ოთარ კაკაბაძე: ფეხბურთელისთვის ამაზე მაგარი რამ არ არსებობს

საქართველოს ეროვნული ნაკრებისა და ტარაგონას "ხიმნასტიკის" მცველმა ოთარ კაკაბაძემ Sportall.ge-სთან სხვადასხვა თემაზე ისაუბრა.

კაკაბაძეს ნაკრებში დებიუტი ჯერ კიდევ კახა ცხადაძის მწვრთნელობის დროს ჰქონდა, ვაისის მწვრთნელობის პერიოდში კი მოედანზე სულ რამდენიმე დღის წინ, ირლანდიის ნაკრების წინააღმდეგ გამოჩნდა, როცა ტრავმირებული უჩა ლობჟანიძე ჩაანაცვლა. გულშემატკივარი მისი თამაშით კმაყოფილი ჩანდა და მისადმი პოზიტიური განწყობა არც უელსთან მატჩის შემდეგ გამქრალა.

- უელსი-საქართველო 1:1 - ჩვენი იმედის თამაში და კითხვა: ვინ დაგვწყევლა? [VIDEO+PHOTO]
- ირლანდია-საქართველო 1:0 - ტრადიციულად, ქართულად... [VIDEO+PHOTO]

"ნაკრებში დებიუტი კახა ცხადაძის მწვრთნელობის პერიოდში მქონდა. მაშინ გიბრალტართან მომიწია თამაში და უბედნიერესი ვიყავი. ნაკრებში ყოველ თამაშზე იგივე გრძნობა მაქვს და სულ ყოველთვის მექნება.

ფეხბურთელისთვის ამაზე მაგარი რამ არ არსებობს, მით უმეტეს, მაშინ, როცა წარმატებას აღწევ და იმედია, მალე მოვა დიდი წარმატებაც".

"ორივე თამაშზე გული დამწყდა. ირლანდიასთან ნამდვილად არ იყო წასაგები თამაში, უელსთან კი უნდა მოგვეგო, თუმცა კარგი იყო, რომ ფეხბურთის თამაშს ვცდილობდით. ვფიქრობ, ეს გამოგვივიდა კიდეც..."

"აღვნიშნე, რომ ფეხბურთის თამაშს ვცდილობდით... ფეხბურთის თამაშში ბურთის კონტროლი და გააზრებული შეტევა ვიგულისხმე. ვლადიმირ ვაისი მომთხოვნი მწვრთნელია და სწორედ ამას მოითხოვს ჩვენგან. სამწუხაროდ, ერთ მატჩში სასურველ შედეგს მივაღწიეთ, მეორეში - ვერა.

ვაისი უელსთან მატჩის შემდეგ გვესაუბრა და ჩვენით კმაყოფილი იყო".

"ბეილის წინააღმდეგ თამაში საკმაოდ რთული იყო, მაგრამ გვერდში ბიჭები მედგნენ და შეძლებისდაგვარად, მაქსიმალურად გავანეიტრალეთ".

"ამ ორი თამაშის შემდეგ გულშემატკივრის მხრიდან საკმაოდ დიდი სითბო ვიგრძენი და ვეტყვი, რომ მათი გვერდში დგომა მაძლიერებს და ფეხბურთის თამაშს მიადვილებს".

"თუ ასეთი თამაში გავაგრძელეთ და ტემპი არ დავაგდეთ, ჯგუფში წარმატების მიღწევა სავსებით შესაძლებელია. თანაც, გასათვალისწინებელია, რომ მოლდოვას, ირლანდიას, სერბეთსა და უელსის ნაკრებებს საკუთარ კედლებში ვეთამაშებით და ეს თამაშები მაქსიმალურად უნდა გამოვიყენოთ".

"კლუბში თავს საკმაოდ კარგად ვგრძნობ. კარგი ხალხის ხელში მოვხვდი და ნელ-ნელა თამაშიც დავიწყე.

ჩემპიონატის დონე მაღალია. მით უმეტეს, მიმდინარე სეზონში საკმაოდ ძლიერი გუნდები არიან და მათ წინააღმდეგ გარჯა მეხმარება, ნაკრებში უფრო მომზადებული ჩამოვიდე. გასულ მატჩებში ჩემს კარგ თამაშზე ამანაც იმოქმედა".