ჩემპიონატის ერთი გამოტოვებული მატჩითა ("ზესტაფონი"-"სპარტაკი") და ოთხი სათასო შეხვედრით 22 თებერვალს საქართველოში საფეხბურთო სეზონი ოფიციალურად განახლდება. რა თქმა უნდა, მეოთხედფინალი ისეთი სტადიაა, სადაც, სათასო სპეციფიკიდან გამომდინარე, ნებისმიერ სიურპრიზს უნდა ველოდოთ.
თუმცა, სიურპრიზი შესაძლოა ერთხელ ან ორჯერ მოხდეს, ანუ, რახან ამა თუ იმ გუნდმა მეოთხედფინალში გააღწია, ესე იგი, დაიმსახურა კიდეც ეს პატივი.
...ოთხი მეოთხედფინალური წყვილიდან ორი ისეთია, ფავორიტს რომ წინასწარ ვერავინ დაასახელებს; "მეტალურგი"-"დინამოს" დაპირისპირებაც დიდ ინტრიგას გვპირდება - ორივე გუნდში ხომ ამ ზამთრის პაუზის დროს ბევრი რამე თუ ვინმე შეიცვალა.
აი,
.მეტალურგი-დინამო
ანშლაგი არა გვგონია, მაგრამ, ვფიქრობთ, რომ შაბათს რუსთავის "ფოლადის" სტადიონის ტრიბუნებზე იმაზე მეტი გულშემატკივარი მოვა, ვიდრე პირველ ეტაპზე დადიოდა! ჯერ ერთი, ბევრისთვის საინტერესო უნდა იყოს ერთიანად განახლებული "მეტალურგისა" თუ ასევე საგრძნობლად სახეშეცვლილი "დინამოს" სათასო დაპირისპირების ხილვა; თანაც, იმის მიუხედავად, რომ დღესდღეობით "დინამო" ბევრად უფრო კვალიფიციური ფეხბურთელებით არის დაკომპლექტებული და ჩემპიონატის მსგავსად, ეს გუნდი თასის მიმდინარე გათამაშების ერთ-ერთი მთავარი ფავორიტიცაა, რუსთავში ბევრს სჯერა, რომ, ფაქტობრივად, 95-პროცენტით გადახალისებული "მეტალურგი" უბრძოლველად არაფერს დათმობს.
ჰო, ამის წინა პირობას რამდენიმე (მათ შორის, მთავარი მწვრთნელის) ფაქტორიც იძლევა: ვარლამ კილასონია ოთხწელიწადნახევრიანი პაუზის მერე გაუძღვება მშობლიური ქალაქის გუნდს ოფიციალურ შეხვედრაში!
ამას გარდა, რუსთაველ გულშემატკივარს ის ფაქტიც უნდა ახარებდეს, რომ პირველად ამ ბოლო რვა წლის (!) განმავლობაში, "მეტალურგში" ადგილობრივი ფეხბურთელები "აბსოლუტურ უმცირესობაში" აღარ იქნებიან!
...სათასო დაპირისპირებების სპეციფიკას ხშირად ვუსვამთ ხაზს და ისიც არაერთხელ გვიხსენებია, რომ ფავორიტები ხშირად ვერ ამართლებენ თავიანთ სტატუსს. თუმცა, "მეტალურგის" ახალი თავკაცისა და ასევე ახალი ფეხბურთელების მსგავსად, არანაკლები მოტივაცია ექნებათ მეტოქის მწვრთნელსა თუ მოთამაშეებსაც! ჰო, "დინამოს" მთავარ მწვრთნელს მალხაზ ჟვანიასაც ბევრი აქვს დასამტკიცებელი, ისე როგორც დინამოელთა ახალწვეულებს.
მოკლედ, საინტერესო პაექრობის მოლოდინი გვაქვს და ვეჭვობთ, რომ ამ წყვილის გამარჯვებულის ვინაობა პირველსავე მატჩმა გამოავლინოს.
..."მეტალურგი" და "დინამო" თასზე შარშანაც შეხვდნენ და, ალბათ, ბევრს ემახსოვრება ის ნახევარფინალური დაპირისპირებები: პირველ მატჩში, რუსთავში რომ გაიმართა, გიორგი ყიფიანის დამოძღვრილმა გუნდმა 2:1 მოუგო გადახალისებული შემადგენლობით მოასპარეზე ფავორიტ მეტოქეს. სწორედ მაშინ იყო, "დინამოს" იმდროინდელმა მთავარმა მწვრთნელმა დუშან უჰრინმა თავისი გუნდის მარცხი... ძლიერ ქარსა და "ფოლადის" ხელოვნურ საფარს რომ დააბრალა.
თუმცა, საპასუხო შეხვედრაში ინტრიგა აღარც ყოფილა: "დინამომ" 5 (!) უპასუხო გოლი გაუტანა "მეტალურგს" და ფინალშიც გავიდა.
"მეტალურგი" და "დინამო" ადრეც შეხვედრიან თასზე ერთმანეთს: 2006/07 წლების სეზონში ჯგუფურ ეტაპზე თითო-თითო მატჩი მოიგეს; თუმცა, ბევრად უფრო დასამახსოვრებელი იყო 2009 წლის 30 მაისის მატჩი, როცა საქართველოს თასის ფინალში კახა კაჭარავას დამოძღვრილმა "დინამომ" პენალტების სერიაში აჯობა ვარლამ კილასონიას "ოლიმპს" (იმავე "მეტალურგს").
გეხსომებათ ეს, მართლაც, დრამატული ფინალი: გიორგი ნერგაძემ ძირითადი დროის დამთავრებამდე 10 წუთით ადრე გოლი რომ გაიტანა, ყველას ეგონა, რომ "დინამო" ამ უპირატესობას ხელიდან არ გაუშვებდა. თუმცა, მატჩის ბოლო წუთზე, გიორგი მეგრელაძემ ჩინებულად შეასრულა საჯარიმო დარტყმა და შეხვედრაც დამატებით დროში გადაიყვანა. მაგრამ, ეს კიდევ არაფერი: პენალტების სერიაში "ოლიმპის" ფეხბურთელებმა ყველა დარტყმა... გააცუდეს და თასიც "დინამოს" დარჩა!
...1993/94 წლების სეზონში, რევაზ ძოძუაშვილის ხელმძღვანელობით მოასპარეზე იმდროინდელი "მეტალურგი" (ოღონდ, ამ შემთხვევაში, "გორდას" სამართალმემკვიდრე) თასის ფინალში გავიდა და დაძაბულ ბრძოლაში დამარცხდა გივი ნოდიას "დინამოსთან" (ერთადერთი გოლი მიხეილ ყაველაშვილმა გაიტანა).
იმ მატჩის მონაწილე ერთ-ერთი ფეხბურთელი (ვარლამ კილასონია) დღესდღეობით "მეტალურგის" მთავარი მწვრთნელია, ორი კი... კვლავაც აგრძელებს თავის ხანგრძლივ და მართლაც ჩინებულ კარიერას! ჰო, ლევან კობიაშვილსა და ალექსანდრე იაშვილზე მოგახსენებთ, - 16 წლის "კობი" იმ დროს "მეტალურგში" თამაშობდა, ასევე 16 წლის "იაშკა" კი - "დინამოში"...
სიონი-ჩიხურა
არანაკლებ საინტერესო პაექრობას გვპირდება ეს წყვილიც: "სიონისა" და "ჩიხურას" ორრაუნდიან დაპირისპირებაში ძნელია რომელიმე გუნდს უპირატესობა მივანიჭოთ. უბრალოდ, საჩხერელთაგან განსხვავებით, "სიონს" ამ სათასო მატჩის მერე ერთიმეორეზე უმნიშვნელოვანესი 4 შეხვედრა ელოდება ჩემპიონატში: "ჩიხურას" ხომ, ფაქტობრივად, გარანტირებული აქვს ზედა ექვსეულში მოხვედრა, ბოლნისელებს კი ამისათვის სერიოზული კონკურენციის დაძლევა მოუწევთ. თუმცა, სჯობს ისევ სათასო პაექრობაზე "გადმოვერთოთ" და, უპირველეს ყოვლისა, შარშანდელი დაპირისპირებები გავიხსენოთ: "მეტალურგი"-"დინამოს" მსგავსად, "სიონი"-"ჩიხურას" დაპირისპირებაც შარშან სწორედ ნახევარფინალში შედგა. პირველი მატჩი საჩხერელთა გუნდის გამარჯვებით (2:0) დამთავრდა და, ბევრის აზრით, ამ წყვილში ყველაფერი დამთავრებული იყო. მით უფრო, რომ დღევანდელი სიტუაციისაგან განსხვავებით, იმდროინდელი "სიონი" საჩხერელთა გუნდს ძალიან ბევრ კომპონენტში ჩამორჩებოდა.
საპასუხო შეხვედრამ კი საპირისპირო "სურათი" გვიჩვენა: უაღრესად ნერვულ და დაძაბულ მატჩში (სირიელმა არბიტრმა აბდულა ბასლეხლომ ორივე გუნდის ფეხბურთელებს 9 ყვითელი ბარათი უჩვენა) "სიონს" სულ მცირედი დააკლდა მორიგი სენსაციის მოსახდენად (მანამდე ხომ ბოლნისელებმა, ყველასათვის მოულოდნელად, "ტორპედო" გამოაგდეს)! კოკა მიკუჩაძის გატანილი გოლით "სიონი" 1:0-ს იგებდა და ბოლოს შტურმიც მოუწყო მეტოქეს, მაგრამ "ჩიხურას" გამოცდილმა მეკარემ გიორგი სომხიშვილმა ჩინებული მატჩი ჩაატარა და მისი დიდი დამსახურებაც იყო, საჩხერელთა გუნდი თავის ისტორიაში პირველად რომ გავიდა თასის ფინალში.
...არანაკლებ ინტერესს იწვევს სამწვრთნელო "დუელიც": "სიონის" თავკაცს ლადო ბურდულს ახალ ამპლუაში მოღვაწეობის არასრული ოთხთვიანი სტაჟი აქვს და აუცილებლად აღსანიშნავი ფაქტია, რომ დებიუტანტი მწვრთნელი ოფიციალურ შეხვედრაში ჯერ არ დამარცხებულა!
რაც შეეხება მის გამოცდილ კოლეგას სოსო ფრუიძეს, ამ სპეციალისტის ხელმძღვანელობით "ჩიხურა" საქართველოს ერთ-ერთ მოწინავე გუნდად ჩამოყალიბდა და შარშან დეკემბერში საქართველოს სუპერთასზე გამარჯვებაც მისი სამწვრთნელო კარიერის ლოგიკურ შედეგად უნდა მივიჩნიოთ.
ეს წყვილი აშკარად თანაბარი სიძლიერისაა და ამაზე ის ფაქტიც მეტყველებს, რომ მიმდინარე სეზონში (ჩემპიონატს ვგულისხმობთ) "სიონისა" და "ჩიხურას" ორივე დაპირისპირება ფრედ დამთავრდა.
ტორპედო-დილა
დამოუკიდებელი ქართული საკლუბო ფეხბურთის ერთ-ერთი ყველაზე ტიტულიანი მწვრთნელი რევაზ ძოძუაშვილი შვიდწლიანი პაუზის მერე უბრუნდება აქტიურ ასპარეზს და 22 თებერვალს მშობლიური ქალაქის გუნდსაც დამოძღვრავს! ამ წყვილშიც ძალიან ძნელია ფავორიტის "მოძებნა": "ტორპედოშიც" და "დილაშიც" პირველ ეტაპთან შედარებით ხომ შემადგენლობა სერიოზულად შეიცვალა.
ეგ კი არა, ქუთაისელთა გუნდში, ფაქტობრივად, ყველა ფეხბურთელი ახალწვეულია და, აქედან გამომდინარე, ძნელი სათქმელია, თუ რამდენად მოასწრებდა გამოცდილი რევაზ ძოძუაშვილი საკონტროლო მატჩებში გუნდის ურთიერთშეთამაშებას.
თითქმის ანალოგიურ სიტუაციაშია ძოძუაშვილის ახალგაზრდა კოლეგა რამაზ სოღოლაშვილიც - ზამთრის პაუზის დროს "დილადან" ხომ თითქმის ყველა წამყვანი ფეხბურთელი წავიდა; თუმცა, გორელთა გუნდში ბევრი ისეთი ახალწვეულიც ირიცხება, სხვადასხვა ქართული გუნდების შემადგენლობაში საქართველოს თასზე წარმატებით რომ უასპარეზიათ.
...საქართველოს თასის ისტორიაში "ტორპედო" და "დილა" აქამდე ექვსჯერ შეხვედრიან ერთმანეთს და მცირე უპირატესობა ქუთაისელთა გუნდის მხარესაა: სამი მოგება, ერთი ფრე და ორი წაგება. თუმცა, ეს სტატისტიკა დღესდღეობით ხომ არაფერს ნიშნავს...
ყოველდღიური სპორტული გაზეთი "ლელო"
