ვინ როგორ დაისჯება? - თერჯოლის "საპოვნელა" სამართალს ეძებს

დღეს საქართველოს ფეხბურთის ფედერაციის სადისციპლინო კომიტეტის წევრები შეიკრიბებიან და XXV ტურში მომხდარ ინციდენტებზე იმსჯელებენ. მათი ყურადღება ორმა მატჩმა მიიქცია - მიხეილ მესხის სახელობის სტადიონზე თბილისის "ლოკომოტივისა" და მარტვილის "მერანის" შეხვედრაში ვითარება ბოლოსკენ დაიძაბა: სტუმართა გოლის დროს "ლოკომოტივის" მწვრთნელ ჟერარ სარაგოსას კონფლიქტი მოუვიდა მოწინააღმდეგის სამწვრთნელო შტაბის წარმომადგენელთან. გაწევ-გამოწევა მატჩის დასრულების შემდეგ კიდევ უფრო გამძაფრდა და მხარეები მხოლოდ სტადიონის დაცვამ დააშოშმინა.

დისციპლინარები ქობულეთის "შუქურასა" და გორის "დილას" მატჩის დროს მომხდარზეც იმსჯელებენ. არბიტრმა ბაკურ ნინუამ სათადარიგოთა სკამიდან სტუმართა მთავარი მწვრთნელი უჩა სოსიაშვილი გააძევა.

მაგრამ ყველაზე ხმაურიანი ინციდენტი მოხდა ზესტაფონში, სადაც თერჯოლის "საპოვნელამ" "ზუგდიდს" უმასპინძლა. აუტსაიდერთა პრინციპული მატჩი 2:2 დასრულდა, რაშიც, თერჯოლელთა აზრით, დიდი როლი არბიტრ გიორგი ყრუაშვილს მიუძღვის. როგორც ამბობენ, მან "საპოვნელა" დაჩაგრა. უმაღლეს ლიგაში ადგილის შენარჩუნებისთვის მებრძოლმა თერჯოლელებმა მნიშვნელოვანი ქულები დაკარგეს.

"რაც მსაჯებმა ჩვენ გაგვიკეთეს, ძალიან მოულოდნელი იყო. შეხვედრის მნიშვნელობიდან გამომდინარე, ფეხბურთის ფედერაციის სამსაჯო კომიტეტმა მატჩზე ხუთი არბიტრი გამოაგზავნა.

მეგონა, თამაშს ობიექტურად განსჯიდნენ, მაგრამ იმედები გამიცრუვდა. მერე გამახსენდა მატჩის წინ ერთ-ერთ ინტერნეტგაზეთში გამოქვეყნებული წერილი, რომ "ზუგდიდი" ამ თამაშს მოიგებდა.

მაინტერესებს, ამას რა ინფორმაციის საფუძველზე წერდნენ? ასეთი "რასკლადი" იყო? ეს და თამაშის დროს მომხდარი ამბები მაფიქრებს - რა ხდება ასეთი ჩვენს თავს? მით უფრო, რომ თამაშის დროს ჩვენ არ ჩაგვითვალეს გიორგი მაკარიძის მიერ გატანილი ნაღდი გოლი. მალე გიორგი ბიბილეიშვილი საჯარიმოში წააქციეს და პენალტი ვერ გაიმეტეს, მაშინ, როცა ამას უცებ ჩვენს კარში დანიშნული 11-მეტრიანი მოჰყვა და ანგარიში 2:2 გახდა. მანამდე იგივე მაკარიძე საჯარიმოში მოცელეს და პენალტის ნაცვლად, მხოლოდ ჯარიმა დაგვინიშნეს. ამ დროს, ჩვენი ფეხბურთელი საჯარიმოში წააქციეს და არა მის გარეთ და ეს ყველამ ცხადად ნახა", - ამბობს "საპოვნელას" დირექტორი მირიან გეწაძე.

მას არ სურს "შეთქმულების თეორიებით" მსჯელობა, თუმცა გარკვეული ვარაუდები გააჩნია:

"მომხდარში ფედერაციას არ ვადანაშაულებ, მაგრამ მეორე მხრივ, ისე გამოდის, რომ "ზუგდიდს" სტადიონს უშენებენ და იქნებ ამხელა ფულის დახარჯვის შემდეგ მისი ლიგიდან გავარდნა გარკვეულ წრეს არც აწყობს? ეს იმ დროს, როცა ჩვენ ლიცენზირების პროცესი გავიარეთ და იმედია, ეროვნულ ჩემპიონატში თამაშის უფლებას მივიღებთ.

თუმცა "საპოვნელას" სტადიონი მოსაწესრიგებელია და იქნებ ასეთი გუნდი უმაღლეს ლიგაში არც სჭირდებათ? ვიმეორებ, ამის დაჯერება არ მინდა, მაგრამ ფაქტია, რომ უშუალო კონკურენტ "ზუგდიდთან" დავიჩაგრეთ.

მჯერა, ამ მატჩის მსაჯობას ფედერაცია სათანადოდ შეაფასებს, მაგრამ ჩვენ პენალტი "დინამოსთანაც" დაუმსახურებლად დაგვიდეს და ქულა წაგვართვეს, ახლა კი, მოგების ნაცვლად, მხოლოდ ერთ ქულას დაგვაჯერეს და მსაჯის დასჯას ჩვენთვის რაღა აზრი აქვს, ამ სამ ქულას ვინმე დაგვიმატებს?

მეც ვიცი, რომ რეალურად, უმაღლეს ლიგაში დარჩენის შანსი თითქმის აღარ გვაქვს, მაგრამ ერთი სათხოვარი გვექნება - ამაში ხელს მაინც ნუ შეგვიწყობენ".

სცემეს თუ არა მსაჯებს თამაშის შემდეგ? გავრცელდა ინფორმაცია, რომ ისინი მოედნის დატოვებას დიდხანს ვერ ახერხებდნენ და, თითქოს, თამაშის დასრულების შემდეგ მათ ფიზიკური შეურაცხყოფა მიაყენეს. გეწაძეს ამ ინციდენტზეც ვკითხეთ:

"ხალხი გამწარებული იყო და თამაშის შემდეგ აღშფოთებას ვერ მალავდა, მაგრამ მე გასახდელამდე ვერ მივაღწიე, რადგან სტადიონის დაცვამ იქამდე არც მიმიშვა - თურმე, კლუბის დირექტორს ამის უფლება არ მქონდა. ამიტომ მე ვერ დავინახე, იქ რა მოხდა და მსაჯებს ვინმემ დაარტყა თუ არა".

(იბეჭდება მცირე ცვლილებით)
ყოველდღიური სპორტული გაზეთი "ლელო"