ქუთაისის "ტორპედო": სტუმარ-მასპინძელი წყალტუბოში და სამაგალითო სამტრედიელები

ფოტოზე: სამზადისი ქუთაისის სტადიონზე
6 ივლისს ევროპალიგის პირველი საკვალიფიკაციო ეტაპის საპასუხო მატჩები გაიმართება. მართალია, სამივე ქართულ კლუბს ცუდად აქვს საქმე, მაგრამ მაინც საინტერესო უნდა იყოს, როგორ ემზადებიან ჩვენი გუნდები ხვალინდელი მატჩებისთვის...

"ტორპედოსა" და სლოვაკური "ტრენჩინის" მატჩი 6 ივლისს "რამაზ შენგელიაზე" გაიმართება და 21 საათზე დაიწყება (დასწრება უფასოა). ქუთაისელებისთვის ეს ღირსების მატჩია, რომლისთვისაც მზადება ტრენჩინიდან დაბრუნების შემდეგ დაიწყეს.

- ტრენჩინი-ტორპედო 5:1 - რაში გიხდით სახელმწიფო ფულს? [VIDEO]

19-წლამდელთა ევროპის ჩემპიონატზე საქართველოს ნაკრების ღირსებას ორი ტორპედოელი იცავს - გაბრიელ საღრიშვილი და შალვა ბურჯანაძე. ცხადია, ისინი გუნდს ვერ დაეხმარებიან.

ქუთაისელთა პრესსამსახურის ცნობით, სლოვაკები ჩარტერული რეისით კოპიტნარის აეროპორტში დღეს ჩამოფრინდებიან, საიდანაც წყალტუბოში გადაინაცვლებენ და სასტუმრო "წყალტუბო პლაზაში" დაბინავდებიან, ხოლო 19 საათზე "რამაზ შენგელიაზე" ივარჯიშებენ. მანამდე "ტრენჩინის" მთავარი მწვრთნელის, მარტინ შეველას პრესკონფერენციაა დაგეგმილი.

მასპინძლებს რაც შეეხებათ, დღეს, 19 საათზე, ჟურნალისტებს "ტორპედოს" დამრიგებელი კახა ჩხეტიანი შეხვდება, ხოლო გუნდი ვარჯიშს 20 საათზე დაიწყებს. ამის შემდეგ ტორპედოელებიც წყალტუბოში გაემგზავრებიან და თამაშამდე სასტუმრო "პრომეთეში" დაისვენებენ.

მისაბაძი მაგალითია, რაც "სამტრედიის" ქომაგებმა გააკეთეს - მიმართვა გაავრცელეს, რომელშიც "ტორპედოს" მხარდაჭერა აღუთქვეს...

"6 ივლისს ქართული გუნდები ევროპალიგის საპასუხო მატჩებს გამართავენ. იმედი გვაქვს, სამივე თუ არა, ამ ეტაპს ერთი გუნდი მაინც გადალახავს. ჩვენ, "მტრედები", ქუთაისში "ტორპედოს" საგულშემატკივროდ გავემგზავრებით.

მართალია, პირველი თამაშები სამივე გუნდმა წააგო, მაგრამ დამთავრებული არაფერია და ყველაფერი შეიძლება მოხდეს. ჩვენ გვჯერა ქართული გუნდების წარმატების და ყველას გთხოვთ, ქუთაისში "ტორპედოს" საგულშემატკივროდ წამოხვიდეთ. ჩვენი ქვეყნის გუნდია და საქართველოს სახელით ასპარეზობს".

(იბეჭდება მცირე ცვლილებით)
ყოველდღიური სპორტული გაზეთი "ლელო"