უკრაინასთან მატჩში საქართველოს ეროვნული ნაკრებიდან ერთადერთი გოლი დანიური "ორჰუსის" 26 წლის შემტევმა მათე ვაწაძემ გაიტანა. გოლი კი ისეთი გამოვიდა, ნაღდ ფორვარდს რომ შეჰფერის - მათემ ნახტომში, მძლავრი თავურით აიღო მეტოქის კარი.
"ლელო" ვაწაძეს ავსტრიაში, ეროვნული გუნდის პოლონეთში გამგზავრებამდე დაუკავშირდა და ეს მცირე ინტერვიუ ჩაწერა.
- მათე, შეაფასეთ უკრაინასთან ჩატარებული ამხანაგური მატჩი...
- ჩემი აზრით, თამაშის ხარისხი უკეთესი იყო, ვიდრე წინა შეხვედრებში. ამის მიუხედავად, შედეგით ყველანი ძალიან უკმაყოფილონი ვართ.
- რამდენად რთული იყო ორბურთიანი ჩამორჩენის
- კარგია, ეს რომ შევძელით, ბოლო წუთები შეტევაში გავატარეთ. შეგვეძლო, მეორე გოლიც გაგვეტანა, მომენტებიც გვქონდა, მაგრამ...
- რას იტყვით საკუთარ თამაშზე?
- ამაზე მე ვერაფერს ვიტყვი, ჯობია, ეს სპეციალისტებმა გააკეთონ. რაც შეეხება საერთო სურათს, ყველა ფეხბურთელი შეეცადა, მაქსიმუმი დაედო მინდორზე. ვფიქრობ, რომ არა დასანანი შეცდომა პირველი გოლისას, სასურველ შედეგს მივაღწევდით.
- როგორ ფიქრობთ, რატომ ვერ ვახერხებთ საგოლე მომენტების გამოყენებას? რა გვაკლია?
- მომენტებს დღეს ყველა აფუჭებს. ჩემი აზრით, მთავარია შევქმნათ ბევრი საგოლე სიტუაცია მეტოქის კართან და აუცილებლად მივაღწევთ იმას, რომ მათგან მეტი წილი გამოვიყენოთ...
- გულშემატკივარს თქვენი საკლუბო ამბებიც აინტერესებს. "ორჰუსი" დანიის ჩემპიონატის უმაღლეს ლიგას დაუბრუნდა. რას აპირებთ? რჩებით გუნდში?
- ჯერ კონკრეტული არაფერია. შეიძლება ითქვას, მოლაპარაკების პროცესში ვარ.
- შეთავაზებები არის?
- ამ ეტაპზე არ მსურს, დავკონკრეტდე, მაგრამ იმას კი გეტყვით, რომ დიახ, შეთავაზებები მაქვს - ძირითადად ევროპული გუნდებიდან.
(იბეჭდება მცირე ცვლილებით)
ყოველდღიური სპორტული გაზეთი "ლელო"
