ცხინვალის "სპარტაკი" დამდეგი სეზონისთვის დაუბრუნდა უმაღლეს ლიგას და საქმეს ისეთი პირი უჩანს, რომ მოკრძალებული მიზნებისთვის აღარ იბრძოლებს.24 წლის ლევან ჭაფოძე "სპარტაკის" ერთ-ერთი საკვანძო ფეხბურთელი გახლავთ. ის მეტწილად მარჯვენა მცველად თამაშობს ამ გუნდში.
"სპარტაკმა" მოსამზადებელი ეტაპი ბაკურიანში შეკრებით დაიწყო, იქიდან დაბრუნებულმა კი ჯერ მხოლოდ ერთი საკონტროლო შეხვედრა გამართა, რუსთავის "მეტალურგთან" 0:0 ითამაშა.
"უკვე შეიძლება იმის თქმა, რომ უმაღლეს ლიგაში "სპარტაკს" სულ სხვა მიზნები ექნება, ვიდრე მანამდე ჰქონდა.
"დინამოდან" დავიმატეთ ნიკა კვეკვესკირი, გიორგი თექთურმანიძე და ლაშა ჩაფიძე. ისინი ნელ-ნელა შეთამაშდებიან ახალ
ზედა ექვსეულში უნდა მოვხვდეთ, თასის გათამაშებაში კი რაც შეიძლება შორს უნდა წავიდეთ", - გვითხრა ჭაფოძემ.
ერთი სიტყვით, თუ მანამდე "სპარტაკის" ამოცანა უმაღლეს ლიგაში ადგილის შენარჩუნება იყო, ახლა უკვე ვლადიმერ ხაჩიძის გაწვრთნილ გუნდს მეტი მოეთხოვება.
"გუნდში ორი გამოცდილი ფეხბურთელი გვყავს - ნიკა მგელაძე და ზვიად მეტრეველი.
იყო დრო, როცა "სპარტაკში" ძალიან ბევრი გამოცდილი ფეხბურთელი თამაშობდა, მაგრამ გუნდი უმაღლესი ლიგიდან გავარდა, ახლა კი ახალგაზრდული ჟინითა და სულისკვეთებით უნდა ვიბრძოლოთ. ვფიქრობ, ასე აჯობებს", - ესეც ჭაფოძის სიტყვებია.
"სპარტაკის" მარჯვენა მცველსა და ვიცე-კაპიტანს იმაზეც ჩამოვუგდეთ სიტყვა, თუ რა თარგზე იქნება მოჭრილი "სპარტაკი" 2013/14 წლების სეზონისთვის.
"მარჯვნიდან თორნიკე თუხარელი და მარცხნიდან ლაშა ჩაფიძე - ორივე სწრაფი, ტექნიკური ფეხბურთელია, ფლანგიდან მოწინააღმდეგის დაწიოკება რომ შეუძლიათ.
ჩვენი შეტევებიც უფრო ფლანგურ გარღვევებსა და ჩაწოდებებზე იქნება აქცენტირებული, თუნდაც იმიტომ, რომ "სპარტაკის" ცენტრალური თავდამსხმელი ზვიად მეტრეველი თავით კარგად თამაშობს", - ამბობს ჭაფოძე.
დანარჩენი კი სეზონის განახლებიდან გამოჩნდება. "სპარტაკში" ისეთმა ფეხბურთელებმა მოიყარეს თავი, რომ ხაჩიძის გუნდი, ალბათ, მხოლოდ ფლანგებიდან არ შეუდგება იერიშებს.
ყოველდღიური სპორტული გაზეთი "ლელო"
ასევე იხილეთ:
რუსთავის "მეტალურგისა" და ცხინვალის "სპარტაკის" სპარინგი აუტანელ სიცხეში
ცხინვალის "სპარტაკი" მოსამზადებლად ბაკურიანში გაემგზავრა
სამზადისი. ცხინვალის "სპარტაკი": სელექცია გრძელდება
ვლადიმერ ხაჩიძე: ჩვენი ჩემპიონატი ნაკრებისთვის კონვეიერად ვერ გამოდგება
ვლადიმერ ხაჩიძე: ცხინვალის "სპარტაკის" კოზირი გუნდის ხელწერაა
ვლადიმერ ხაჩიძე: ქომაგი რომ გვყოლოდა, არ დავქვეითდებოდით
ზვიად მეტრეველი: მადლობა პრეზიდენტს, დიმა სანაკოევი სულ გვერდში გვედგა!
