როგორც ცნობილია, დეკემბრიდან მოყოლებული, უმაღლესი ლიგის კლუბები ფეხბურთის ფედერაციასა და სპორტისა და ახალგაზრდობის საქმეთა მინისტრთან კონსულტაციებს მართავენ, რათა სახელმწიფოსგან დახმარება მიიღონ.ამ პროცესს ქართული ფეხბურთის ყოფილი ვარსკვლავი თენგიზ სულაქველიძე გამოეხმაურა.
დღევანდელი გაჭირვების თავი და თავი ბავშვთა ფეხბურთია. წლების წინათ ბატონმა თენგიზმა საფეხბურთო აკადემია ჩამოაყალიბა და ამ სფეროს სატკივარს კარგად იცნობს:
- უმაღლესი ლიგის კლუბებს არაერთი პრობლემა აქვთ, მაგრამ არანაკლები გაჭირვება, თუ მეტი არა, საფეხბურთო სკოლებშია. 4 დიდი და 3 მცირე ზომის მოედანი გვაქვს, მორწყვა ყველას სჭირდება. ზაფხულში ნორმალური მოვლა რომ
არადა, ეს არავის გვსურს, რადგან ფეხბურთის მასობრიობას უშლის ხელს და ამის გამო ბევრი ნიჭიერი ბავშვი იკარგება. თბილისის მასშტაბით, ჩვენთან ყველაზე დაბალი გადასახადია - თვეში 50 ლარი და ამის მოტანაც უჭირთ.
ჩვენ ფული არ გვჭირდება, წყლის გადასახადისგან მაინც გაგვათავისუფლონ, ან მიწის გადასახადი შეამცირონ და თუ სახელმწიფო პროგრამის განხორციელება დაიწყება, ყველა საფეხბურთო სკოლას ხელოვნურსაფარიანი მოედანი დაგვიგონ. ეს იქნება სწორედ რეალური დახმარება და ქართული ფეხბურთის აღორძინებისკენ გადადგმული ნაბიჯი.
მე მხოლოდ ჩემს სატკივარზე არ ვლაპარაკობ. ბევრი არასწორად ფიქრობს, რომ მორწყვას მარტო ბუნებრივი საფარი საჭიროებს. სინამდვილეში, ეს ხელოვნურ საფარსაც სჭირდება. ბოლო წლებში კარგი მოედნები კი დაიგო, მაგრამ წყლის დიდი გადასახადების გამო, შესაძლოა, ბევრი მათგანი გაფუჭდეს და სახელმწიფოსა თუ კერძო ინვესტორების მიერ გაღებული სახსრები წყალში ჩაიყაროს.
- ამ ყველაფრის მოგვარება როგორ წარმოგიდგენიათ?
- უპირველესი პრობლემა მაინც წყლის გადასახადია. დააწესონ ფიქსირებული თანხა, სახელმწიფო გვერდში დაგვიდგეს დ ამით სამ კურდღელს დაიჭერს - ბავშვთა ფეხბურთში გადასახადებს შეამცირებს, მასობრიობას გაზრდის და ინფრასტრუქტურის მდგომარეობას გააუმჯობესებს.
სახელმწიფოს ნების გარეშე ფეხბურთი ვერ განვითარდება. იმ ხალხმა, ვინც ფეხბურთში ვართ, ამ ეტაპამდე ბევრი გავაკეთეთ, მაგრამ ჩვენი შესაძლებლობები ამოიწურა და ახლა მხოლოდ იმას ვახერხებთ, რომ ეს სახეობა არ მოკვდეს. ფეხბურთელის განვითარებისთვის, ძლიერი თაობების გასაზრდელად და უკეთესი მომავლისთვის გაცილებით მეტია საჭირო.
- არადა, საკმაოდ კარგი თაობები მოდიან...
- ახლა უკეთესი თაობებია, ვიდრე ჩვენს დროს იყო! მაგრამ სხვა ქვეყნებმა გაგვასწრეს. ახლახან ჩემი სახელობის ტურნირი ჩატარდა და ყაზახეთმა ისეთი გუნდი ჩამოიყვანა, გაოცებული დავრჩი.
ბევრისგან მსმენია - ადრე ვარსკვლავები ასფალტზე და ხრიოკ მოედნებზე იზრდებოდნენო. კარგით, რა! მას შემდეგ ხალხი კოსმოსში გაფრინდა და ჩვენ ერთი ადგილი ვტკეპნოთ? ბავშვს კარგი საშხაპე და მოედანი არ უნდა ჰქონდეს? სწორედ ამიტომაა, ასაკობრივ ნაკრებებში წარმატებებს რომ ვაღწევთ, ყველა შესარჩევიდან გავდივართ, ინგლისს, ჰოლანდიასა და ბელგია-შოტლანდიას ვუგებთ, მაგრამ მერე ვჩერდებით.
ფეხბურთელები ეროვნულ ჩემპიონატში უნდა გაიზარდონ, ჩვენი ჩემპიონატის დონე კი საგრძნობლად დაეცა. 6-7 ძლიერი და ფინანსურად წელში გამართული კლუბი რომ გვყავდეს, კონკურენციაც გაიზრდებოდა და ფეხბურთელებიც.
იმავეს ვიტყვი ბავშვთა ფეხბურთზე, სადაც დღეისათვის ორი გამოკვეთილი ლიდერია - "საბურთალო" და თბილისის "დინამოს" აკადემია. მათი ხელმძღვანელები ფეხბურთისთვის ბევრს აკეთებენ, მაგრამ ორი ძლიერი სკოლა საკმარისი არ არის. ასეთი სკოლები ყველა დიდ ქალაქშია საჭირო. მერე წამოვა თაობები და გაცილებით მეტი ნიჭიერი ბავშვი გამოჩნდება.
- სამწუხაროდ, საფეხბურთო სამყაროში არსებული დაპირისპირებაც გვიშლის ხელს...
- მართალი ხართ. ეს ჩვენ ძალიან უკან გვწევს. ერთხელ მაინც მოვახერხოთ და პრობლემებზე ერთად დავილაპარაკოთ ფედერაციის წარმომადგენლებმა, კრიტიკულად განწყობილმა ადამიანებმა, სკოლებისა და კლუბების ხელმძღვანელებმა, ვეტერანებმა...
გულახდილად ვთქვათ, როგორ ვუშველოთ ფეხბურთს, თორემ დანაწევრებულ, დასუსტებულ და წარუმატებელ საფეხბურთო სამყაროს არავინ მოუსმენს.
- ისე, საინტერესოა, თქვენს დროს თუ მომხდარა, ნაკრებში გამოძახებული ფეხბურთელი შეკრებაზე არ ჩამოსულიყოს?
- ამას ვერავინ გაბედავდა. წესიც იყო ასეთი - ტრავმირებულიც კი უნდა გამოცხადებულიყო შეკრებაზე და ნაკრების ექიმებს შეემოწმებინათ, რადგან კლუბის ექიმს ნაკრებში მისი კოლეგა და მწვრთნელი არ ენდობოდნენ.
მე მგონია, რომ ჩვენს ეროვნულ გუნდშიც აჯობებს ამ წესის დანერგვა.
ყოველდღიური სპორტული გაზეთი "ლელო"
![[სპეციალისტის აზრით] არ თამაშობენ კი არა, ვერ თამაშობენ!](/pictures/image7/901c292c9960756a6cae23741442418b.jpg "[სპეციალისტის აზრით] არ თამაშობენ კი არა, ვერ თამაშობენ!")
