სამტრედია-შერიფი 0:1 - იაშვილთან და ხიზანიშვილთან ერთად [VIDEO]

ფოტოზე: ზურაბ ხიზანიშვილი (მარცხნივ)

თურქულ შეკრებაზე "სამტრედიამ" მესამე საკონტროლო მატჩი გამართა. პოლონურ "პიასტთან" (1:3) და კორეულ "ჯეჯუ იუნაიტედთან" (1:1) მატჩების შემდეგ ზაზა ზამთარაძის გუნდი ტირასპოლის "შერიფს" დაუპირისპირდა და მინიმალური ანგარიშით დამარცხდა.

"შერიფის" ვებგვერდს თუ დავუჯერებთ, მატჩი საკმაოდ სწრაფ ტემპში წარიმართა, სანახაობრივიც გამოდგა და დაძაბულიც - მეტოქეები ერთმანეთს თითოეული ბურთისთვის ეომებოდნენ. თუმცა საგოლე მომენტები იშვიათად იქმნებოდა.

"სამტრედიამ" მე-15 წუთზე მშვენიერი შეტევა წამოიწყო, მაგრამ მცველებმა ვითარება განმუხტეს. მე-19 წუთზე სიტუაცია დაიძაბა, როცა ჩვენი მცველი მსაჯის გადაწყვეტილებით უკმაყოფილო დარჩა და მეტოქესთან წაიკინკლავა. კონფლიქტი მალევე მოგვარდა, მაგრამ ემოციებმა ტაიმის ბოლო წუთზეც იფეთქა - ამჯერად, მსაჯმა ფეხბურთელები შესვენების მაუწყებელი სასტვენით დაამშვიდა.

მეორე ტაიმში რეალური საგოლე მომენტი ტირასპოლელთა ბრაზილიელ ლეგიონერ კადუს ჰქონდა, როცა მეკარესთან პირისპირ გავიდა, მაგრამ რევაზ თევდორაძეს ვერ აჯობა.

სამწუხაროდ, 90-ე წუთზე "შერიფმა" მაინც გაიტანა. იმავე კადუმ მშვენიერი გადაცემით დასარტყმელ პოზიციაზე გაიყვანა ევგენი რებეჟა, რომელმაც გამარჯვების გოლი გაიტანა.

საინტერესოა, რომ მეორე ტაიმში სამტრედიელთა შორის ვეტერანი ფორვარდი ალექსანდრე იაშვილი გამოჩნდა. მან ცენტრალური თავდამსხმელი ილია კერძევაძე შეცვალა. მატჩი სრულად ჩაატარა ზურაბ ხიზანიშვილმაც.

იაშვილი გუნდს შეკრებაზე პირველივე დღიდან ახლავს, მაგრამ ჯერ უცნობია, დაეხმარება თუ არა მეორე წრეში სამტრედიელებს.

სამტრედია: თევდორაძე - გრიგალაშვილი, კაკუბავა, ხიზანიშვილი, კვირკველია - დათუნაიშვილი, ბეჭვაია - დოლიძე, შარიქაძე, გეწაძე - კერძევაძე; შეცვლაზე: გორგიაშვილი, თევზაძე, იაშვილი.

ყოველდღიური სპორტული გაზეთი "ლელო"