ახლად ჩამოყალიბებულმა "რუსთავმა" პირველი საშინაო მატჩი წარმატებით ჩაატარა და არცთუ ხელწამოსაკრავი მეტოქე დიდი ანგარიშით დაამარცხა. შესაძლოა, მატჩის საბოლოო ანგარიში მოედანზე არსებულ "ძალთა თანაფარდობას" ბოლომდე არც შეეფერებოდეს: პირველი გაშვებული გოლის მერე სტუმრები საგრძნობლად გააქტიურდნენ და გიზო შენგელიას შეგირდებმა რამდენიმე მწვავე იერიშიც განახორციელეს, მაგრამ მასპინძელთა 22 წლის მეკარე დავით ლეგაშვილი საიმედოდ თამაშობდა.
და არა მხოლოდ მასპინძელთა მეკარე: "რუსთავის" ფეხბურთელებს ჯერჯერობით აშკარად აკლიათ ერთმანეთში შეთამაშება, მაგრამ ეს უფრო დროის ამბავია; საერთოდ კი, ამ ახლად ჩამოყალიბებულმა გუნდმა მეტოქეზე ბევრად უფრო მეტი სახიფათო მომენტიც შექმნა
პირველ ტაიმში გოლის გატანის კარგი შანსი ჰქონდა ლევან ბერუაშვილს, რომლის თავური დარტყმაც მეტოქის კარს მცირე მანძილით ასცდა; მერე საქმეში სტუმართა ლეგიონერი მეკარე ჩარლემან აკმელი ჩაერთო, რომელმაც გურამ მინდორაშვილის დარტყმა მოიგერია.
თუმცა მოტივირებულად მოასპარეზე მასპინძლებმა მაინც შეძლეს შესვენებამდე დაწინაურება: 19 წლის მიხეილ ლომიძის აქტიურობას სტუმართა საჯარიმოში თითქმის 100-პროცენტიანი პენალტი მოჰყვა, რომელიც ჩინებულად შეასრულა "რუსთავის" 19 წლის კაპიტანმა გიორგი კილასონიამ.
შესვენების შემდეგ მასპინძელთა თავკაცმა გიორგი მიშველიძემ გუნდის სათამაშო სქემა "გადააწყო" და მოედანზე კიდევ ერთი ახალწვეული, დავით იმედაშვილი შემოიყვანა. 30 წლის იმედაშვილი და 29 წლის ზვიად მეტრეველი, აი, "რუსთავის" ორად-ორი გამოცდილი ფეხბურთელი და იმასაც ვიტყვით, რომ ორივე მათგანი მშობლიური ქალაქის გუნდში გარკვეული პაუზის მერე დაბრუნდა.
იმედაშვილმა "საყრდენის" პოზიცია დაიკავა და ერთი-ორჯერ საინტერესო კომბინაციაც გაითამაშა 18-19 წლის პარტნიორებთან; საგრძნობლად გააქტიურდა 18 წლის ავთანდილ გუჯაბიძე, ერთ ეპიზოდში შეუჩერებლად რომ გზავნიდა ბურთს მეტოქის კარისკენ; ამას მასპინძელთა კიდევ ერთი სახიფათო მომენტი მოჰყვა: გიორგი კილასონიას კუთხურის მერე ლევან ბერუაშვილი თავით ცდილობდა გოლის გატანას, მაგრამ მცირედი დააკლდა.
თუმცა, "რუსთავის" ცენტრალურ მცველს მესამე ცდაზე მაინც გაუმართლა: უკვე მსაჯის მიერ დამატებული დრო იწურებოდა, როცა ბერუაშვილმა კუთხურიდან ჩამოწოდებული ბურთი მეტოქის კარში თავით ზუსტად გადაგზავნა.
მანამდე კი იყო ეპიზოდი, რომელმაც, ფაქტობრივად, გადაწყვიტა კიდეც მატჩის ბედი: მარცხენა ფლანგიდან გიორგი ჩიკვაიძემ მეტოქის საჯარიმოში გამჭოლი გადაცემა გააკეთა, რასაც ის მოჰყვა, რომ სტუმართა მცველმა ბურთი საკუთარ კარში ჩაჭრა...
საქართველოს ჩემპიონატი. პირველი ლიგა. II ტური
06.09. რუსთავი. "ფოლადი"
რუსთავი-სამეგრელო 3:0
გოლები" 1:0 გ. კილასონია (45), 2:0 ზ. ლობჟანიძე (79, საკუთარ კარში), 3:0 ლ. ბერუაშვილი (90)
რუსთავი (5-3-2): დ. ლეგაშვილი - გ. ჩიკვაიძე (87. გ. სილაგაძე), გ. სამადაშვილი, ლ. ბერუაშვილი, გ. ბუზალაძე, გ. მინდორაშვილი (46. დ. იმედაშვილი) - მ. ლომიძე, გ. კილასონია, ა. გუჯაბიძე (89. გ. ბებია) - ზ. ციცქიშვილი (75. გ. ბერაძე), ზ. მეტრეველი (83. ბ. ოქროპირიძე).
სათადარიგოები: გ. შუბითიძე, გ. ნადირაძე
მწვრთნელი: გიორგი მიშველიძე
სამეგრელო (5-3-2): ჩ. აკმელი - ა. წაბრია, ბ. დარსალია (78. ზ. სახოკია), ზ. ლობჟანიძე, ბ. ლუკავა, ი. ტყებუჩავა - მ. თოლორდავა (31. კ. ქებურია), ზ. ქვარცხავა, ლ. კალანდია (67. ა. ყალიჩავა) - ი. დეისაძე, გ. ხორავა (46. ი. ასათიანი).
სათადარიგოები: გ. პაპავა, გ. ხარებავა
მწვრთნელი: გიზო შენგელია
გაფრთხილება: ი. ტყებუჩავა, კ. ქებურია
არბიტრი: ბ. გლუშჩუკი.
სხვა მატჩები
ალგეთი-ჩხერიმელა 0:2
ჭიათურა-გაგრა 1:3
იმერეთი-მერცხალი 2:0
სქური-ოდიში1919 2:0
ლიახვი-მეშახტე 7:0
ვიტ ჯორჯია-ბორჯომი 0:2
კოლხეთი (ხ)-სამგურალი 1:0
მაჭახელა-ბეთლემი 1:2
სატურნირო ცხრილი
ა გ თ მ ფ წ ბ ქ
1. გაგრა 2 2 0 0 7-1 6
2. ბორჯომი 2 2 0 0 7-2 6
3. ბეთლემი 2 2 0 0 4-1 6
4. კოლხეთი (ხ) 2 2 0 0 3-1 6
5. ლიახვი 2 1 1 0 9-2 4
6. სქური 2 1 1 0 3-1 4
7. რუსთავი 2 1 0 1 3-2 3
8. იმერეთი 2 1 0 1 3-2 3
9. ჩხერიმელა 2 1 0 1 3-3 3
10. სამეგრელო 2 1 0 1 3-3 3
11. ვიტ ჯორჯია 2 1 0 1 3-3 3
12. მაჭახელა 2 0 1 1 2-3 1
13. მერცხალი 2 0 1 1 2-4 1
14. ჭიათურა 2 0 1 1 1-3 1
15. მეშახტე 2 0 1 1 0-7 1
16. სამგურალი 2 0 0 2 0-4 0
17. ოდიში 1919 2 0 0 2 2-7 0
18. ალგეთი 2 0 0 2 0-6 0
ყოველდღიური სპორტული გაზეთი "ლელო"
