რუსეთში ქართველის წარმატებული მოღვაწეობა ყოველთვის ეჭვებს ბადებდა. განსაკუთრებული საკბილო იყო და არის მახაჩჭყალის "ანჟისა" და ნიჟნი ნოვგოროდის "ვოლგას" ყოფილი სპორტული დირექტორი მამუკა ჯუღელი. ასე იყო მისი მახაჭყალის "ანჟიში" საქმიანობის დროს; მერე, როდესაც ქართველების ჯგუფთან ერთად, ნიჟნი ნოვგოროდის "ვოლგაში" გადაბარგდა; ცხადია, მისი საქმიანობა არც ხაბაროვსკის "სკა-ენერგიაში" გამორჩენიათ.
მიუხედავად იმისა, რომ რუსული საფეხბურთო სამყარო კორუფციასთან არის ასოცირებული, დარტყმა ყოველთვის კავკასიელებზეა და თუ საქმეში ქართველი გაერია, იცოცხლეთ, უხარიათ - სამიზნე ხომ ცნობილია.
ჯუღელი განსაკუთრებულ პატივში რუსულ ვებგვერდს, "ონედივიზიონსა" და "სოვეტსკი სპორტს" ჰყავდათ. ახლა
* * *
"სკა-ენერგია" განიარაღებულია. გუნდი დატოვეს ქართველმა მწვრთნელმა გიორგი დარასელიამ და გუნდის ავტორიტეტულმა გულშემატკივარმა მამუკა ჯუღელმა. თითქოს, ამ უკანასკნელის შორეულ აღმოსავლეთში ჩასვლა გუნდის პრემიერლიგაში გადასვლის გარანტია უნდა გამხდარიყო, თუმცა ამჯერად მიზანს ვერ მიაღწია.
სასწრაფო დახმარებისათვის სკა-ში ისრაელის პასპორტის მქონე ქართველ მწვრთნელს, გიორგი დარასელიასა და ქართველ ფეხბურთელებს უხმეს - ოთარ მარცვალაძეს, გოჩა ხოჯავასა და გიორგი ნავალოვსკის, რომლებმაც პრემიერლიგაში "ანჟი" და "ვოლგა" გადაიყვანეს. მათ ლაშა სალუქვაძე და შოთა გრიგალაშვილიც დაემატნენ.
მაგრამ "საქართველოს ნაკრების ფილიალი ხაბაროვსკში", როგორც "სკა-ენერგია" მონათლეს, გადათამაშებაშიც ბოლო მომენტში მოხვდა. ყველაზე საინტერესო აქ დაიწყო. გუნდი "როსტოვთან" შეხვედრისთვის ემზადებოდა, როდესაც "გრიგალაშვილის საქმე" აგორდა, აქაოდა, სეზონში მესამე გუნდში თამაშობსო, რაც აკრძალულია.
ამ ამბის აბსურდულობა მაშინვე ცხადი იყო, მაგრამ ხაბაროვსკელებს ამგვარად აგრძნობინეს, რომ პრემიერლიგაში არ ელოდნენ.
ერთ-ერთმა გულშემატკივარმა 1985 წლის 8 ნოემბრის ამბავი გაიხსენა და ამბის გახსენებაზეც ნერვიულობდა. მაშინ ხაბაროვსკის სკა-ს მოსკოვის ცსკა-სთვის უნდა ემასპინძლა, მაგრამ სტადიონზე მისულებს დახვდათ განცხადება, რომ ცუდი კლიმატური პირობების გამო მატჩი მოსკოვში გაიმართებოდა. არადა, ხაბაროვსკში 10 გრადუსი სითბო იყო.
ხაბაროვსკელებს უმაღლეს ლიგაში გადასვლის ყველაზე რეალური შანსი 1969 წელს ჰქონდათ. გუნდის ყოფილი მოთამაშე იხსენებს, რომ საკავშირო ფედერაციაში წინასწარ ყველაფერი გათვლილი იყო და რომ სეზონის დაწყებამდე უთხრეს, "თქვენ, ალბათ, მე-3 ადგილზე გახვალთ".
"გოლი რომ გაგვეტანა, მატჩის ბოლოს მსაჯი რამეს მოგვიგონებდა, ან სეზონის ბოლოს მოიფიქრებდნენ, პირველ ლიგაში როგორ დავრჩენილიყავით. როგორც ჩანს, ყველაფერს ჩინოვნიკები წყვეტდნენ და ახლაც ასეა", - იხსენებს სკა-ს ვეტერანი ფეხბურთელი ვასილი პოდენკოვი.
გულშემატკივარმა ეს ამბავი "გრიგალაშვილის საქმესთან" დაკავშირებით გაიხსენა, რადგან როსტოველები ლოზანის სპორტულ არბიტრაჟში ჩივილით იმუქრებოდნენ. როდესაც რუსეთის საფეხბურთო კავშირმა სკა-ს მხარე დაიჭირა, "როსტოვმა" პროტესტი გადაიფიქრა.
ახლა გუნდიდან ქართული ბრიგადა წავიდა. გუნდმა მიზანი ვერ შეასრულა და პრემიერლიგაში ვერ გადავიდა.
ამ ფაქტმა უფრო მნიშვნელოვანი მოვლენა გადაფარა - როგორ ცდილობდა "სკა-ენერგია" პრემიერლიგის საგზურის მოპოვებას.
ხაბაროვსკელებმა მიზნის მიღწევა გამოცდილი მეთოდებით სცადეს და მამუკა ჯუღელი მიიწვიეს, რომელსაც თბილად იხსენებენ "ანჟისა" და "ვოლგაში". ის ოფიციალურ წარდგენებში არსად ფიგურირებდა, სამაგიეროდ, ავტორიტეტული ფიგურა გახლდათ. ასეთები კი, ტრადიციულად, "მოკრძალებულები" არიან.
მეორე მომენტი: სკა-მ უცებ შეიძინა ორი სპონსორი - "გაზპრომი" და რუსეთის რკინიგზა და ამ ბრენდებმა განაპირობეს არც ისე მოკრძალებული საკლუბო ბიუჯეტი. ამტკიცებენ, რომ სკა-ს 300 მილიონი რუბლი ჰქონდა (დაახლოებით 9,4 მლნ დოლარი).
დასკვნა არც ისე სასიამოვნოა - მწვრთნელები და ფეხბურთელები გაიქცნენ, პერსპექტივა კი გაურკვეველია.
საბედნიეროდ, "როსტოვმა" "სკა-ენერგია" გააჩერა. ხაბაროვსკში ყველაფერს ზუსტად მიხვდნენ - ასეთი გუნდი ელიტაში არ სურთ, მაგრამ ჯერჯერობით. დისპანსერიზაციის შემდეგ, კი ბატონო!"
* * *
გასაგებია, რომ ჯუღელი საკამათო ფიგურაა და მასთან ბევრი კითხვა ჩნდება, მაგრამ ამ წერილის ქვეტექსტით, "სკა-ენერგიას" დისპანსერიზაცია, გაწმენდა, გაჯანსაღება ქართველების წასვლა არის.
მადლობა, ძმებო, კიდევ ერთხელ "სასიამოვნო" იყო რეალობასთან შეჯახება.
(იბეჭდება მცირე ცვლილებით)
ყოველდღიური სპორტული გაზეთი "ლელო"
ასევე იხილეთ:
გიორგი დარასელია "სკა-ენერგიას" აღარ გაწვრთნის
გიორგი ნავალოვსკიმ "სკა-ენერგიასთან" კონტრაქტი გაახანგრძლივა
ხაბაროვსკის "სკა-ენერგიადან" ქართველების გაშვება დაიწყეს
ოთარ მარცვალაძე: მათი ლოგიკით ქართველი და კორუფცია ერთი და იგივეა
არ უნდათ უმაღლეს ლიგაში, გუნდი შორეული აღმოსავლეთიდან--სიშორის გამო.ძალიან ძვირი და დამღლელია იქამდე ფრენა.