის გუნდს გაძლიერება რომ სჭირდება - ამ შემადგენლობით გაგვიჭირდება, მაგრამ ეს მთლიანად ფროლოვის გადასაწყვეტია. ის მალე ჩამოვა და ეროვნულ ლიგაში 1-დან 16 ივნისამდე სანაკრებო პაუზაც დაიწყება.

ამ პერიოდში საშუალება ექნება, გუნდი მოამზადოს და ფეხბურთელები სასურველ ფიზიკურ კონდიციებამდე მიიყვანოს, მეორე ნახევარს უკეთეს მდგომარეობაში რომ შევხვდეთ, მაგრამ "ჩიხურასთან" მატჩის შემდეგ ფროლოვმა თქვა, რომ საკმაოდ დიდ რესურსს ხედავს და ფეხბურთელების სახით კარგი "მასალა" დახვდება".

ამასობაში, ბათუმის "დინამოს" ანგისას საფეხბურთო ბაზის მშენებლობა აქტიურ ფაზაში შევიდა. კლუბის მიერ გამოქვეყნებული ინფორმაციის თანახმად, კომპლექსი ბათუმელებს წლის ბოლომდე უნდა ჩაბარდეთ. "დინამოს" დირექტორი ოთარ ფედიჩკინი "ლელოსთან" ამბობს, რომ დაიმედებულია:

Sportall.Ge

"მშენებლობა ძალიან კარგი ტემპით მიმდინარეობს. სადრენაჟო სისტემა დაგებულია, ტრიბუნების კონსტრუქციები ამოყვანილია, სადაც გასახდელები, საშხაპეები და მსაჯისა და დელეგატის ოთახები მოეწყობა.

ამას გარდა, მოედნის პერიმეტრი შემოიღობა და ხალიჩის დასაგებად ემზადებიან. რომ იცოდეთ, ყველაზე ბოლო თაობის საფარი დაიგება. საქმე ხარისხიანად რომ შესრულდეს, თურქი სპეციალისტები იმუშავებენ, რომლებსაც დიდი ცოდნა და გამოცდილება გააჩნიათ.

არაა გამორიცხული, ანგისაში უკვე აგვისტოს დასაწყისში ვივარჯიშოთ. მერე კი მეორე, ბუნებრივსაფარიან მოედანსაც დააგებენ. ამ სამუშაოების დასრულების შემდეგ კი ტრიბუნაზე 1500 ინდივიდუალური სკამი დამონტაჟდება, რასაც დიდი დრო ნამდვილად არ სჭირდება".

Sportall.Ge