ფოთის მერი: სოსო ფილია იმიტომ არ მომიხსნია, რომ ჩემს შვილს არ ათამაშებდა

გასული კვირის ბოლოს ფოთის "კოლხეთის" ყოფილმა მთავარმა მწვრთნელმა სოსო ფილიამ პრესკონფერენცია გამართა და გუნდიდან მისი გათავისუფლების მიზეზებზე ალაპარაკდა.

მწვრთნელი ქალაქის მერს, დავით სარსანიას სასამართლოში უჩივის, რომელიც, ფილიას თქმით, გუნდში მისი შვილის უთამაშებლობის გამო გადაემტერა (იხილეთ ვრცლად).

აღნიშნულთან დაკავშირებით, ქალაქ ფოთის მერს, დავით სარსანიას კომენტარი ვთხოვეთ.

- ბატონო დავით, იცით, რომ "კოლხეთის" მთავარი მწვრთნელი სოსო ფილია ბრალს გდებთ - თითქოს გუნდიდან იმიტომ დაითხოვეთ, რომ თქვენს შვილს არ ათამაშებდა?
- ეს არის აბსურდი. ბატონ სოსოს დაუმთავრდა კონტრაქტი. 1970 წლიდან ეს კაცი წლების მანძილზე წვრთნიდა გუნდს, ყველანაირი რესურსი ამოწურა.

- ვისზე ამბობთ ამას... (არ მამთავრებინებს)
- როცა 18 თამაშში 16 წააგო და 2 ფრედ ითამაშა... ახლა რომ იძახის, მერის შვილი არ ვათამაშე და მაგიტომ მომხსნაო, ეს არის დიდი ტყუილი.

- ანუ არ გითხოვიათ?
- არასდროს, არც მისთვის და არც მისი წინამორბედისთვის არ მითხოვია, რომ ეთამაშებინათ ჩემი შვილი. მით უმეტეს, რომ ჩემი ვაჟი იტალიაში თამაშობდა.

- რომელ გუნდში თამაშობდა, შეგიძლიათ გვითხრათ?
(სამწუხაროდ, ტელეფონში ვერ გავიგე გუნდის სახელი)

- სად თამაშობდა ეს გუნდი?
- სერია B-ში.

- თქვენი შვილი სერია B-ში თამაშობდა? ეს აუცილებლად გვეცოდინებოდა.
- სერია B-ს გუნდის დუბლებში თამაშობდა. ასევე, სერია B-ს გუნდებთან ამხანაგურ შეხვედრებშიც (?! - ავტ.). მიუხედავად ამისა, მწვრთნელისთვის არასდროს მითხოვია არაფერი.

- ბატონო დავით, მერიაში შეხვედრისას სოსო ფილიასთან... (მაწყვეტინებს)
- არსად, არც გუნდის შეკრების დროს გრიგოლეთში, ურეკში... არასდროს მიბრძანებია მისთვის, ეთამაშებინა ჩემი შვილი.

- არც ისე გითხოვიათ?
- არასდროს! ეს არის უსინდისო და უპასუხისმგებლო განცხადება. კაცობას გეფიცებით! სოსო ფილია კი არა, ჟოზე მოურინიო მოხსნეს. გერმანული ფინალი რომ იყო ჩემპიონთა ლიგაზე, მოგებული გუნდის მთავარი მწვრთნელი მეორე დღესვე მოხსნეს.

- ბატონო დავით, როგორც ჩანს, ფეხბურთში ვერ ერკვევით - იუპ ჰაინკესის შეცვლა მანამდე იყო გადაწყვეტილი პეპ გვარდიოლათი. კარგი, ამას შევეშვათ. ზემოთ მითხარით, სოსო ფილიამ რესურსი ამოწურაო. ამის თქმა, მინიმუმ, უხერხულია. ქვეყნის ერთ-ერთ გამორჩეულ მწვრთნელზე ამბობთ ამას.
- ჩემთვის მთავარი შედეგია. გუნდი მის ხელში უმაღლესი ლიგიდან გავარდა.

- ჰო, მაგრამ რა მდგომარეობაში ჩაიბარა გუნდი, იცით?
- მე ეს არ მაინტერესებს, ცუდი მემკვიდრეობა შესაძლოა დაგხვდეს, მაგრამ უნდა გამოასწორო.

- თუმცა "კოლხეთის" შემთხვევაში, ეს შეუძლებელი იყო. თქვენ სტადიონზე დადიოდით?
- რა თქმა უნდა!

- მერე იცით, რომ ფილიამ 18-დან 16 კი არ წააგო, არამედ ბოლო ეტაპზე 10 თამაშიდან 3 მოიგო, 4 ფრედ ითამაშა და მხოლოდ 3 წააგო...
- მე მარტო ფილიაზე არ მითქვამს, 18-დან 16 წააგოო.

- რატომ სთხოვთ პასუხს ფილიას სხვის გამო?
- ჩემთვის მთავარი შედეგია. ფულს ვიხდი, ვაფინანსებ და კლუბის 100-წლიან იუბილეზე გუნდი ლიგიდან გავარდა. ათი თამაშიდან სამს რომ მოიგებ, ეს კი არაა მაგარი, არამედ ექვს-შვიდს რომ მოიგებ. თქვენ კი მეუბნებით, ფილია მაგარიაო. რა კუთხითაა მაგარი, პროფესიონალია?

- რა თქმა უნდა! ამაზე თქვენთან დავას არ ვაპირებ.
- მე ვარ ქალაქის მერი, ფეხბურთის და გუნდის გულშემატკივარი, ჩემთვის მთავარი შედეგია - გუნდი გადავიდეს უმაღლეს ლიგაში.

- გასაგებია, წარმატებებს გისურვებთ.
- დამამთავრებინეთ. თუ ვინმეს რამე პრეტენზია აქვს, ოჯახზე არ უნდა გადადიოდეს, ეს არის უსინდისობა. მით უფრო, რომ არასდროს არავისთვის არაფერი მითხოვია. წარმოიდგინეთ, ბავშვი სერია B-ში თამაშობდა და აქ 32 თამაშში ერთხელაც არ ათამაშეს. მთელი სეზონის მანძილზე შემეძლო მწვრთნელი შემეცვალა, თუ ამის გამო ვთხოვდი პასუხს.

(იბეჭდება მცირე ცვლილებით)
ყოველდღიური სპორტული გაზეთი "ლელო"

ასევე იხილეთ:
სოსო ფილია: მერის შვილი არ ვათამაშე და "კოლხეთიდან" გამიშვეს
ზაზა ინიაშვილი: ფოთის სურვილია, "კოლხეთი" უმაღლესში დავაბრუნოთ
და რა ელის ფოთის "კოლხეთს" 2013/14 წლების სეზონში?
ფოთის "კოლხეთი" - გაუფერულებული იუბილე
ეკა ბესელია: იმედი მაქვს, "კოლხეთის" იუბილეს პირველ ლიგაში არ შევხვდებით!