ფოტოზე: ამ სტადიონზე თამაშობს ჩვენი მომავალი მეტოქემსოფლიოს ჩემპიონატის შესარჩევ ციკლში მოლდოვასთან სტუმრობამდე, ჩვენი ქვეყნის უპირველესი გუნდი სენტ კიტსისა და ნევისის ეროვნულ ნაკრებს უმასპინძლებს.
ორიოდე სიტყვით მეტოქეზე. ამ დროისთვის სტ. კიტსისა და ნევისის ნაკრები ფიფას რეიტინგში ჩვენზე გაცილებით წინ (89-ე ადგილი) არის. გუნდის სათავეში დგას 41 წლის მექსიკელი სპეციალისტი ჟაკ პასი.
ამ ქვეყნის ნაკრების ისტორიაში პასი პირველი უცხოელი მწვრთნელია. გუნდის ძირითად ბირთვს ინგლისში მოთამაშე ფეხბურთელები წარმოადგენენ: ნახევარმცველები - რომეინ სოიერსი ("ბრენტფორდი"), ლოის მეინარდი ("ტრანმერი") და ჯეისონ სენტ ჯასტი ("ბოსტონ იუნაიტედი").
ინგლისურ "ბეროუში" თამაშობს გუნდის ერთ-ერთი ლიდერი ჰარი პანაიოტუ. ამ ფეხბურთელს "ლესტერის" სკოლა აქვს გამოვლილი, ზეფანია ტომასი კი ინგლისურ "მაკლეოვერში" ირიცხება.
საინტერესოა, რომ ამ ნაკრების არაერთი ფეხბურთელი დაბადებულია ინგლისში და, შესაბამისად, საფეხბურთო განათლებაც ამ ქვეყანაში აქვს მიღებული.
2016 წლის ნოემბერგში სტ. კიტსისა და ნევისის ნაკრებმა შინ 1:1 ითამაშა ესტონეთთან, ამავე ნაკრებთან ერთი წლით ადრე ტალინში 0:3 წააგო, ხოლო ანდორას 1:0 სძლია. თბილისურ შეხვედრამდე კი ჩვენმა მეტოქემ გასვლაზე ერევანში სომხეთთან ისპარინგა და 0:5 დამარცხდა.
დოსიე
სენტ კიტსი და ნევისი
ეს არის ორი კუნძულისგან შემდგარი სუვერენული, ფედერაციული სახელმწიფო კარიბის ზღვაში (ცენტრალური ამერიკა). ქვეყნის მეთაურია დიდი ბრიტანეთის დედოფალი. დამოუკიდებლობა მიიღო 1983 წელს.
დედაქალაქი და ყველაზე დიდი ქალაქია ბასეტერი. ქვეყნის მოსახლეობა 54 ათასია, ხოლო ტერიტორიის ფართობი - 261 კვ/კმ.
საფეხბურთო ასოციაცია დაარსდა 1932 წელს. ფიფას წევრი მხოლოდ 1992 წელს გახდა, ორი წლით ადრე კი რეგიონულ (კონკაკაფი) ასოციაციაში გაწევრიანდა.
ნაკრებს საერთაშორისო ასპარეზზე არაოფიციალური დებიუტი ჰქონდა 1979 წელს, როცა იამაიკასთან 1:2 დამარცხდა. თამაშობს 5-ათასიან "უორნერ პარკზე".
(იბეჭდება მცირე ცვლილებით)
ყოველდღიური სპორტული გაზეთი "ლელო"
