"სქაი სპორტსთან" ინტერვიუში დევიდ ბექჰემმა "მანჩესტერ იუნაიტედის" შესახებ ილაპარაკა. 37 წლის ვეტერანი მიიჩნევს, რომ მართალია, სერ ალექს ფერგიუსონის სრულფასოვნად შეცვლა წარმოუდგენლად რთული ამოცანაა, მაგრამ "ეშმაკები" მომდევნო სეზონის უმთავრეს ფავორიტებში მაინც შედიან. აი, რა თქვა მან:- ვფიქრობ, დევიდ მოიესს დიდ დახმარებას გაუწევს "იუნაიტედის" ყოფილი დამრიგებლის რჩევები, მას ხომ ნებისმიერ წამს შეუძლია ფერგიუსონთან დაკავშირება და კონსულტაციების გავლა. იმის გათვალისწინებით, რამხელა ამაგი აქვს სერ ალექსს არა მხოლოდ "იუნაიტედის", არამედ ზოგადად ფეხბურთის წინაშე, ვინც უნდა მოსულიყო გუნდში, მისი მემკვიდრეობის გაძღოლა ყველას გაუჭირდებოდა. თუმცა
მომდევნო სეზონი ძალიან საინტერესო იქნება, რადგან პრემიერლიგაში გრანდიოზული ცვლილებები მოხდა. ინგლისში დაბრუნდა ჟოზე მოურინიო, რაც დამატებით ინტრიგას ნიშნავს. ამის მიუხედავად, მგონია, რომ ჩემპიონატს მოიესი მოიგებს.
"იუნაიტედის" გულშემატკივარი ვარ და ამის დიდი იმედი მაქვს. "ოლდ ტრეფორდზე" ზღვა გამოცდილებაა დაგროვილი, რაც ძალიან მნიშვნელოვანია. რაიან გიგზი უკვე დიდი ხანია გუნდშია. სხვებისთვის ის მისაბაძი მაგალითია. დაბრუნდა ფილ ნევილიც. ის ნიჭიერი მწვრთნელი და უბრალოდ, კარგი პიროვნებაა. საკლუბო საქმეებში ჩართულია გარიც. ნიკი ბატი ასაკობრივ გუნდებთან მუშაობს. ისინი ახალგაზრდა თაობას გამოცდილებას უზიარებენ და მიმაჩნია, რომ ეს სწორი გზაა.
იმედი მაქვს, დარჩება უეინ რუნიც, რადგან ის განსაკუთრებული ტალანტის პატრონია. უეინი, უბრალოდ, ვერ წარმომიდგენია "იუნაიტედის" გარდა სადმე სხვაგან. მესმის, რომ საბოლოო ჯამში ყველაფერი მხოლოდ მის ნებაზე უნდა იყოს დამოკიდებული, მაგრამ როგორც რიგით გულშემატკივარს, მინდა, რომ გუნდში მხოლოდ საუკეთესო ფეხბურთელები თამაშობდნენ.
ყოველდღიური სპორტული გაზეთი "ლელო"
ასევე იხილეთ:
დევიდ ბექჰემი: ძალიან საინტერესო პრემიერლიგა გველის
