ლაშა ჯაკობია: რომ არა დისკვალიფიკაცია, ჩემი კარიერა სულ სხვანაირად წარიმართებოდა

ლაშა ჯაკობია 90-იანი წლების ბოლოს საქართველოს ერთ-ერთ ყველაზე ნიჭიერ ფეხბურთელად ითვლებოდა, 18 წლის ასაკში უკვე ბელგიურ "სტანდარდში" თამაშობდა, თუმცა მისი კარიერა ისე ვერ წარიმართა, როგორც მას და გულშემატკივრებს სურდათ.

ლაშამ კარიერის დიდი ნაწილი უკრაინულ გუნდებში გაატარა. სწორედ ამიტომ მასთან ვრცელი ინტერვიუ უკრაინულმა MatchDay-მ გააკეთა. შეგახსენებთ, რომ ამჟამად 34 წლის ყოფილი ფეხბურთელი ფოთის "კოლხეთის" სპორტული დირექტორია.

ინტერვიუს მოზრდილი ნაწილი უკრაინულ კარიერას, უკრაინულ კლუბებსა და მათ მწვრთნელებს შეეხება, რაც ქართველ მკითხველს ნაკლებად დააინტერესებს. გთავაზობთ ფრაგმენტს ინტერვიუდან, სადაც ჯაკობია დისკვალიფიკაციას იხსენებს.

შეგახსენებთ, რომ უკრაინაში თამაშისას ჯაკობია დოპინგზე ჩავარდა, მას სისხლში აკრძალული პრეპარატი მეთადონი აღმოაჩნდა.

- როგორ ფიქრობთ, რომ არა დისკვალიფიკაცია, თქვენი კარიერა სხვაგვარად წარიმართებოდა?
- რა თქმა უნდა, სულ სხვანაირად განვითარდება ჩემი კარიერა. მე შეცდომა დავუშვი და მერე ძალიან ვნანობდი. საკუთარ თავს სარკეშიც კი არ ვუყურებდი. ამის მერე ერთი წელიწადი ვერ ვითამაშე ვერსად, თავს ვერ ვპატიობდი. მადლობა ღმერთს, ამ სიტუაციიდან გამოვედი და უჟგოროდში ცოტა ხანი თამაში შევძელი.

- დეპრესია მართლა გქონდათ?
- კი, ასეთი რამის შემდეგ ყველას ექნება დეპრესია. მაგრამ არავის ვაბრალებდი. ჩემი ბრალი იყო და თავადაც ვაგე პასუხი.

უკრაინელები დაინტერესდნენ ჯაკობიას დღევანდელი საქმიანობითაც:

- როცა კარიერა დავასრულე, წელიწადი არაფერს ვაკეთებდი. შემდეგ ჩემმა ყოფილმა აგენტმა შემომთავაზა მასთან მუშაობა. მალევე გამომივიდა ახალგაზრდა ლუკა კიკაბიძის ტრანსფერი "ბასტიაში". ლუკა ნიჭიერია და მას კიდევ შეუძლია პროგრესი. შემდეგ ორი ფეხბურთელი მიმყავდა "გენტში", მაგრამ საბოლოოდ არ გამოვიდა ტრანსფერი. ამ მიმართულებითაც ვმუშაობ პარალელურად.

- ფოთის "კოლხეთის" სპორტულ დირექტორად როგორ მოხვდით?
- დედა ფოთიდანაა წარმოშობით და ამ ქალაქში ადრეც ბევრჯერ ვყოფილვარ. კლუბის პრეზიდენტი ჩემი მეგობარია და მან შემომთავაზა ეს სამსახური. ჩვენ ყველაზე მცირე ბიუჯეტი გვაქვს კლუბებს შორის, მაგრამ ვცდილობთ, კარგი გუნდი დავაყენოთ. "კოლხეთი" ცდილობს, ლამაზი ფეხბურთი ითამაშოს, რაც შეიძლება მეტი ახალგაზრდა გამოჩნდეს და ევროპაში სათამაშოდ წავიდეს.

ლაშა ჯაკობიას ქართული და უკრაინული ფეხბურთის შედარებაც სთხოვეს:

- მთავარი სხვაობა, რა თქმა უნდა, ჩემპიონატების დონის სხვაობაა - უკრაინის ჩემპიონატი უფრო ძლიერია. იქ უფრო სწრაფი და ათლეტური ფეხბურთია. ბოლო 6-7 წელში საქართველოში იყო ვარდნა, თაობების ცვლის გამო. ახლა ვარსკვლავები არ გვყავს. სამაგიეროდ, 19-21 წლის კარგი ახალგაზრდები გვყავს. ნაკრების ლიდერი და კაპიტანი ჯაბა კანკავაა. სხვა მხრივ, ჩვენი იმედები ახალგაზრდებზეა. ველით მათ დიდ ფეხბურთში.