"ჩემი გუნდი ყველაფრისთვის მზადაა, ცხელი ზაფხული გველოდება!"

გაზეთ "ბერლინერ ცაითუნგში" ლევან კობიაშვილზე საინტერესო სტატია გამოქვეყნდა.

საქართველოს ფეხბურთის ფედერაციის პრეზიდენტობის კანდიდატი ქართული ფეხბურთის პრობლემებზე საუბრობს და აკონკრეტებს, რას მიენიჭება მისი გაპრეზიდენტების შემთხვევაში პრიორიტეტი. სტატიას თითქმის უცვლელად გთავაზობთ:

"გული მტკივა, როცა ვხედავ, რომ ჩემი ქვეყანა ფიფას რეიტინგში 139-ე ადგილზეა, - ასე დაიწყო ლევან კობიაშვილმა გაზეთ "ბერლინერ ცაითუნგის" ჟურნალისტთან საუბარი და იქვე დასძინა, - მარტო ამით ჩანს, რომ ქართულ ფეხბურთში ბევრი შეცდომა იქნა დაშვებული."

37 წლის ლევან კობიაშვილმა ახალი მისია დაისახა. ბერლინის "ჰერტას" ყოფილი ვარსკვლავი თავის სამშობლოში ფეხბურთის ფედერაციის პრეზიდენტობას უმიზნებს. თითქმის 20 წლის წინ საქართველო ფიფას რეიტინგში 42-ე ადგილზე იყო, მაგრამ მას მერე ქართული ფეხბურთის საქმე უკან-უკან წავიდა.

კობიაშვილს მეტის მოთმენა აღარ შეუძლია და ამ ყველაფრის გამოსწორება უნდა.

ამიტომაც გადაწყვიტა, რომ ხუთნახევარი წლის შემდეგ ბერლინის "ჰერტა" დატოვოს და სამშობლოში დაბრუნდეს. აქტიური სპორტული კარიერის დასრულების შემდეგ კობი "ჰერტას" მენეჯმენტში მუშაობდა.

"დიახ, გადაწყვეტილება მიღებულია. სამშობლოში ვბრუნდები და ფეხბურთის ფედერაციის პრეზიდენტის არჩევნებში მივიღებ მონაწილეობას. მინდა, რომ ჩემს ქვეყანას დავეხმარო!" - ამბობს კობი.

ლევანის სახით გერმანიას ბუნდესლიგის ლეგენდა ტოვებს! 1998-დან 2014 წლამდე კობიმ "ფრაიბურგის", "შალკეს" და "ჰერტას" რიგებში, პირველ ბუნდესლიგაში 351 მატჩი ჩაატარა და მასზე მეტი შეხვედრა ამ დროისთვის მხოლოდ ერთადერთ ლეგიონერს, კლაუდიო პისაროს (383) აქვს ჩატარებული.

"ქართულ ფეხბურთში ძალიან ბევრი საქმეა, უამრავი რამ არის გამოსასწორებელი. უნდა შეიცვალოს სტრუქტურა, ქართულ ფეხბურთს სერიოზული რეფორმა სჭირდება. მთავარი პრიორიტეტი ბავშვთა ფეხბურთი და ინფრასტრუქტურა უნდა იყოს.

ფაქტია, რომ ასე გაგრძელება აღარ შეიძლება. ყველაფერი გაცილებით უფრო დემოკრატიული უნდა გახდეს", - ამბობს კობი, რომელსაც საქართველოს ნაკრებში ყველაზე მეტი, 100 მატჩი აქვს ჩატარებული.

როგორ აპირებს კობი პრეზიდენტობისთვის ბრძოლას?

"ჩემი გუნდი ყველაფრისთვის მზადაა, ცხელი ზაფხული გველოდება. კარგად ვართ მომზადებულები. ეს გადაწყვეტილება სპონტანურად არ მიგვიღია - დიდხანს ვიფიქრეთ, ყველაფერი ავწონ-დავწონეთ", - აცხადებს კობიაშვილი.

პრობლემა ის არის, რომ ჯერ კიდევ არ არის დადგენილი არჩევნების ჩატარების თარიღი და არც პრეზიდენტობის კანდიდატების ოფიციალური სიაა ცნობილი - ასეთია ფეხბურთი საქართველოში.

კობიაშვილი თბილისში ახლა მეუღლის და შვილების გარეშე მიემგზავრება და მისი მიზანი კონცეფციის დახვეწა და მხარდამჭერების შეგროვებაა.



კობი: "ჩემი მიზანი არ არის მხოლოდ არჩევნების მოგება. ჩემი მიზანი ბევრი რამის შეცვლაა."

ბოლო ორი წლის განმავლობაში კობიაშვილმა ბევრი რამ ისწავლა: "პარალელურად ვსწავლობდი სპორტის მენეჯმენტს და კურსი დავხურე. ასევე, ბევრი რამ ვისწავლე "ჰერტას" ოფისში და აკადემიის ყველა განყოფილებაში. უღრმესი მადლობა ამისათვის!"

თუ არჩევნებს მოიგებს, გაისად თბილისში ოჯახსაც წაიყვანს, მაგრამ ამბობს, რომ ბერლინში სახლს არ გაყიდის.