ბუნდესლიგა. XVIII ტურის წინ: ისევ დატუქსავს "ბაიერნი" "ჰამბურგს"?

დღეს ზამთრის ძილიდან საფეხბურთო გერმანიაც იღვიძებს - ხომ იცით, ბუნდესლიგას ზამთარში ყველაზე დიდხანს "სძინავს" ხოლმე. მეორე წრე რამდენიმე საინტერესო მატჩით იწყება, სტარტი კი დღესაა: "ჰამბურგი" "ბაიერნს" მასპინძლობს.

შაბათს "ჰანოვერში" ახალი მთავარი მწვრთნელის, თომას შააფის დებიუტი "დარმშტადტთან" მატჩში შედგება. საინტერესოა, გააგრძელებს თუ არა ბერლინის "ჰერტა" გერმანიის და ზოგადად, მთელი საფეხბურთო ევროპის გაოცებას. შაბათს საღამოს კი ტურის ტოპ-შეხვედრაა: "ბორუსიების" დუელი მიონხენგლადბახში.

ეს სეზონი სწორედ "ჰამბურგისა" და "ბაიერნის" დუელით დაიწყო და, შესაბამისად, მეორე წრეც ამ მატჩით იწყება. ამჯერად მასპინძელი "ჰამბურგია", თუმცა რეკორდმაისტერი და გერმანიის ჩემპიონატის გამოკვეთილი ლიდერი მაინც უპირობო ფავორიტია.

მართალია, "ჰამბურგმა" პირველი წრე კარგად ჩაატარა (ყოველ შემთხვევაში, შარშანდელზე გაცილებით უკეთ), მაგრამ ჩრდილოელებს ზამთრის პაუზის დროს ჩატარებულ ტესტ-მატჩებში დასუსტება ეტყობოდათ. ამასთან, ჰამბურგელებს რამდენიმე ფეხბურთელი ტრავმირებული ჰყავთ. ამასთან, იანვარში "ჰამბურგის" შეფებმა გუნდი ჯერ კიდევ ვერ გააძლიერეს - კლუბმა მხოლოდ რამდენიმე მოთამაშე გაასხვისა. ამრიგად, მეორე წრის სასტარტო მატჩი ბავარიულ გიგანტთან "ჰამბურგს" ლოგიკურად კარგს არაფერს უქადის.

რაც შეეხება "ბაიერნს": გამოჯანმრთელდნენ დავიდ ალაბა, დუგლას კოშტა და არიენ რობენი, რაც იმას ნიშნავს, რომ ხოსეპ გვარდიოლას არჩევანი გაეზარდა. აქვე ისიც გავიხსენოთ, რომ პეპი მიუნხენში თავის ბოლო წრეს იწყებს - როგორც იცით, ზაფხულში გვარდიოლა "ბაიერნიდან" წავა და მას იტალიელი კარლო ანჩელოტი შეცვლის.

ბერლინის "ჰერტა" მიმდინარე სეზონის ერთ-ერთი უმთავრესი აღმოჩენაა - დედაქალაქელებმა, ყველასათვის მოულოდნელად, მესამე ადგილზე გამოიზამთრეს და, რაც უნდა პარადოქსულად ჟღერდეს, ჩემპიონთა ლიგის საგზურის მოპოვების ამბიცია გაუჩნდათ. შესაბამისად, მთელ საფეხბურთო გერმანიას აინტერესებს, როგორ ჩაატარებს "ჰერტა" მეორე წრეს, რომელიც ბერლინელებისთვის ხვალ, "აუგსბურგთან" საშინაო მატჩით იწყება.

"ჩვენ არავითარ შემთხვევაში არ უნდა ვიფიქროთ ხშირად იმაზე, რომ მესამე ადგილზე ვართ. "ჰერტასგან" ამას არავინ ელოდა და ახლა ყველა ჩვენ წაფორხილებას ელის. იმისათვის, რომ ყველაფერი ისე გაგრძელდეს, როგორც პირველ წრეში იყო, კიდევ უფრო მეტად უნდა მოვინდომოთ", - ეს ბერლინელთა თავდამსხმელის, ვედად იბიშევიჩის სიტყვებია. აღსანიშნავია, რომ "ჰერტამ" "ბაიერნიდან" ახალგაზრდა კურტი დაიმატა.

რამდენიმე ახალწვეული "აუგსბურგსაც" ჰყავს: მაგალითად, აჯეტი (ბაზელიდან) და გუველეუვი (ალკმაარი). გუნდში დაბრუნდა ჯურჯიჩიც, რომელიც "მალმიოში" იყო განათხოვრებული.

"ჰანოვერმა" პირველი წრე მე-17 ადგილზე დაასრულა და რა გასაკვირია, რომ ახალი მწვრთნელი ჰყავს: "წითლები" თომას შააფმა ჩაიბარა და 54 წლის სპეციალისტს გუნდის გადარჩენა დაევალა.

მაგრამ ჰყავს კი შააფს ისეთი ფეხბურთელები, რომლებიც მის დავალებებს კარგად შეასრულებენ? საკითხავი სწორედ ესაა. ფაქტია, რომ "ჰანოვერს" პირველ წრეში ყველაზე მეტად თავდასხმაში უჭირდა და შააფმა ამიტომაც გადაიბირა პორტუგალიელი თავდამსხმელი უგო ალმეიდა (ანჟიდან), რომელიც თომასს თავის დროზე ბრემენის "ვერდერშიც" ჰყავდა. თუმცა შააფს მხოლოდ უგო ალმეიდა არ შეუძენია - "ჰანოვერში" მივიდნენ სალაი ("ჰოფენჰაიმიდან", იჯარა) და ვოლფიც ("მიუნხენ 1860"-დან).

საინტერესოა, რომელ მათგანს გაამწესებს თომასი ძირითად შემადგენლობაში "დარმშტადტთან". ამ გუნდის პროგრამა-მინიმუმი და მაქსიმუმიც ელიტაში დარჩენაა.

პირველ წრეში ეს მისია წარმატებით შესრულდა და დარმშტადტელები იმედოვნებენ, რომ მეორე წრეშიც ასე განაგრძობენ და არ გაიზიარებენ იმ დებიუტანტების ბედს, რომლებიც პირველი ბუნდესლიგიდან იქ ასვლისთანავე ვარდებოდნენ - ვგულისხმობთ "პადერბორნს" (14/15), "ბრაუნშვაიგს" (13/14) და "ფორტუნას" (12/13).

მწვრთნელი დირკ შუსტერი ამბობს, ყველაფერი ჩვენზეა დამოკიდებულიო. ბევრი რამ იმაზეცაა დამოკიდებული, მალე გამოჯანმრთლდება თუ არა თავდამსხმელი ვაგნერი.

შაბათის საღამოს მატჩი კი ისეთია, ავ თვალს რომ არ დაენახვება: მიონხენგლადბახის "ბორუსია" დორტმუნდის "ბორუსიას" მასპინძლობს. ეს ისეთი წყვილია, "ბორუსია პარკზე", წესით, შემტევი ფეხბურთის ფოიერვერკები უნდა ვნახოთ.

"გლადბახმა" პირველ წრეში არაერთხელ დაამტკიცა, რომ ამ გუნდის ძლიერი მხარე პრესინგი და სწრაფი შეტევებია. სამაგიეროდ, მიონხენგლადბახელებს დაცვაში არ ულხინთ.

საინტერესოა, მოხვდებიან თუ არა პირდაპირ ძირითადში ახალწვეულები ჰინტერეგერი ("ზალცბურგიდან", იჯარა) და ჰოფმანი ("დორტმუნდიდან"). "გლადბახს" ამ მნიშვნელოვან მატჩში მთავარი ნახევარმცველი ჯაკა (დისკვალიფიკაცია) აკლია.

დორტმუნდის "ბორუსიას" თავის რიგებში ბუნდესლიგის საუკეთესო თავდამსხმელი ჰყავს - პიერ-ემერიკ ობამეიანგი, რომელმაც პირველ წრეში 18 გოლის გატანა შეძლო. თომას ტუხელის გუნდის მიზანი მეორე ადგილის შენარჩუნება და, თუ მოხერხდა, "ბაიერნთან" ჩამორჩენის შემცირება და ჩემპიონობისთვის გაბრძოლებაა.

XVIII ტური
პარასკევი. 22 იანვარი
ჰამბურგი-ბაიერნი 23:30
დისკვალიფიკაცია: არავინ
ტრავმა: სპაჰიჩი, ეკდალი - ულრაიხი, ბენატია, ხუან ბერნატი, რაფინია, გიოტცე, რიბერი
ურთიერთშეხვედრები
სულ 101 მატჩი: +19=22-60 (100-229)
ბოლო 6 მატჩი
+2=2-2 +5=0-1

შაბათი. 23 იანვარი
კიოლნი-შტუტგარტი 18:30
დისკვალიფიკაცია: - სუნიჩი
ტრავმა: - გინჩეკი, ჰარნიკი
ურთიერთშეხვედრები
სულ 85 მატჩი: +35=24-26 (140-139)
ბოლო 6 მატჩი
+2=3-1 +1=2-3

ჰანოვერი-დარმშტადტი 18:30
დისკვალიფიკაცია: არავინ
ტრავმა: ანდრეასენი, კიიოტაკე, ბენშოპი
ურთიერთშეხვედრები
სულ 1 მატჩი: +0=1-0 (2-2)
ბოლო 6 მატჩი
+1=0-5 +1=2-3

ჰერტა-აუგსბურგი 18:30
დისკვალიფიკაცია: არავინ
ტრავმა: ალაგუი, შიბერი - კალსენ-ბრაკერი, კოო, ს. პარკერი, ტობიას ვერნერი
ურთიერთშეხვედრები
სულ 7 მატჩი: +2=3-2 (4-6)
ბოლო 6 მატჩი
+5=0-1 +4=1-1

ჰოფენჰაიმი-ლევერკუზენი 18:30
დისკვალიფიკაცია: არავინ
ტრავმა: ელიუნუსი, ჰერდლინგი, შვეგლერი - ბიონიში, ჰილბერტი, არანგისი, ლ. ბენდერი
ურთიერთშეხვედრები
სულ 15 მატჩი: +1=1-13 (12-36)
ბოლო 6 მატჩი
+1=3-2 +3=1-2

ინგოლშტადტი-მაინცი 18:30
დისკვალიფიკაცია: არავინ
ტრავმა: ლეველსი, ზუტნერი, პეკჰარტი - სოტო
ურთიერთშეხვედრები
სულ 1 მატჩი: +1=0-0 (1-0)
ბოლო 6 მატჩი
+1=2-3 +3=2-1

გლადბახი-დორტმუნდი 21:30
დისკვალიფიკაცია: ჯაკა
ტრავმა: ალვარო დომინგესი, იანტჩკე, ჰერმანი, ნ. შულცი, ჰანი - დურმი, შმელცერი, ს. ბენდერი, შაჰინი
ურთიერთშეხვედრები
სულ 87 მატჩი: +29=28-30 (144-143)
ბოლო 6 მატჩი
+3=2-1 +4=0-2

კვირა. 24 იანვარი
აინტრახტი-ვოლფსბურგი 18:30
დისკვალიფიკაცია: არავინ
ტრავმა: ანდერსონი, ფლუმი, კიტელი, რაინარტცი, კასტაინოსი - არნოლდი, დოსტი
ურთიერთშეხვედრები
სულ 27 მატჩი: +4=10-13 (34-43)
ბოლო 6 მატჩი
+1=1-4 +1=2-3

შალკე-ვერდერი 20:30
დისკვალიფიკაცია: არავინ
ტრავმა: გიფერი, ჰიოვედესი, ნასტასიჩი, უჩიდა, ჰიოგერი - ვოლფი, შტერნბერგი, იოჰანსონი
ურთიერთშეხვედრები
სულ 93 მატჩი: +35=20-38 (114-130)
ბოლო 6 მატჩი
+2=1-3 +1=2-3

ბომბარდირები: 18 - პიერ-ემერიკ ობამეიანგი (დორტმუნდი); 15 - რობერტ ლევანდოვსკი (ბაიერნი); 14 - თომას მიულერი (ბაიერნი); 11 - ხავიერ ერნანდესი (ლევერკუზენი); 9 - სალომონ კალუ (ჰერტა).

ყოველდღიური სპორტული გაზეთი "ლელო"