ლევან შარიქაძე: არ დავმალავ, "სამტრედიიდან" მართლაც შემეხმიანნენ

"ზესტაფონი" რამდენიმე ფეხბურთელმა დატოვა. მათ შორისაა ლევან შარიქაძეც. სამი წლის განმავლობაში ის მარგველთა ერთ-ერთი ლიდერი გახლდათ. 25 წლის საყრდენი ნახევარმცველის გარეშე "ზესტაფონის" წარმოდგენა ძალიან რთულია.

შარიქაძემ კარიერის გაგრძელება სხვა გუნდში ისურვა...

- მინდა, დიდი მადლობა გადავუხადო "ზესტაფონის" ხელმძღვანელობასა და თითოეულ გულშემატკივარს. გადაჭარბების გარეშე ვიტყვი: ამ გუნდში გატარებული პერიოდით კმაყოფილი ვარ - ტიტულები მოვიგე, გავხდი საქართველოს ჩემპიონი, გულშემატკივრების მხრიდან მუდამ საუკეთესო დამოკიდებულებას ვგრძნობდი...

სხვა რა უნდა ფეხბურთელს? მუდამ სიამოვნებით გავიხსენებ "ზესტაფონში" ყოფნის პერიოდს.

- რატომ დატოვეთ "ზესტაფონი"?
- ჩემი აზრით, სამი წელი საკმარისი დროა საიმისოდ, რომ ამა თუ იმ გუნდში ბოლომდე მოახდინო საკუთარი შესაძლებლობების რეალიზაცია.

მივიჩნიე, რომ "ზესტაფონში" საკუთარი თავი ამოვწურე და უპრიანია, ჩემი კარიერა ახალ ეტაპზე გადავიდეს.

- და რომელ გუნდში აპირებთ კარიერის გაგრძელებას?
- სიმართლე გითხრათ, ჯერ საბოლოოდ არ გადამიწყვეტია. არის რამდენიმე ვარიანტი. დავფიქრდები, ავწონ-დავწონი და ამის მერე მივიღებ გადაწყვეტილებას.

- დანამდვილებით ვიცით, რომ თქვენთან თანამშრომლობა "სამტრედიას" სურს. ეს ბუნებრივიცაა, რადგან ამ გუნდის მწვრთნელებმა კარგად იციან თქვენი შესაძლებლობები...
- არ დავმალავ, "სამტრედიიდან" მართლაც შემეხმიანნენ, თუმცა საბოლოო გადაწყვეტილება ჯერ არ მიმიღია.

- კარგა ხანია, საქართველოს ჩემპიონატში თამაშობთ. საინტერესოა თქვენი აზრი - მაინც, საით მიდის ჩვენი პირველობა?
- ჩემი აზრით, წინ ვერ მივდივართ. ეს ფაქტია...

(იბეჭდება მცირე ცვლილებით)
ყოველდღიური სპორტული გაზეთი "ლელო"