ჯაბა დვალი: თბილისის "დინამო" ის კლუბი არ არის, საიდანაც გარბიან

ეროვნული ჩემპიონატების ერთ-ერთი ყველაზე შედეგიანი თავდამსხმელი ჯაბა დვალი ამბობს, რომ ყოველ შეხვედრაში ცდილობს დაამტკიცოს, რომ ეროვნულ ნაკრებში მოხვედრას იმსახურებს.

მართლაც, ბოლო ორ სეზონში საქართველოს პირველობაზე 40 გოლი გაიტანა, ბოლო სამ ევროსეზონში კი - 16, რაც დამოუკიდებლობის პერიოდში ქართველებში საუკეთესო მაჩვენებელია.

ისიც სათქმელია, რაოდენობასთან ერთად, ჯაბა ხარისხიანი გოლებითაც გვამახსოვრებს თავს.

ეროვნულ ჩემპიონატში მის მიერ ქუთაისის "ტორპედოსთან" გატანილი გოლი კი ნამდვილი შედევრი იყო.

- სეზონი 20 გოლით დაასრულე. რომ არა "ზესტაფონიდან" "დინამოში" გადმოსვლისას აუცილებელი ადაპტაციის პერიოდი, უფრო მეტს გაიტანდი?
- გამორიცხული არაა. რაც უნდა იყოს, ნებისმიერ მოთამაშეს ესაჭიროება ადაპტაცია გუნდთან, მის სქემასთან და თანაგუნდელებთან. "დინამოში" ისე გადმოვედი, რომ მასთან ერთად შეკრებაც არ გამევლო და ჩემპიონატში ორი ტური იყო ნათამაშები.

ამის მიუხედავად, სულაც არ ვთვლი, რომ წარუმატებელი სეზონი მქონდა.

- საშემოდგომო ეტაპის ბოლოს გადაღლილობაც შეგეტყო...
- ყველაფერი ერთმანეთს დაემთხვა: "ზესტაფონში" ლიგაში მოსახვედრად მზადება ნაადრევად დავიწყეთ. "ნეფთჩისთან" გამოვარდნაც დიდი ფსიქოლოგიური ტრავმა იყო. მერე ერთი კვირა ვერ ვვარჯიშობდი, რადგან "ზესტაფონიდან" წამოვედი, ჩემი ამბავი ირკვეოდა და სხვაგან ვარჯიშის უფლება არ მქონდა.

ამ ყველაფრის გათვალისწინებით, ჩემი თავით უკმაყოფილო არ ვარ, რადგან წინა სეზონის მსგავსად, ახლაც 20 გოლი გავიტანე. ანუ შედეგი არ გამიუარესებია, თანაც ბევრი თამაში გამოვტოვე და ამას დაუმატეთ თქვენ მიერ ნახსენები ადაპტაციის პერიოდი. პირველ წრეში 17 მატჩში გატანილი 16 გოლი ცუდი შედეგი არ არის, მაგრამ მეორე წრეში მხოლოდ ოთხი გოლის გატანა შევძელი.

- წლევანდელი სეზონი იმითაც დაგამახსოვრდება, რომ "ასიანთა კლუბის" წევრი გახდი...
- ეს ძალიან მახარებს, მაგრამ ჯერ 27 წლის ვარ და მეტის გატანაც შეიძლება.

- როგორც ვიცი, კონტრაქტში გიწერია, რომ დაინტერესებული კლუბი მილიონი დოლარის საფასურად გამოგისყიდის...
- დიახ, კონტრაქტში ასეთი პირობა მართლაც ჩავწერეთ.

- შესაძლოა, ზედიზედ ორჯერ 20-20 გოლის გატანით ბევრი გუნდი დააინტერესო, მაგრამ საქართველოს ჩემპიონატის ფეხბურთელში მილიონ დოლარს ვინ გადაიხდის?
- "დინამოსთან" სამწლიანი კონტრაქტი გავაფორმე და სიმართლე გითხრათ, წასვლაზე არც ვფიქრობ.

- ამაზე საქართველოში ყველა ფეხბურთელი ფიქრობს...
- "დინამო" ტრადიციული კლუბია, სადაც მოხვედრა მართლა ბედნიერებაა და ამით განსხვავდება ბევრი კლუბისგან.

წლეულს მოვახერხეთ და საქართველოში პოზიციები დავიბრუნეთ, გავხდით ჩემპიონები და თასის მფლობელები. გუნდი აშკარად გაძლიერდა და თითოეულ ჩვენგანს ევროთასებზე წარმატებული თამაშის იმედი გაუჩნდა.

სულ იმაზე ვფიქრობ, საქართველოს და ჩვენს ხალხს რამხელა სიხარულს მივანიჭებთ, ჩემპიონთა ან ევროპის ლიგების ჯგუფურ ეტაპზე რომ მოვხვდეთ. ასეთი მიზნების მქონე გუნდიდან არ გარბიან.

"დინამოდან" მხოლოდ იმ შემთხვევაში წავალ, თუ კლუბს ვინმე კარგი წინადადებით მიმართავს და ტრანსფერზე შეუთანხმდება.

(იბეჭდება მცირე ცვლილებით)
ყოველდღიური სპორტული გაზეთი "ლელო"

ასევე იხილეთ:
თბილისის "დინამო" - მონატრებული ზეობა
საქართველოს ჩემპიონატის შეჯამება: სეზონის ნომინანტები
ჯაბა დვალი: 6:0-ითაც რომ ვიგებდეთ, სანამ არ გავიტან, ვერ ვისვენებ
ჯაბა დვალი: თბილისის "დინამო" ევროტურნირის ჯგუფურ ეტაპზე მოხვდება
ჯაბა დვალმა Sportall.ge-ს მკითხველებს უპასუხა