ტრავმა რომ მივიღე, "ტორპედოს" საქმეს ვაკეთებდი - ვინ დაეხმარება გიორგი ონიანს?

რა არის კაცობრიობის უმთავრესი მონაპოვარი?

დარწმუნებული ბრძანდებოდეთ, ამ კითხვაზე სწორ პასუხს ზოგი ქართველი პოლიტიკოსიც ვერ გაგცემთ. ამ კითხვაზე სწორი პასუხი ყველას რომ ჰქონდეს, ალბათ, ცოტათი მაინც უკეთესი ქვეყანა გვექნებოდა.

გიორგი ონიანის ამბავი გემახსოვრებათ. წინა სეზონში, საქართველოს დავით ყიფიანის სახელობის თასის გათამაშების მეოთხედფინალში, ბოლნისის "სიონთან" საპასუხო მატჩის მიწურულს ქუთაისის "ტორპედოს" მცველი მავთულღობის ბოძს შეეჯახა და მძიმე ტრავმა მიიღო - კისრის ერთი მალა ამოუვარდა, მეორე კი მოტყდა.



ონიანის სიცოცხლეს საფრთხე დაემუქრა, თუმცა ყველაფერი მშვიდობიანად დასრულდა - ფეხბურთელს ოპერაცია გაუკეთეს და გადარჩა.

"ლელო" დაახლოებით ორი კვირის წინათ შეეხმიანა ონიანს. მაშინ მან გვითხრა, ვარჯიშს სავარაუდოდ, შემოდგომაზე დავიწყებო.

ახლა ხელმეორედ მოვიკითხეთ ონიანი, რომელსაც "ტორპედომ" კონტრაქტის გაგრძელება არ შესთავაზა და შესაბამისად, თავისუფალი აგენტია.

"უკეთესად ვარ. ფიქსატორი რა ხანია, მომხსნეს, თუმცა ბოლომდე გამოჯანმრთელებული არ მეთქმის. მოძრაობის დროს ტკივილი ისევ მაწუხებს, შეხორცებას კიდევ მოუნდება გარკვეული დრო.

სარეაბილიტაციო პროცესი აუცილებლად დამჭირდება. ჩემი ბიძაშვილი გერმანიაში ქირურგია და ის დამაკვალიანებს.

ცხადია, რეაბილიტაცია ხარჯებთან არის დაკავშირებული. საქართველოში ასეთი სარეაბილიტაციო ცენტრი არ არის და ყველა ვარიანტში უცხოეთში მომიწევს წასვლა.

"ტორპედოსთან" კონტრაქტი დამიმთავრდა და კლუბი ვალდებული ალბათ არ არის, სარეაბილიტაციო კურსი რომ დამიფინანსოს, მაგრამ, ადამიანური თვალსაზრისით, ამ მხრივ უნდა დამეხმაროს. კლუბს ამის ინიციატივა არ გამოუჩენია, ჯერ არც მე მიმიმართავს "ტორპედოსთვის".

ეს ტრავმა რომ მივიღე, "ტორპედოს" საქმეს ვაკეთებდი. ამ ამბავთან დაკავშირებით კლუბის პრეზიდენტს ჩემთვის არ დაურეკავს, კლუბის დირექტორი გოგა პაპიაშვილი მეხმიანებოდა.

საავადმყოფოში მოვიდა ფეხბურთის ფედერაციის გენერალური მდივანი რევაზ არველაძე. მოგვიანებით მან ტელეფონითაც მომიკითხა.

ოპერაცია სახელმწიფოს ხარჯებით გამიკეთეს, რადგან ეს გადაუდებელი დახმარება გახლდათ. ამ ოპერაციის ხარჯების დასაფარად კლუბიც მზად იყო.

ვითამაშებ თუ არა ფეხბურთს, ამის გარანტიას ჯერ ვერავინ მაძლევს, სარეაბილიტაციო პროცესი კი ყველა ვარიანტში დამჭირდება", - გვითხრა ონიანმა.

ფეხბურთელმა ამ მცირე ინტერვიუში ადამიანური თვალსაზრისიც ახსენა, რაც იმ კითხვის პასუხია, თავში რომ დავსვით - კაცობრიობის მთავარი მონაპოვარი ადამიანია.

თუ ჯანმრთელობამ ხელი შეუწყო, ონიანი ისევ ითამაშებს ფეხბურთს, რადგან ეს საქმე კარგად იცის, ჯერ მხოლოდ 29 წლისაა და ფორმის აღდგენა არ უნდა გაუჭირდეს.

გიორგი თბილისის "ლოკომოტივიდან" გაგვეცნო, სადაც 2002-05 წლებში თამაშობდა. შემდეგ რამდენიმე ქართული გუნდი გამოიცვალა, 2008 წელს მეორე ბუნდესლიგის "კარლ ცაისში" 13 მატჩი ითამაშა, გუნდის საკვანძო ფეხბურთელი გახდა.

გახსოვთ სანდრო იაშვილი? ფეხები ზამბარასავით რომ ჰქონდა და ისე მაღლა ხტებოდა, საჰაერო ორთაბრძოლას ვერც ერთი აქაური მცველი ვერ უგებდა, თუმცა იყო გამონაკლისიც - სწორი პოზიციის შერჩევის ხარჯზე იაშვილის ამოკეტვა მხოლოდ გიორგი ონიანს შეეძლო.

ონიანი უნივერსალური მცველია, დაცვის ცენტრის გარდა, მარჯვენა ფლანგზეც შეუძლია თამაში. "ტორპედოში" მისვლამდე გორის "დილას" და "ზესტაფონის" ფეხბურთელი გახლდათ, ევროსარბიელზეც არაერთხელ უთამაშია.

ონიანის რეაბილიტაცია ღირსების საქმეა, ის სიკვდილს ბეწვზე გადაურჩა. იმ სტადიონზე თამაში რომ არ შეიძლება, სადაც უსაფრთხოების ზომები ბოლომდე დაცული არ არის, ამაზე პასუხისმგებლობა არავის აუღია. ვერც იმას მოითხოვს ვინმე, ონიანის სარეაბილიტაციო კურსი დააფინანსონ.

მაშ, როგორ არის ჩვენთან დაცული ადამიანი? მხოლოდ იმით, რომ სახელმწიფო გადაუდებელ ოპერაციას აფინანსებს?..

ონიანის ამბავს, წესითა და რიგით, რამე უნდა შეეცვალა ამ მხრივ. ვნახოთ, იქნებ ოდნავ უფრო ფასეული მაინც გახდეს ადამიანი საფეხბურთო მილეთში მაინც.

ყოველდღიური სპორტული გაზეთი "ლელო"

ასევე იხილეთ:
გიორგი ონიანი: მადლობა ღმერთს, გადავრჩი და მაიმედებენ, რომ თამაშს შევძლებ
"ბარსელონას" მწვრთნელი ონიანს: გიორგი, შენ გვერდით ვართ!
ექიმების პროგნოზი: გიორგი ონიანი თამაშს შეძლებს
სიონი-ტორპედო 2:0 - დამსახურებული სიხარული [VIDEO]