ჯაბა ლიპარტია, რომელმაც ცოტა ხნის წინ უკრაინული "ზორია" თავისუფალი აგენტის სტატუსით დატოვა, დამკვიდრებას მახაჭყალის "ანჟიში" ცდილობს. რუსეთის პრემიერლიგის გუნდთან ერთად სლოვენიურ შეკრებაზე სინჯებზე მყოფმა 29 წლის ქართველმა ფეხბურთელმა პირველ საკონტროლო მატჩში ითამაშა. 25 ივნისს "ანჟი" რუმინულ "ასტრას" დაუპირისპირდა და მეტოქე ანგარიშით 2:1 დაამარცხა, ლიპარტია კი მოედანზე შესვენების შემდეგ გამოჩნდა.
როგორც "ანჟის" ოფიციალური საიტი იუწყება, ქართველი ფორვარდი თამაშში ჩართვიდან რამდენიმე წუთში ყურადღების ცენტრში აღმოჩნდა - ის მეტოქის საჯარიმოში სხვის დაუხმარებლად წაიქცა, მსაჯმა კი შეცდომით პენალტი დანიშნა, რასაც რუმინელი ფეხბურთელების უკმაყოფილება მოჰყვა.
მომდევნო საკონტროლო შეხვედრას "ანჟი" 27 ივნისს, კიდევ ერთ რუმინულ გუნდთან - "კლუჟთან" ჩაატარებს.
