ლა ლიგა. XV ტური: სერხიო რამოსმა "რეალს" ბოლო წამებზე მოაგებინა [VIDEO]

10 დეკემბერს ესპანეთის ლა ლიგის მე-15 ტურის 4 შეხვედრა გაიმართა.

"ბარსელონა" აუტსაიდერ "ოსასუნას" ესტუმრა და მეორე ტაიმში სამი უპასუხო გოლი გაუტანა - 3:0.

ანგარიში ლუის სუარესმა გახსნა, შემდეგ კი დუბლით გამოიჩინა თავი ლიონელ მესიმ, რომელიც 550-ედ თამაშობდა "ბარსელონას" მაისურით. ამით "ბარსამ" ფრეების სამმატჩიანი სერია შეწყვიტა ლა ლიგაში.

ლუის ენრიკე (ბარსელონა): "პირველ ტაიმში ძალიან კარგად ვითამაშეთ, დაგვაკლდა მხოლოდ გოლი. მეორე ტაიმში კი შევძელით მეტოქის გატეხვა. ყველაფრით ვჯობდით "ოსასუნას", თუმცა მასაც ჰქონდა კარგი მომენტები კონტრშეტევებისას. მხოლოდ მოგება გვესაჭიროებოდა, რომ გავაგრძელოთ "რეალზე" ზეწოლა".

მიუხედავად იმისა, რომ დიეგო ალვეშმა ლა ლიგაში მე-20 პენალტი მოიგერია და რეკორდი კიდევ უფრო გაზარდა, მისი "ვალენსია" სან სებასტიანში "რეალ სოსიედადთან" 2:3 დამარცხდა. ჩეზარე პრანდელის გუნდს უკვე 7 ტურია, ვერ მოუგია. ამ შეხვედრაში წითელი ბარათი მიიღო "ვალენსიას" პორტუგალიელმა მარჯვენაფლანგელმა ჟოაო კანსელომ.

სერხიო რამოსმა 92-ე წუთზე თავურით გამარჯვების გოლი გაიტანა "დეპორტივოს" კარში - 3:2 "რეალის" სასარგებლოდ.

ზინედინ ზიდანმა ლეო ბენჰაკერის რეკორდი დაამხო - ზედიზედ 35-ედ უთავკაცა "რეალს" დაუმარცხებლად.

ფრანგმა ამ შეხვედრისთვის კრიშტიანო რონალდო დაასვენა, მცირე ტრავმის გამო არ ითამაშა ქარიმ ბენზემამ. "რეალი" ალვარო მორატამ დააწინაურა შესანიშნავი გოლით, მაგრამ შემდეგ ხოსელუმ დუბლი შეასრულა "რეალის" კარში და "დეპორტივო" დააწინაურა. 84-ე წუთზე მარიანო დიასმა გაათანაბრა, ხოლო შემდეგ რამოსის დრო დადგა. "რეალი" კვლავ 6 ქულით უსწრებს "ბარსელონას".

შაბათი. 10 დეკემბერი
ოსასუნა-ბარსელონა 0:3
გოლები: 0:1 ლ. სუარესი (59), 0:2 მესი (72), 0:3 მესი (92)

სოსიედადი-ვალენსია 3:2
გოლები: 1:0 ვილიან ჟოზე (2), 2:0 ვილიან ჟოზე (24), 2:1 პარეხო (36-პენ), 3:1 ხუანმი (91), 3:2 ბაკალი (93)
გაძევება: კანსელო (82. ვალენსია)
გამოუყენებელი პენალტი: ველა (60. სოსიედადი)

ლას პალმასი-ლეგანესი 1:1
გოლები: 1:0 ლივაია (21), 1:1 გერერო (76-პენ)

რეალი-დეპორტივო 3:2
გოლები: 1:0 მორატა (50), 1:1 ხოსელუ (63), 1:2 ხოსელუ (65), 2:2 დიასი (84), 3:2 ს. რამოსი (92)

პარასკევი. 9 დეკემბერი
მალაგა-გრანადა 1:1

კვირა. 11 დეკემბერი
ეიბარი-ალავესი 15:00
სელტა-სევილია 19:15
ესპანიოლი-სპორტინგი 21:30
ბეტისი-ბილბაო 23:45

ორშაბათი. 12 დეკემბერი
ვილიარეალი-ატლეტიკო 23:45

1. რეალი - 37 ქულა; 2. ბარსელონა - 31; 3. სევილია - 27; 4. რეალ სოსიედადი - 26; 5. ატლეტიკო - 25.