"ფიორენტინას" ფანებს ახალი კუმირი ჰყავთ - ფედერიკო კიეზამ "იების" გულშემატკივართა გულები მალევე მოიგო. იგი მამის, ენრიკოს კვალს მიჰყვება და სერია A-ში თავის პირველსავე სეზონში იქცა "ფიორენტინას" ერთ-ერთ ლიდერად. 19 წლის ფედერიკოს დიდი პოტენციალი აქვს და თავისი მემკვიდრეობითი ენთუზიაზმითა და შემართებით ბევრის მიღწევა შეუძლია. საშინაო არენის გარდა, მან უკვე ევროპალიგასაც გაუგო გემო...
რას ამბობენ მასზე
"მას ყველა უბიძგებს იქითკენ, რომ გახდეს ის, ვინც შეუძლია გახდეს და მიაღწიოს იმას, რასაც იმსახურებს. მან ჩვენი გულები თავიენრიკო კიეზა: "ჩემი ვაჟი თამაშისგან დიდ სიამოვნებას იღებს. ეს ყველაზე კარგი რამ არის. მან ასევე უნდა გააგრძელოს და "ფიორენტინაში" კარგად ითამაშოს. ჩემთან შედარება და მსგავსებები? ფედერიკო მხოლოდ 19 წლისაა, მოდი, მას ცოტა დრო მივცეთ, რომ გაიზარდოს. ზედმეტი ზეწოლა საჭირო არ არის, მან უბრალოდ, თამაშისგან და საკუთარი თავისგან სიამოვნების მიღება უნდა გააგრძელოს".
წარსული
ფედერიკო გენუაშია დაბადებული, ბურთის გორება კი ტოსკანურ გუნდში, "სეტინიანეზეში" დაიწყო, რომელიც ფლორენციიდან არც ისე შორსაა. "იებში" იგი ათი წლის ასაკში მივიდა და იქ ჩამოყალიბდა და აღიზარდა. სოუზამ კიეზა ჯუნიორი თავისთან წინასასეზონო პერიოდში იახლა და ბევრისთვის მოულოდნელად, მიმდინარე სეზონის პირველივე მატჩში, თანაც, ტურინის "იუვენტუსის" წინააღმდეგ, ათამაშა. სადებიუტო შეხვედრასა და მომდევნო 8 მატჩში ვერა, მაგრამ ფლორენციელთა მაისურით თავის მეათე შეხვედრაში კიეზა-უმცროსმა გოლი გაიტანა - "იებმა" "ყარაბაღს" 2:1 მოუგეს და იმავე მატჩში ფიცხი ფედერიკო გააძევეს. იგი ნელ-ნელა ღვინდება და უფრო და უფრო პროდუქტიულიც ხდება.
სათამაშო სტილი
ფედერიკო კიეზა მართლაც რეაქტიული, ენერგიული, შემართული და სპორტულად აგრესიული ფეხბურთელია. საკმაოდ კრეატიულია და აქვს გოლის ალღო. თავს ორივე ფლანგზე კომფორტულად გრძნობს და შეუძლია გამოკვეთილი ფორვარდის უკან მეორე თავდამსხმელად თამაში, სადაც მეტი სივრცე აქვს. ერთი-ერთზე მცველთან ძალიან კარგია და ბურთის მიღებისას, როგორც წესი, მეტოქის მოტყუებას და დრიბლინგს ცდილობს. იგი უფრო შემტევი ნახევარმცველია, ვიდრე ფორვარდი.
მამის აჩრდილი…
ენრიკესთან მსგავსებები და პარალელები გარდაუვალია. ყველაფერს რომ თავი დავანებოთ, შვილი მამას ვიზუალურადაც ძალიან ჰგავს და თამაშის სტილითაც. ისევე დარბის და ისევე დაატარებს ბურთს, როგორც ამას ენრიკო აკეთებდა და მეტოქის კარზეც ისევეა დაგეშილი. სხვაობა გოლებშია… მამა "სამპდორიაში", "კრემონეზეში", "პარმაში", "ფიორენტინაში", "ლაციოსა", "სიენაში" (და ა.შ.)... თამაშობდა და უშუალოდ სერია A-ში 138 გოლი დაუგროვდა. ფედერიკო კი ახლა იწყებს და იგი "იებში" მამის დარად, 25-ე ნომრით თამაშობს.
გამორჩეული მომენტი
როგორც გითხარით, ფედერიკოს დებიუტი "იუვენტუსთან" შედგა და ის მატჩი "იებმა" ტურინში 1:2 წააგეს. 15 იანვარს კი ფლორენციაში ამავე ანგარიშით დაამარცხეს "იუვე". ფლორენციელთა მეორე გოლისას თინეიჯერი გადარეულივით ზეიმობდა. კიეზამ მილან ბადელის ჩაწოდებაზე შეირბინა და ყველანაირად სცადა, ბურთს მისწვდომოდა. ვერ შეეხო, მაგრამ ამან ჯანლუიჯი ბუფონზე გავლენა მაინც მოახდინა და გოლი გავიდა. ის ბადელის ჩაეწერა, მაგრამ კიეზა გიჟურად აღნიშნავდა და მერე ამბობდა კიდეც, ბურთს შევეხეო… მას ამის სჯეროდა და ვერც გაამტყუნებ, ვერ შეეხო, მაგრამ ეს მისი გოლიც გახლდათ.
კიეზას დიდი ლოდინი არ დასჭირდა სერია A-ში თავისი პირველი, ნამდვილი გოლის გასატანად - იმ მატჩიდან ერთ კვირაში მან "კიევოს" კარი აიღო.
აწმყო და მომავალი
ფედერიკო და მისი "ფიორენტინა" ევროპალიგის საგზურისთვის იბრძვიან და პარალელურად, ფლორენციელები ამ ტურნირზე მიმდინარე სეზონშიც გამოდიან. საშინაო არენაზე ევროზონისთვის ბრძოლა და თან ევროსარბიელზე სტაბილურად თამაში "ფიორენტინას" აღზევების საწინდარი უნდა გახდეს. კიეზა ამჟამად აწმყოსაც და მომავალსაც ფლორენციელებს უკავშირებს და ნელ-ნელა მათ ერთ-ერთ მთავარ ვარსკვლავად ყალიბდება. მთავარია, მისი მიკროტრავმა დავიწყებას მიეცეს და სერიოზულად არ დაშავდეს, თორემ ეს მის პროგრესს შეაფერხებს.
რას ამბობს თავად
"ვერ ვიჯერებდი, როდესაც პაულო სოუზამ მითხრა, რომ აგვისტოში "იუვენტუსთან" მატჩს ძირითად შემადგენლობაში დავიწყებდი. რაღაც პერიოდი მუხლები ამიკანკალდა, ძალიან ბედნიერი ვიყავი. როდესაც "კიევოსთან" მატჩში სერია A-ში ჩემი პირველი გოლი გავიტანე, არ ვიცოდი, რა მექნა. მინდა 200%-ით დავიხარჯო და როგორც ფეხბურთელი, გავიზარდო. უკვე 10 წელია, "ფიორენტინაში" ვარ და ახალი კონტრაქტით კიდევ 4 წელი მაკავშირებს გუნდთან. ძალიან მიხარია, უბედნიერესი ვარ" - თქვა უმცროსმა კიეზამ.
დოსიე
ფედერიკო კიეზა
კლუბი: "ფიორენტინა"
დებიუტი: 2016 წლის 20 აგვისტო
პოზიცია: შემტევი ნახევარმცველი, თავდამსხმელი
ეროვნება: იტალიელი
დაბადების თარიღი: 1997 წლის 25 ოქტომბერი
წამყვანი ფეხი: მარჯვენა
სიმაღლე: 175 სმ
ყოველდღიური სპორტული გაზეთი "ლელო"
